Jonás Tachi Ak'õre ome k'îraudariida
4
1 Mamîda Jonapa mãga unuk'ãri, Tachi Ak'õre ome t'ãri ãriidachi mãik'aapa k'îraudachi.a 2 Mapa Tachi Ak'õremaa nãga ùt'aa t'âji:—Aai Ak'õre Waibùa, ¿mùchi eujãde at'ãri bak'ãri, mùa pùmaa jara–e pajik'ã pùa na p'uuru jõpi–e pait'ee? Mapa isapai Tarsidee miruit'ee paji. Mùa k'awa bù pù t'ãri pia bapari mãik'aapa chupùria k'awaayaa bapari. Isapai k'îraudaik'aa. Eperãarã audú k'inia iru bapari perã, ãchi jõpiit'eeda ap'eda, k'îsia awara atapari. 3 Maperã Ak'õre Waibùa, mùa enenee nâbù pùa mù piupimerã. Ârá mù–it'ee piara bù piuit'ee, chok'ai bai k'ãyaara.
4 Mãpai Tachi Ak'õrepa p'anauji:
—¿Pù–it'ee pia bùk'ã aji, pù jãgá mù ome k'îrau bait'ee?
5 Mãpai Jonás uchiaji Nínive p'uurudeepa mãik'aapa ma p'uuru oriente eere ichi k'ãipari oonaji. Mama rancho oop'eda, su–ak'ù beeji ma ek'ari k'ûrasaa bada perã. Mamãik'aapa ak'ùji k'awaait'ee k'ãata p'asait'ee jã p'uuru ome. 6 Mama bùde Tachi Ak'õrepa ne–inaa k'arra waripiji Jonás badamãi. Ma ne–inaa k'arra iru k'ãyaara waibùara waripiji ma k'ûrasaade iru su–ak'ù beemerã. Mãgá Jonás o–îa beeji ma ne–inaa k'arra k'aurepa. 7 Mamîda aù norema tap'eweda Tachi Ak'õrepa k'i pëiji ma ne–inaa k'arra ãrimerã. Mãgá pùùdachi. 8 Ak'õrejîru uchiak'ãri, Tachi Ak'õrepa nãu wãsia pëiji oriente eereepa. Ma awara audú jêra nâbeek'ãri Jonás poro ârù, iru k'îra k'îdaipachi mãik'aapa waya piu k'inia nâbeeji. Mapa mãgaji:
—Ârá mù–it'ee piara bùda aji, piuit'ee, chok'ai bai k'ãyaara.
9 Mamîda Tachi Ak'õrepa Jonamaa mãgaji:
—¿Pia bùk'ã aji, pù jãgá k'îrau bait'ee ma ne–inaa k'arra pùùda k'aurepa?
Mãpai Jonapa p'anauji:
—¡Pia bùda aji, mù k'îrau bait'ee! ¡K'îrau nâbùpa mù piu wãda! aji.
10 Mãpai Tachi Ak'õrepa mãgaji:
—Pùa ma ne–inaa k'arra uu–e paji; ichiaba waripi–e paji. P'ãrik'ua abaade t'onoji mãik'aapa aù norema p'ãrik'ua piudachi. Mamîda pùa ma ne–inaa k'arra chupùria k'awaa bù. 11 ¿Audupùara mùa Nínive p'uurudepemaarã chupùria k'awaa–e paik'ã? Jã p'uuru waibùade paraa ciento veinte mil waa eperãarã waide ne–inaa pia wa k'achia k'awada–e p'anù, ne–animalaarã chok'ara paara.