Nahúm
Tachi Ak'õre pedee jarapari Nahumpa p'ãda
1
1 Tachi Ak'õrepa na librode jara bù k'awapiji ichi pedee jarapari Nahummaa. Nahúm Elcós p'uurudepema paji. K'ãimok'araa pùk'a bùde Tachi Ak'õrepa Nahummaa unupiji ichia ooit'ee pada Nínive p'uuru ome.Tachi Ak'õre k'îrau bada Nínive p'uurudepemaarã ome
2 Jõmaarã Ak'õre Waibùapa eperãarã ichia ooda jiwaapari. Mapa k'îraudaipari eperãarãpa awaraa ak'õre waibùa apataarãde ijãadak'ãri mãik'aapa iru k'îra unuamaa iru p'anapataarãmaa ne–inaa k'achia oopari. 3 Iru mak'ùara isapai k'îraudai–e mîda, jõmaarã k'ãyaara waibùara bù perã, ne–inaa k'achia oopataarã ichita miapiit'ee. Jõmaarã Ak'õre Waibùa nãumia ârù nipa pùk'apari mãik'aapa yooro p'ora odeepa uchiaparik'a jâarara uchia pùk'apari iru bùùrù t'ùarumãi. 4 Irua p'usamaa jarak'ãri p'oo beemerã, mãga oopari. Auk'a tomaa jarak'ãri, ichiaba p'oodaipata. Basán eujãdepema p'ûajaramaa mãik'aapa Carmelo ee bidepema ne–uu k'ãimaa mãga jarak'ãri, jõmaweda pùùdaipari, Líbano ee jêra bùdepema nep'ono paara. 5 Irua ichi jua ak'ùpik'ãri, eera wëredaipata mãik'aapa edaa baai chepata ne–inaa torrabaidak'a. Iru na eujãdee chek'ãri, awêrachai wãyaaparík'apù bù mãik'aapa na eujãdepemaarã paara wëredaipata p'era jõnùpa. 6 Iru audú k'îraudaik'ãri, ¿k'airãta iru juadeepa chok'ai uchiadaima? ¿K'airãta choodaima iru k'îraudaik'ãri? Iru k'îrau bak'ãri, t'ùpùtauk'a eedeepa weepari mãik'aapa mãu t'oo pùk'apari. 7 Mamîda Jõmaarã Ak'õre Waibùa t'ãri pia bapari irude ijãapataarã ome. Ãra k'achiade baaidak'ãri, ãra–it'ee iru p'uuru murallapa t'ùak'au bàk'apù bù. Ãra jâapari mãik'aapa pia ak'ù bapari irude ijãapata perã. 8 Mamîda iru k'îra unuamaa iru p'anapataarã–it'ee mãga pa–e pait'ee. Ãra ome ooit'ee to choma bùpa ooparik'a ne–inaa barree ateek'ãri. Jõmaweda jõpiit'ee p'ãriude p'aneerutamaa. 9 ¿K'ãata parãpa pedeetee p'anùma Ak'õre Waibùa ãpùte? ¡Iruata parã jõmaweda jõpiit'ee! ¡Apidaapa iru ãpùte pedeeteeda omé pedeeteeda–e pai! 10 T'ùpùtaupa ne–ùùrù–idaa pëi nâbùa maa–e pùrã p'ûajara p'ooda jõmaweda paa jõparik'a, mãga pùk'a irua parã jõpiit'ee.
Tachi Ak'õrepa Asiria eujãdepemaarã p'oyaait'ee
11 Nínive p'uuru, pùdepema eperã ichi k'îsia k'achiadeepa ne–inaa k'achia ûraaparipa ichi auk'aarã ome Tachi Ak'õre ãpùte pedeeteeji. 12 Mapa Jõmaarã Ak'õre Waibùapa nãga jara bù ichi p'uuru pidaarã, Judá eujãdepemaarãmaa: “Asiria eujãdepemaarã chõo k'awaa p'anù mîda mãik'aapa chok'ara p'anù mîda, jõdait'ee mãik'aapa wêpadait'ee. Mãùrã juapa mùa parã miapiji mîda, mùa parã waa mãgá miapi–e pait'ee. 13 Mùa jõpiit'ee mãùrãpa yugo bù pùk'adap'edaa parã âbùside mãik'aapa cadenapa jâ pùk'adap'edaa parã k'ap'ùade. Mãgá mùa parã mãùrã jua ek'ariipa uchiapiit'ee.”
14 Nínive p'uurudepema rey, pù ãpùte Jõmaarã Ak'õre Waibùapa nãga jaraji: “Pùdeepa warrarã uchiada–e pait'ee. Mapa eperãarãpa pù t'â k'irãpada–e pait'ee. Mùa parã ak'õre waibùa apataarã tedepema ne–inaa juapa ooda aù k'îrapite ùt'aa t'âpata mãik'aapa awaraa ne–inaa k'îrak'a bee jõmaweda jõpiit'ee mãik'aapa mama pù jaupiit'ee pù audú k'achia baibairã.”
Nínive p'uuru k'achiade baaida
15 Judá eujãdepemaarã, ¡ak'àtù! ¡Eperã eedeepa cheru pedee pia jara pëida jarade; jarade tachi k'ãiwee p'anapataadait'ee! Mapa Judá eujãdepemaarã, parãpa fiesta oopata óotù mãik'aapa óotù parãpa Tachi Ak'õremaa oodait'eeda adap'edaak'a irua parã k'îra unuamaa iru p'anapataarã juadeepa k'aripak'ãri. Ma ne–inaa k'achia ooi awaa p'anapataarã waa parã eujãde chõo cheda–e pait'ee k'iniidap'edaa perã.