Jerusalén p'uuru k'achiade baaiit'ee
3
1 Aai, Jõmaarã Ak'õre Waibùapa Jerusalén p'uuru k'achiade baaipiit'ee. Ma p'uurudepemaarãpa oodaamaa p'anapata Tachi Ak'õrepa oopi bùk'a. Ne–inaa k'achia ooi awaa p'anapata mãik'aapa ãra poro waibùarãpa ãchi jua ek'ari p'anùùrã k'aripadak'aa. 2 Ma p'uurudepemaarãpa Jõmaarã Ak'õre Waibùade ijãadak'aa perã, iru jùrùdak'aa mãik'aapa iru pedee ûri k'iniadak'aa. Mapa oodak'aa irua jara bùk'a. 3 León nek'o k'inia bak'ãri, bia nâbaparik'a maa–e pùrã tap'eda pai naaweda usap'ãpa ichia jita atada jõmaweda k'oparik'a, mãga pùk'a ma p'uurudepemaarã poro waibùarãpa ne–inaa jõmaweda k'inia p'anù ãchi–it'ee aupai. 4 Mãpema Ak'õre pedee jarapataarã audua p'anù mãik'aapa Ak'õrepa jarapi bùk'a pedeedai k'ãyaara, ãchi k'îsiadeepa pedeepata. Jõdee mãpema p'aareerãpa ne–inaa Tachi Ak'õre–it'ee awara bùdap'edaa net'aa jîp'aak'a iru p'anù mãik'aapa pia jarateeda–e p'anù Tachi Ak'õre leyde jara bù. 5 Ma p'uurudepemaarã poro waibùarãpa mãgá eperãarã k'achia iru p'anù mîda ãchi jua ek'ari, Jõmaarã Ak'õre Waibùapa ichi eperãarãmaa ne–inaa k'achia ook'aa. Ewari chaa irua ãra pia ak'ù bapari ne–inaa pia oopari perã. Mamîda mãpema k'achia beerãpa k'îra nejasia wêe ne–inaa k'achia oopata.6 Jõmaarã Ak'õre Waibùapa jara bù: “Mùa awara–awaraa eujãdepemaarã jõpiji mùde ijãadak'aa p'anadap'edaa perã. Ãra p'uuru murallapa t'ùak'au bee torre aùde nâbù paara jõpiji. Ãra calle jã mãu–idaa papiji. Ma p'uurude eperãarã waa unudak'aa. 7 Mùa mãga ook'ãri, k'îsiaji mù p'uuru, Jerusalendepemaarãpa mãga unudap'eda, mùde waya ijãa p'aneedai mãik'aapa mùa jara bùk'a waya oo k'inia p'aneedai. Mãgá mùa ãra p'uuru auk'a jõpi–e pak'aji. Mamîda ma t'êepai ãrapa ne–inaa k'achia at'ãri oo jõnajida. 8 Maperã nàtù ewari cherude mùa parã, awaraa mùde ijãa k'iniadak'aa beerã ome ùmùateeit'ee perã. Ma ewate mùa chip'e atait'ee jõmaweda ijãa k'iniadak'aa beerã parãk'a; awara–awaraa eujãdepemaarã mãik'aapa awara–awaraa rey jua ek'ari p'anapataarã. Mãpai mãùrãmaa mù k'îrau unupiit'ee. Ma ewate mùa mãùrã jõmaweda, jõpiit'ee t'ùpùtaupa p'ûajara p'ooda paa jõparik'a.
Eperãarã waya Jõmaarã Ak'õre Waibùade ijãapataadait'ee
9 Mamîda chi p'aneedait'eerãmaa mùa pedee pia jarapiit'ee. Mãgá awaraa ak'õre waibùa apataarãmaa ùt'aa t'âdai k'ãyaara, mùmaa aupai t'ãripa ùt'aa t'âpataadait'ee. Maapai ãra jõmaweda mùa jara bùk'a t'ãri auk'a oodait'ee. 10 Cus eujãdepema to bee waawiipa mù p'uuru pidaarã, chi k'achia beerãpa mamaa ateedap'edaarã waya chedait'ee mùmaa ùt'aa t'âpataadait'ee mãik'aapa primicia teedait'ee. 11 Maapai parã Jerusalendepemaarã, mù p'uuru pidaarã, waa k'îra nejasia p'anada–e pait'ee mùa audua beerã jõpiit'ee perã. Waa audua nipadak'aa pait'ee mùa ee awara bùdade. 12 Mamîda mùa jõpi–e pait'ee audua–ee beerã, ãrapa mùmaa chupùria iididait'ee perã. 13 Ma israelitaarã chok'ai p'aneedait'eerãpa ne–inaa k'achia maarepida ooda–e pait'ee. Seewa jarada–e pait'ee mãik'aapa apida k'ûrada–e pait'ee. P'ûajara paraamãi ovejaarã k'ãiwee p'anapatak'a, mãga pùk'a ãra k'ãiwee p'anapataadait'ee, apida waaweeda–ee.
Sofoniapa pedee pia jarada
14 ¡Sión p'uurudepemaarã, awaraa israelitaarã ome, o–îapa k'arítù mãik'aapa bíatù! ¡Parã Jerusalén p'uurudepemaarã, t'ãripa bíatù 15 ewari cherude Tachi Ak'õrepa parã waa miapi–e pait'ee perã! ¡Maapai irua parã k'îra unuamaa iru p'anapataarã jõmaweda jërek'ooit'ee! Maapai Jõmaarã Ak'õre Waibùa, israelitaarã rey, parã t'ãide bapariit'ee. Mapa apidaapa parã waa p'erapida–e pait'ee. 16 Ma ewari Jerusalendepemaarãpa pedee para bait'ee: “Siondepemaarã, p'eranáatù mãik'aapa juatau wêe p'ananáatù 17 Jõmaarã Ak'õre Waibùa, parã Ak'õre Waibùa, parã t'ãide bapari perã. Sõcharraarãpa ãchi k'îra unuamaa iru p'anapataarã p'oyaapatak'a, mãga pùk'a irua parã k'îra unuamaa iru p'anapataarã p'oyaapiit'ee parãmaa. Iru o–îa bait'ee parã ome mãik'aapa parã audú k'inia iru bapariit'ee eperãarã chiwidi pùk'a p'aneedamerã. Irua parã mãga unuk'ãri, t'ãri o–îapa iru k'ariit'ee eperãarã fiestade k'aripatak'a. 18 Jõmaarã Ak'õre Waibùapa jara bù: “Ewari cherude mùa parã k'aripait'ee waa k'achiade baainaadamerã mãik'aapa k'îsia jõnanaadamerã, mùa parã waya miapii jîak'aapa. 19 Maapai mùata parã k'aripa atait'ee k'achia beerã jua ek'ariipa. Mùa parã t'ãidepema juatau wêe beerã k'aripait'ee mãik'aapa awaraa eujãde ateedap'edaa beerã waya aneeit'ee. Mãùrã waa k'îra nejasia p'aneeda–e pait'ee. Ma k'ãyaara jõmaarãpa ãra t'o iru p'anapataadait'ee. 20 Wãara, parã taide mùa parã auk'aarã awaraa eujãdee ateedap'edaa chip'e atait'ee mãik'aapa aneeit'ee. Mãgá mùa parã waya pia ak'ù bak'ãri mãik'aapa p'arat'ara papik'ãri, awaraa p'uuru pidaarã jõmaarãpa parã t'o p'anadait'ee. Mù, Jõmaarã Ak'õre Waibùapa mãga jara bùda” aji.