Tachi Ak'õrepa israelitaarã ùmùateeda
6
1 Miqueapa jaraji: “Israelitaarã, ûrítù Jõmaarã Ak'õre Waibùapa parã ùmùateeit'ee perã. ¡Ak'õre Waibùa, p'irabáiji mãik'aapa pù nepùra jaráji eera k'îrapite mãgùùrãpa pùa israelitaarã ùmùateeru ûridamerã!” 2 Eera, na p'ek'au eujã basa ome, Ak'õrepa na eujã oodak'ãriipa parã p'anapata. Mapa ûrítù irua jara bù ichi p'uuru pidaarã, israelitaarã ãpùte.3 Jõmaarã Ak'õre Waibùapa nãga jara bù: “Mùchi p'uuru pidaarã, ¿k'ãata mùa parãmaa oojima parãpa mù yiaraa iru p'anapataadamerã? P'anáutù p'oyaaruta pùrã. 4 Mùa parã p'uuru pidaarã Egiptodeepa uchia ataji mama esclavo p'anapatap'edaadeepa. Pëiji Moisés, Aarón, Miriam ome parã p'uuru ateedamerã mùa ak'ùpida ode. 5 Mùchi eperãarã, k'irãpátù Moabdepema rey Balacpa parã p'uuru pidaarã ãpùte pedee k'achia jarada mãik'aapa Beor warra Balán mù k'ap'ùa pari pedee pia jarada. (Números 23—24) Ichiaba k'irãpátù sãgá parã Sitindeepa uchiadak'ãri, Jordán to p'oo bùde sîajida Guilgaldee wãrutade. (Josué 3—4) Ma p'asadap'edaa k'irãpadak'ãri, k'awaadait'ee mùa jõmaweda ooda parã k'aripait'ee.”
Sãgá Tachi Ak'õre p'uuru pidaarã p'anapataadaipia bù
6 Mãpai Israel p'uuru pidaarãdepemapa iidiji: “¿Sãgá mù wãima Jõmaarã Ak'õre Waibùa k'îrapite? ¿Sãgá mùa ùt'aripema Ak'õre Waibùamaa ùt'aa t'âima? ¿Irumaa ateeipia bùk'ã p'ak'a chak'e maarepida anida wêe, año aba iru bee, peep'eda, iru–it'ee paa jõpiit'ee? 7 ¿Ak'õre Waibùa mù ome o–îa baima mil oveja ùmùk'îraarã, año aba iru bee, iru–it'ee paapiru pùrã maa–e pùrã aceite waibùa, to diez milk'a irumaa teeru pùrã? ¿Mùa p'ek'au k'achia oopata pari mù warra naapema peet'aaik'ã iru–it'ee paapiit'ee?” 8 Mãpai Miqueapa jaraji: “Aai eperã, Jõmaarã Ak'õre Waibùapa ichita jarapari ne–inaa pia irua k'inia bù tachi eperãarãpa oopataadamerã. K'inia bù ne–inaa oomerã ichia jara bùk'a, iru k'inia iru bapariimerã mãik'aapa awaraarã chupùria k'awaapariimerã, ma awara pùchi Ak'õre Waibùapa k'inia bùk'a bapariimerã iru ome, audua–ee.
Ak'õre Waibùapa ichi eperãarã miapiit'ee
9 Eperã k'îsia k'awaa bùpa Tachi Ak'õre Waibùa waaweepari. Jerusalén p'uurude p'anùùrãmaa irua jara bù: “Ûrítù parã na p'uurude chip'epataarã, 10 parã t'ãide ne–inaa k'achia ooi awaa p'anapataarãpa p'arat'a, net'aa pi–ia iru p'anù chîara k'ûradap'edaa jõnùpa chaapari chùk'ùa chaaparipa net'aa chaadak'ãri. Mãga oopata mù leyde jara bù mîda mùa mãgee ne–inaa unuamaa iru bù. 11 ¿Mãgee eperãpa net'aa chaapari chùk'ùade chaap'eda, awaraamaa netoparita p'ek'au k'achia ãyaa bùipia bùk'ã? 12 Na p'uurudepema p'arat'a paraa beerãpa chupùria beerã k'achia iru p'anapata ãchi jua ek'ari mãik'aapa na p'uurudepema jõmaarã seewa–idaa baip'anù. 13 Mãgá parã jõmaarãpa p'ek'au oopata perã ewaaweda mùa parã p'uuru jõpiru. 14 Parã nek'odait'ee mamîda bi jãwaadaida–e pait'ee. Ma k'ãyaara at'ãri jarra oodait'ee. Net'a tau, jãgee chik'o ùa bùdait'ee, t'êepai madepema k'odai jîak'aapa. Mamîda mùa ma jõma jõpiit'ee jura chõo jõnùde. 15 Ne–uudait'ee. Mamîda parãpa uudap'edaa ewada–e pait'ee. Olivo judait'ee. Mamîda madepema aceitepa ne–inaa ooda–e pait'ee. Uvajõ piarsîdait'ee. Mamîda madepema vino toda–e pait'ee. 16 Mãga pait'ee parãpa oopata perã rey k'achia bada Omripa jaradak'a mãik'aapa ichi warra rey Acabpa, irudeepa uchiadap'edaarãpa paara ne–inaa k'achia oopatap'edaak'a. Maperã mùa parã p'uuru jõpiit'ee mãik'aapa ma k'aurepa awaraa eujãdepemaarãpa parã t'â ûridak'ãri, p'era pùk'a p'aneedait'ee maa–e pùrã parã oo iru p'aneedait'ee. Mãgá parã k'aurepa mù p'uuru pidaarã k'îra nejasia p'anadait'ee.”