Miqueapa poro waibùarã ãpùte jarada
3
1 Israelitaarã poro waibùarã, ûrítù. ¿Parãpa israelitaarã ak'ùdaipia bù–ek'ã Tachi Ak'õre Waibùapa oopi bùk'a? 2-3 Mamîda ma k'ãyaara parãpa ne–inaa pia oodaamaa p'anapata mãik'aapa ne–inaa k'achia ooi awaa p'anapata. Parã nechiara netoparík'apù p'anù. Mãgùpa ne–animal k'ara oop'eda, chi chiara t'ùap'ek'oopari mãik'aapa chi bùùrù k'õopari mãgá netoit'ee chi k'uurude chuudait'ee p'anùùrãmaa. Mãga pùk'a parãpa oopata mùchi auk'aarã ome. Ichiaba parã ne–animal k'achia bàk'apù p'anù. Mãgee ne–animalpa awaraa ne–animal jita atap'eda, at'ãri chok'ai bùde k'aa k'opari. Mãga pùk'a parãpa oopata mùchi auk'aarã ome. 4 Mãga p'anapata perã parã jua ek'ari p'anapataarã ome, taarã–e nùde parã k'achiade baaidak'ãri mãik'aapa Jõmaarã Ak'õre Waibùamaa chupùria iididak'ãri irua k'aripa chemerã, irua p'anau–e pait'ee. Maapai iru miru pùk'a beeit'ee parãpa ne–inaa audú k'achia oopatap'edaa perã iru eperãarãmaa.Miqueapa Ak'õre pedee jarapari apatap'edaarã ãpùte jarada
5 Mùchi auk'aarã Tachi Ak'õre odeepa uchia wãda Ak'õre pedee jarapari apataarãpa seewa jarapata k'aurepa. Eperãarãpa mãùrãmaa chik'o teeruta pùrã, ãrapa jarapata ma eperãarã k'ãiwee p'anapataadait'ee. Jõdee ãramaa chik'o teeda–e pùrã, jarapata Ak'õre Waibùapa jura chõo pëiit'ee ma eperãarãpa p'ek'au k'achia oopata perã. Mapa Jõmaarã Ak'õre Waibùapa nãga jara bù ma iru pedee jarapari apatap'edaarãmaa: 6 “Parãpa waa seewa jarada–e pait'ee parãpa k'ãimok'araadap'edaade unudap'edaa mãik'aapa waa jarada–e pait'ee ne–inaa t'êepai p'asait'ee.” Ak'õrejîru baaik'ãri ewari jõdaiparik'a, mãga pùk'a ma Ak'õre pedee jarapari apataarã jõdait'ee. Maapai ãra–it'ee ãstaawa p'ãriu pùk'a beeit'ee. 7 Ne–inaa p'asait'ee unudap'edaada apata p'asada–e p'anadak'ãri ãchia jaradap'edaak'a, jõmaarã k'îrapite k'îra nejasia p'aneedait'ee mãik'aapa k'îra nejasiapa ãchi k'îra wãk'adait'ee. Waa jarada–e pait'ee Tachi Ak'õrepa ãramaata ichi pedee jarapari. 8 Jõdee mù, Miqueapa jarai Tachi Ak'õrepa mùmaa wãara ichi pedee jarapipari ichi jaure mù ome bapari perã mãik'aapa ichi juapa mù k'aripapari perã. Maperã waawee–ee mùa israelitaarãmaa jarapari ãrapa Ak'õrepa jara bùk'a ooda–e p'anadak'ãri mãik'aapa p'ek'au k'achia oodak'ãri.
Jerusalén p'uuru ãri baibeeit'ee
9 Mapa israelitaarã poro waibùarã, ûrítù mùa jararu. Parãpa Tachi Ak'õrepa jara bùk'a oodaamaa p'anapata mãik'aapa ne–inaa k'achia ne–inaa pia pùk'a unupata. 10 Parãpa chupùria beerã peepipata perã ãra eujã, net'aa pãchi–it'ee atadait'ee, mãgá p'arat'ara p'aneepata mãik'aapa te waibùa, pi–ia mãudee oopata Jerusalén p'uuru, piara jarait'eera Sión p'uurude. 11 Ma p'uurudepema charraarãpa p'arat'a jitapata ne–inaa k'achia oo–ee beerã miapidait'ee. Jõdee mãpema p'aareerãpa p'arat'a iidipata Tachi Ak'õre leyde jara k'inia bù jarateepata pari. Ma awara Ak'õre pedee jarapari apataarãpa p'arat'a jita k'inia p'anùùpa jarapata nãgee pedee pia eperãarãpa ûri k'inia p'anapata: “Jõmaarã Ak'õre Waibùa tachi ome bapari perã, maarepida k'achiade baaida–e paida” apata. 12 Mãga p'anapata perã parã poro waibùarã k'aurépata Jerusalén p'uuru, pia jarait'eera Sión p'uuru ãri baibeeit'ee. Ma p'uuru badamãi mãu pëi nâbee unudait'ee mãik'aapa mama aradopa eujã poreetùdait'ee ne–uudait'ee. Tachi Ak'õre te ma p'uurudepema eede badamãi paara sirua beeit'ee.