Tachi Ak'õrepa chupùria beerã k'achia oopataarã miapiit'ee
2
1 ¡Aai, k'achiade baaidait'ee chi chîaramaa ne–inaa k'achia oo k'îsia iru p'anapataarã! ¡Ãchi camade paara mãga k'îsiapata! ¡Aù norema ewaridak'ãri, wãpata ãchia k'îsia k'achia k'îsiadap'edaak'a oodait'ee ãchi eperãarã waibùa beerã p'anadairã! 2 Ãchia chîara eujã wa te ãchi–it'ee ata k'inia p'anadak'ãri, chipariirã juadeepa jãri atapata. Mãgá eperã eujã, net'aa chi ak'õreerãpa bëida, ichideerã paara jãri ata wãrutapa ma eperã chupùria chù papipata. 3 Mãùrãpa mãga oopata perã, Jõmaarã Ak'õre Waibùapa ãramaa jara bù: “Mùa parã ãpùte ichiaba k'îsia k'achia k'îsia iru bù. Parã k'achiade baaipiit'ee. Made baaidak'ãri, p'ak'a yugode jâ bàk'apù p'anadait'ee mãik'aapa waa audua nipada–e pait'ee. 4 Maapai eperãarãpa parã oo iru p'anadait'ee mãik'aapa na chi–ùapata k'ari parã ãpùte k'aridait'ee: ‘Tachia ne–inaa jõma atuadachida. Ak'õre Waibùapa tachi eujã jãri atapiji tachi p'oyaadap'edaarãmaa.’ ” 5 Mãpai Miqueapa jaraji: “Ak'õre Waibùapa mãga oopip'eda, parãpa, pãchideerãpa paara waa eujã atada–e pait'ee iru p'uuru pidaarã awaraarãpa oodait'ee p'anùk'a.P'arat'a paraa beerãpa jaradap'edaa
6 “Parãpa mù pedee jaraparimaa jarapata: ‘¡Mãgee pedee taimaa jaranáaji! ¡Taimaata mãgee ne–inaa k'achia p'asa–e pait'ee!’ 7 Jacobdeepa uchiadap'edaarã, ¿paråpata jaradaipia bùk'ã Ak'õre Waibùapa eperãarã k'achia oopari? ¿Jaradaipia bùk'ã Tachi Ak'õre ichi k'inia k'îraudaipari eperãarã ome? ¿Jaradaipia bùk'ã irua ichi eperãarãmaa ne–inaa k'achia oopari? ¿Irua pedee pia jara–ek'ã ichia k'inia bùk'a p'anapataarãmaa? 8 Parã p'arat'ara beerãmaa irua jara bù: “Parã mù p'uuru pidaarã k'îra unuamaa iru p'anapataaråk'apù p'anù. Ãra jura chõodap'edaadeepa ãchi eujãdee chedak'ãri k'ãiwee p'anapataadait'ee, parãpa ãchi ârùpema p'aru jãri atapata ãrapa tewe parã ome paraadap'edaa pari. 9 Ma awara parãpa wêraarã jërek'oopata ãchi te k'inia iru p'anùdeepa mãik'aapa mãgá ãchi warrarãmaa k'achia oopata. K'iniadak'aa ma warrarãpa mùa ãramaa ne–inaa pia teeda iru p'anadamerã. 10 ¡Mapa na eujãdeepa uchíatù! ¡Awaraa eujãdee wåtù parã na eujãde âida–e pait'ee perã! Parã k'aurepa na eujã k'achiade baaiji. Mapa mùa jõpit'aait'ee. 11 Ak'õre pedee jarapari aparipa parãmaa na seewa jara cheda paara: “Mùa jara bù parãpa vino waibùa, it'ua waibùa iru p'anapataadait'ee,” parãpa iru wãara mù pedee jaraparik'a iru p'anak'ajida.
Tachi Ak'õrepa ichi p'uuru pidaarã k'aripait'ee
12 Ewari cherude mùa Jacobdeepa uchiadap'edaarã awaraa eujãdee ateedap'edaarã chip'e atait'ee. Israelitaarã madeepa chok'ai uchiarutaarã chip'e atait'ee oveja ak'ùparipa chi ovejaarã p'e ataparik'a ãchi k'ãipatamãi t'îupiit'ee maa–e pùrã p'ûajara paraamãi ateeit'ee. Maapai ãra chok'ara pait'ee. 13 Maapai ãchi Ak'õre Waibùapa ãra ma ateedap'edaa p'uurudeepa uchiapiit'ee mãik'aapa ãra naa ode wãit'ee iru, Jõmaarã Ak'õre Waibùata ãra rey pait'ee perã.