MAL 4

1 Taarã–e nùde ma ewate mùa awara bùda pait'ee. Horno edajãde audú wãsia baparik'a ma ewate mãga pùk'a pait'ee. Jõmaweda audua beerã, ne–inaa k'achia oopataarã ome paa jõdait'ee p'ûajara p'ooda hornode paa jõparik'a. Mãgeerã apida bee–e pait'ee; jõmaweda jõdait'ee p'ûajara k'ùmù, chi k'arra paara jõmaweda hornode paa jõparik'a. Mù, Jõmaarã Ak'õre Waibùapa mãga jara bù.2 Mamîda parã, mù waaweepataarãmaa ne–inaa k'achia p'asa–e pait'ee. Ma k'ãyaara ak'õrejîru uchiak'ãri, pi–ia jêraparik'a, mãga pùk'a ma ewate parãta k'achia wêe p'aneedait'ee. Eperã k'ayaa bù ichi k'ayaadeepa uchiaparik'a jùpa beek'ãri, mãga pùk'a ma ewate parã jõmaweda k'achiadeepa uchiadait'ee. Mãga p'aneedak'ãri, audú o–îa p'anadait'ee p'ak'a chak'eerã o–îa p'anapatak'a ãchi jâadap'edaamãiipa uchiadak'ãri.3 Ma ewate mùa ma jõmaweda ook'ãri, parã ma k'achia beerã paa jõdap'edaa ârù t'ùadait'ee. Ùt'aripemaarã Ak'õre Waibàapata mãga jara bù.

4 ’K'irãpátù mù mimiapari Moisepa ley jarada. K'irãpátù mùa irumaa jarada Horeb eede irua israelitaarã jõmaarãmaa jarateemerã, mãgá ãrapa mùa jaradak'a oopataadamerã.

5 ’Ma ewate audú k'achia bait'ee mù ewari waibùa ewate perã. Ma ewate pai naaweda, mùa mù pedee jarapari Elías pëiit'ee. 6 Irua ak'õreerãmaa k'îsiapiit'ee ãchi t'ãri auk'a bùdamerã ãchi warrarã ome mãik'aapa warrarãmaa k'îsiapiit'ee ãchi t'ãri auk'a bùdamerã ãchi ak'õreerã ome. Mãgá mùa na eujãdepemaarã jõmaarã jõpi che–e pait'ee.”