Tachi Ak'õre jõmaarã rey pak'ãri
4
1 Ewari jõ wãdak'ãri, ee Tachi Ak'õre te bùmãi jõmaweda ee k'ãyaara ùt'ùara bait'ee. Maapai na p'ek'au eujãdepema p'uuru pidaarã jõmaarã ma eedee chedait'ee. 2 K'îra t'ãdoo eujãdepemaarã pachedait'ee mãik'aapa mãgadait'ee: “Chétù. Ùt'aa wãdáma Tachi Ak'õre ee nok'odee Jacobpa ijãada Ak'õre Waibùa tede. Wãdáma irua tachimaa jarateemerã ichia oopi k'inia bù. Mãgá iru ode nipadai.” Mãga jaradait'ee mama Sión eede, Jerusalén p'uurude Tachi Ak'õrepa jarateeit'ee perã ichia eperãarãmaa oopi k'inia bù. 3 Maapai Tachi Ak'õrepa ak'ùit'ee ma eujãdepemaarãpa oopatap'edaa jarait'ee pia wa k'achia mãik'aapa ãra nepùra ak'ùit'ee, eujã waibùa t'ùmùara beedepemaarã nepùra paara. Maapai mãùrã espada arado papidait'ee mãik'aapa ãchi miasu pak'uru jua t'ai t'ùùpata papidait'ee. Maadak'ãriipa ma eujãdepemaarã apidaapa arma p'e atada–e pait'ee chõode awaraa eujãdepemaarã ome. Ichiaba jarateeda–e pait'ee jura chõo k'awadamerã. 4 Maapai eperãarã jõmaweda k'ãiwee p'anapataadait'ee; maarepida waawee–ee. Te chaadepemaarãpa ãchi uva k'ãi mãik'aapa higuera pak'uru iru p'anadait'ee mãik'aapa ãchia uudap'edaa t'ãide âidait'ee. ¡Mãga pait'ee Jõmaarã Ak'õre Waibùapa mãga jarada perã!5 Mamîda ma ewari cheru misa, awaraa eujãdepemaarãpa ãchi ak'õre waibùa apataarãmaa ùt'aa t'âpata mîda, tachi israelitaarãpa ichita oopataadait'ee Tachi Ak'õre Waibùapa jara bùk'a.
Tachi Ak'õrepa ichi p'uuru pidaarã k'aripait'ee
6 Jõmaarã Ak'õre Waibùapa jara bù: “Ewari cherude mùa mùchi eperãarã awaraa eujãdee ateepidaarã p'e atait'ee ãra p'anapatamãiipa. Ovejaarã chiwa beerãk'a mãik'aapa sê beerãk'a p'anù mîda, 7 mùa ma chok'ai p'aneedap'edaarã waya chepiit'ee mãik'aapa îwapiit'ee ãchi eujãdepema p'uuru chok'ara waya p'aneedamerã. Ãra eujã k'ãyaara eujã waibùara beedepemaarãpa ãra t'ùmà ateejida mîda, mùa ãra mùchi ee awara bùda Sión eede waya aneeit'ee mãik'aapa mama ãra mù jua ek'ari ichita p'anapataadait'ee. 8 Ovejaarã ak'ùparipa torredeepa ichi ovejaarã ak'ùparik'a, mãga pùk'a Jerusalén p'uuru eede bùdeepa mùa mùchi eperãarã ak'ù bapariit'ee. Chonaarãweda Jerusalén murallapa t'ùak'au bada p'uuru israelitaarã p'uuru waibùara bajik'a ãchi rey mama bada perã, mãga pùk'a waya p'uuru waibùa pait'ee mù aùde bapariit'ee perã.
Jerusalén p'uuru k'achiade baaik'ãri
9 Jerusalén p'uuru, ¿sãap'eda pùde p'anapataarã t'ãri p'uapa audú bia jõnù? Wêra warra t'oyama p'anàk'apù p'anù. ¿Sãga nâbùma? ¿Sãap'eda parã reypa mãik'aapa iru ûraapataarãpa parã k'aripada–e p'anùma? ¿Piujidak'ã? 10 Wãara parã Sión p'uurudepemaarã wêra warra t'oyama bi p'ira nâbùk'a chupùria p'anadait'ee awaraa eujãdepemaarãpa parã p'uurudeepa ateedait'ee perã mãik'aapa mêe k'ãipidait'ee perã Babilonia eujãde p'ananarutamaa. Mamîda mama p'anùde Jõmaarã Ak'õre Waibùapa ichi p'uuru pidaarã uchiapiit'ee ãra k'îra unuamaa iru p'anapataarã juadeepa.
11 Ârá awaraa eujãdepemaarã chip'e atajida chõo chedait'ee parã p'uuru Jerusalende. Jara p'anù: “¡Na p'uuru jõpidáma! ¡Unu k'inia p'anù jõmaweda ãri baibù!” 12 Mamîda ãrapa k'awada–e p'anù Tachi Ak'õre Waibùapa k'îsia iru bù ooit'ee ãra ome. Iruata ãra chip'e atapiji ãra ome ooit'ee perã eperã ooparik'a net'a tau k'õrajâma p'e atap'eda, ateek'ãri chi tau edeepa ãyaa p'e atait'ee.
13 ¡Sión p'uurudepemaarã, wåtù parã k'îra unuamaa iru p'anapataarã ome chõode! Jõmaarã Ak'õre Waibùapa parãmaa jara bù: “Mùa parã juataura papiit'ee p'ak'a ùmùk'îra cacho hierrodee ooda mãik'aapa bùùrù broncedee ooda bak'ajik'a.” Mãgá parãpa ma eujãdepemaarã peek'oodait'ee mãik'aapa ãra net'aa awaraarã juadeepa jãri atadap'edaa parãpa jãri atadait'ee. Maap'eda ma net'aadepema aneedait'ee primiciak'a teedait'ee na p'ek'au eujãdepemaarã jõmaweda Ak'õre Waibùamaa.