Awaraa rey pait'ee rey Davidk'a
5
1 Ârá Jerusalén p'uurudepemaarã, k'îsíatù sãgá chõodait'ee parã p'uuru jõt'aade chedap'edaa perã mãik'aapa parã p'uuru wap'ùra iru p'anapata perã. Parã poro waibùa miapidait'ee eperãpa awaraa eperã miapik'ajik'a wùda paara pak'uru hierrodee oodapa. 2 Mamîda Tachi Ak'õrepa jara bù: “Pù, Belén Efrata p'uuru, apema Judá eujãdepema p'uuru k'ãyaara ma–ãriara bù mîda, pùde israelitaarã poro waibùa t'oit'ee. Iru uchiait'ee jõmaarãpa t'o p'anapatap'edaa chonaarãwedapema ëreerãdeepa mãik'aapa mù pari irua israelitaarã ak'ù bapariit'ee. 3 Ârá Tachi Ak'õrepa parã ichiak'au atabëiit'ee wêra biak'oo bùpa chi warra t'oru misa. Maapai ma warra auk'aarã Israeldepemaarã awaraa eujãdee ateedap'edaarã ome waya araa p'anapataadait'ee. 4 Mãgà rey pait'ee mãik'aapa ichi jua ek'ari beerã pia ak'ù bapariit'ee ovejaarã ak'ùparik'a. Tachi Ak'õrepa iru waibùa papiit'ee perã, iru jua ek'ari beerã k'ãiwee p'anapataadait'ee. Maapai jõmaarãpa k'awaadait'ee iru jõmaarã k'ãyaara waibùara bù, t'ùmùara beerãpa paara. 5 Ma rey k'aurepa eperãarã k'ãiwee p'anapataadait'ee. Asiria pidaarãa tachi eujãde chõode chedak'ãri mãik'aapa tachi palaciode t'îu chedak'ãri, ãra ârù tachia poro waibùarã chok'arab pëidait'ee. 6 Ma poro waibùarãpa chonaarãwedapema Nimrod (Génesis 10.8-12) eujã, Asiria eujã ak'ù p'anadait'ee espadapa. Mãgá ma rey cheit'ee bùpa tachi k'aripait'ee tachi k'îra unuamaa iru p'anapataarã juadeepa ãra tachi eujãde t'îu chedak'ãri chõode.Israelitaarã k'îra unuamaa iru p'anapataarã jõdap'edaa
7 Maapai Jacobdeepa uchiadap'edaarã at'ãri chok'ai p'aneedap'edaarã eujã awara–awaraade p'anapataadait'ee. Mamîda ma eujã chaa ãra Tachi Ak'õrepa sereno maa–e pùrã k'oi nek'arra ârù baaiparík'apù p'anadait'ee. Ma eujãdepemaarã–it'ee ãra mãga p'anadait'ee Tachi Ak'õrepa ãra k'aripapariit'ee perã. 8 Mamîda ma eujã awara–awaraade p'anaruta misa, ãra k'îra unuamaa iru p'anapataarã–it'ee ãra leonpa mêepema ne–animal wa oveja ovejaarã paraamãi jùrù ník'apù p'anadait'ee. Ma leonpa ne–animal jita atada k'aa k'oparik'a, mãga pùk'a ma israelitaarãpa ãra k'îra unuamaa iru p'anapataarã p'oyaadait'ee. Mãga nùde apidaapa mãùrã k'aripada–e pai. 9 Mãgapù Tachi Ak'õrepa israelitaarã k'îra unuamaa iru p'anapataarã jõpiit'ee.
Jura chõopata mãik'aapa ne–inaa juapa ooda k'îrapite ùt'aa t'âpata jõdait'ee
10 Tachi Ak'õrepa jara bù: “Maapai mùa jõit'ee israelitaarãpa chõode wãpata caballoorã ateepata, ãchia jidiupata carro ome. 11 Ichiaba parã eujãde p'uuru murallapa t'ùak'au bee ãriit'ee, mãu pëi bù aupai beemerã. 12 Ichiaba jaipanaarã ãchi net'aa ome mãik'aapa ne–inaa p'asait'eeda apataarã jõit'ee. 13 Ma awara mùa jõit'ee ne–inaa parãpa oodap'edaa aù k'îrapite ùt'aa t'âpataadait'ee mãik'aapa mãu awara bùdap'edaa awaraa ak'õre waibùa apataarã–it'ee ma ne–inaa pãchi juapa oodap'edaa k'îrapite waa ùt'aa t'ânaadamerã. 14 Ichiaba t'upeeit'ee pak'uru nawe waibùa apata Asera–it'ee awara bùdap'edaa mãik'aapa ma ne–inaa awaraa ak'õre waibùa apataarã–it'ee p'anadap'edaa p'uuru jõit'ee. 15 Mùa ma net'aa unuamaa iru bapari perã mãik'aapa mùde ijãadai k'ãyaara ma ne–inaa k'îrapite ùt'aa t'âpataarã ome k'îrau bapari perã, jõit'ee eujã awara–awaraadepemaarã ma net'aade ijãapataarã.