Nínive p'uuru k'achiade baaida
2
1 ¡Nínive p'uurudepemaarã, pù ãridait'eerã cheruta! ¡Mapa jâapataarã pïitù parã p'uuru t'ùak'au bù muralla ârù mamãik'aapa parã p'uurudee chepari o ak'ùdamerã! ¡Espada jâ p'anéetù mãik'aapa parã soldaorã chip'e atátù! 2 Mãga oodaipia bù Jõmaarã Ak'õre Waibùapa Jacobdeepa uchiadap'edaarã, pia jarait'eera israelitaarã waya p'uuru pidaarã waibùa papiit'ee perã. Parã ãra eujã ãri wãjida mîda mãik'aapa atabaibëijida mîda uva k'arra jua t'ai wêe pùk'a, irua ãra mãgá k'aripait'ee. 3 ¡Ârá parã k'îra unuamaa iru p'anapataarã cheruta parã p'uurudee parã ome chõode! Ma chõo k'awaa beerã p'aru p'oree jâ p'anù mãik'aapa escudo p'oree anipa p'anù.a ¡Ãra caballoorãpa jidiupata carro urua jõnù t'ùpùtauk'a mãik'aapa ma caballoorã jâtùjâtùa p'anù chõode wã k'iniapa! 4 Nínive p'uuru k'ait'a bee p'uurude chewãdak'ãri, ma p'uurudepema calle jãde isapai wãyaapata mãik'aapa plazade ãchi carro p'ùrrabaipata. Ma carro uchiterree p'anù tachia t'ùpùtau t'ùmùùpa unupatak'a mãik'aapa isapai achuwaa achuwaa p'ira wãruta pa tau p'orep'oreparik'a. 5 Mãùmisa Nínive p'uurudepema reypa ichi soldaorã chõo k'awaara beerã t'âjara bù isapai muralladee wãdamerã chõode. Mamîda ma wãdade p'era jõnùpa t'êneuruta. Mãùmisa ãra k'îra unuamaa iru p'anapataarãpa escudopa ãchi k'ap'ùa t'ap'adap'eda, pak'uru choma p'ira aneeruta ma muralladepema puerta ãripidait'ee. 6 Ichiaba ma p'uuru to wãyaa bù eerepema pania t'îupipata ewa ataruta pania p'uuru ik'aawa bada canaldeepa toida wee wãmerã. Mãgá ma eereepa p'uurude t'îuk'oo wãdai. Mãga unudak'ãri, rey palaciode p'anapataarã p'eradaipata. 7 Ma p'uurude t'îu wãdaarãpa ma p'uurudepema reinab ne–inaa jâ bù êra ataruta k'îra nejasiapiit'ee mãik'aapa iru ateeruta ãchi eujãde. Wêraarã iru jua ek'ari mimiapatap'edaarã iru t'êe jêe wãruta bia jõnù misa palomak'a mãik'aapa ãchi t'ûa t'aap'e jõnù misa t'ãri p'uapa. 8 Dique ãri beek'ãri pania ma uriadeepa wee wãparik'a, mãga pùk'a Nínive p'uurudepemaarã jîchoo wãruta ãchi p'uurudeepa. Ma p'uurudepemaarã at'ãri chõo k'inia p'anapataarãpa biapata: “¡Wãnáatù! ¡Ãpùtee chétù!” Mamîda audú p'era p'anadairã apida ãpùtee che–e. 9 Mãpai ma p'uurudepemaarã k'îra unuamaa iru p'anapataarãpa biapata: “¡Pãchi–it'ee p'arat'a p'e atanátù, nêe paara, na p'uurude mãgee net'aa pi–ia waibùa paraa perã!”10 Nínive p'uuru jõdai wãpù. Aùde nâbù jõmaweda ãri wãda. Ma p'uurude p'aneedap'edaarã t'ãri ma–ãri p'anù mãik'aapa ãchi bùùrù wëredai p'anù p'era jõnùpa. Ãchi k'îra p'ãwatùdai wãda mãik'aapa juatau wêe pùk'a p'aneeruta. 11 ¿Ârá sãma bùma ma p'uuru león mãu te uria badak'a? Mãpemaarã leonk'a p'anajida mãik'aapa mama ãchi chak'eerã ome k'ãiwee p'anapachida, mama p'anùde apidaapa ãra k'achia ooda–e pai jîak'aapa. 12 Leonpa ooparik'a ichi mãu tedeepa uchiak'ãri ne–animalaarã jùrùde mãik'aapa peep'eda, aneede chi chak'eerã–it'ee, mãga pùk'a ma p'uurudepemaarã awaraa p'uurudee chõonapachida eperãarã peede mãik'aapa ãra net'aa jãri atadap'edaa aneede ãchi p'uurudepemaarã–it'ee. Mamîda ârá ma p'uuru jõ wãruta.
Tachi Ak'õrepa Nínive p'uuru jõpida
13 Jõmaarã Ak'õre Waibùapa Nínive p'uurudepemaarãmaa jara bù: “¡Ûrítù! Mùa parã p'uuru unuamaa iru bù. Parã leonk'a juataura p'anajida mîda, mùa parã chõopata carro paa jõpiit'ee nari jârak'awaa aupai beemerã mãik'aapa mùa parã león chak'eerã, pia jarait'eera parã soldaorã peepik'ooit'ee. Net'aa jõmaweda parãpa awaraa p'uurudepemaarã juak'aawa jãri atadap'edaa parã k'îra unuamaa iru p'anapataaråpata jãri atadait'ee. Parãpa pëirutaarã waa wãda–e pait'ee pedee k'achia jarade awaraa p'uuru pidaarãmaa.”