2
1 Parã k'îra nejasia wêe p'anùùrã, chip'étù mãik'aapa ùt'aa iidítù 2 Jõmaarã Ak'õre Waibùa parã ome k'îraudaip'eda, wêpapii naaweda nãupa p'ûajara p'ooda wêpapiparik'a maa–e pùrã t'ùpùtaupa paa jõparik'a. 3 Jõdee parãdepema audua–ee beerã, irumaa ùt'aa t'âpatáatù mãik'aapa irua jara bùk'a oopatáatù. Mãgá ma ewate Jõmaarã Ak'õre Waibùa audua beerã ome k'îraudaik'ãri, parãta iru juadeepa uchiadai.Jõmaarã Ak'õre Waibùapa filisteorãmaa ooit'ee bù
4 Ma ewate Jõmaarã Ak'õre Waibùapa pëidaarãpa Filistea eujãdepema Gaza mãik'aapa Ascalón p'uurude eperãarã wêe atabëidait'ee. Imat'ùpa pai naaweda Asdod p'uurudepemaarã ãra p'uurudeepa jërek'oodait'ee mãik'aapa Ecrón p'uurudepemaarã ãra p'uurudeepa ichiaba jërek'oodait'ee. 5 ¡Aai, parã filisteorã Canaán eujãde p'usa ide p'anapataarã, Jõmaarã Ak'õre Waibùapa parã queretea pidaarã k'achiade baaipiit'ee! Irua parãmaa jara pëiru: “Mùa parã k'iniipiit'ee apida chok'ai beenaamerã.”
6 Irua mãga ook'ãri, parã eujã p'usa ide bada p'ûajara paraamãi beeit'ee mãik'aapa mama ovejaarã t'ùak'au bùde jâapataadait'ee. 7 Mama Judá eujãdepemaarã Tachi Ak'õre juadeepa chok'ai uchiadap'edaarãpa ãchi ovejaarã ateedait'ee nek'odamerã. Irua ãra k'aripait'ee mama pia p'anapataadamerã mãik'aapa k'eu wãk'ãri, Ascalón p'uurudepema tede k'ãidait'ee.
Jõmaarã Ak'õre Waibùapa Moab eujãdepemaarãmaa, Amón eujãdepemaarãmaa ooit'ee bù
8 Jõmaarã Ak'õre Waibùa, israelitaarã Ak'õre Waibùapa jara bù: “Mùa ûri baji Moab eujãdepemaarãpa mù eperãarã ãpùte ik'achia pedee jaradak'ãri mãik'aapa Amón eujãdepemaarãpa mù eperãarã oo iru p'anadak'ãri. Ûri baji mãùrãpa audua pedee jaradak'ãri mù eperãarã eujã jãri atadait'ee. 9 Mapa mù, Jõmaarã Ak'õre Waibùa, israelitaarã Ak'õre Waibùa chok'ai bùpa juraa bù Moab eujã Amón eujã ome Sodoma p'uuruk'a mãik'aapa Gomorra p'uuruk'a p'aneedait'ee. Ma eujãde ne–ùùrù aupai t'onodait'ee mãik'aapa t'ã aupai unudait'ee. Maap'eda Judá eujãdepemaarã mù juadeepa chok'ai uchiadait'eerãpa ma eujã jãri atadait'ee ãchi–it'ee.”
10 Mãgá Moab eujãdepemaarã, Amón eujãdepemaarã ome k'achiade baaidait'ee audua p'anadap'edaa perã mãik'aapa Jõmaarã Ak'õre Waibùa p'uuru pidaarã ãpùte ik'achia jaradap'edaa perã. 11 Jõmaarã Ak'õre Waibùapa mãùrã p'erapiit'ee ãra ak'õre waibùa apataarã jõmaweda ãripik'ãri. Wãara irua ak'õre waibùa apataarã jõmaweda jõpik'ãri, na p'ek'au eujãdepemaarã jõmaweda iru k'îrapite bedabaidait'ee; chi t'ùmùara p'anapataarã paara.
Jõmaarã Ak'õre Waibùapa Cus eujãdepemaarãmaa ooit'ee bù
12 Cusita pidaarã, Jõmaarã Ak'õre Waibùapa parã ichiaba espadapa su peepiit'ee ichia pëirutaarãmaa.
Jõmaarã Ak'õre Waibùapa Asiria eujãdepemaarãmaa ooit'ee bù
13 Jõmaarã Ak'õre Waibùapa ichiaba norte eerepema Asiria eujãdepemaarã k'iniipiit'ee. Ãra p'uuru waibùa Ninivede eperãarã wêe beeit'ee mãik'aapa pania wêe bù eujãk'a beeit'ee. 14 Ma p'uuru ãridap'edaade ovejaarã, p'ak'aarã ome jêra beedait'ee mãik'aapa mêepema ne–animalaarã k'îra t'ãdoo p'anapataadait'ee. Te bùùrù columna ãrik'oodap'edaa ârù lechuza, búho ome k'ãinadait'ee. Te t'eedap'edaa ventanadeepa eperãarãpa ãra biapi ûridait'ee. Ma tedepema puerta badamãi cuervo biadait'ee. Cedro pak'uru pia ma tede bada wê–e pait'ee eperãarãpa chùa ateedait'ee perã. 15 Ma p'uurude p'anapatap'edaarã k'ãiwee p'anapachida k'îsiadap'edaa perã ãchi p'uuruta pipùara baji awaraa p'uuru jõmaweda k'ãyaara mãik'aapa apidaapa ãra p'uuru p'oyaada–e pai. Mamîda Jõmaarã Ak'õre Waibùapa ma p'uuru ãripiit'ee mãik'aapa ma t'êepai ne–animalaarã aupai mama p'anapataadait'ee. Maapai eperãarã ma p'uuru k'idaa wãyaadak'ãri, ma p'uuru awaraa p'uuru k'ãyaara ek'ariara unudait'ee.