Jerusalén p'uuru awaraa eujãdepemaarã juadeepa uchiait'ee
12
1 Jõmaarã Ak'õre Waibùapa na pedee jara pëiji Israelde. Jõmaarã Ak'õre Waibùa, chi pajã, na p'ek'au eujã oodapa mãik'aapa eperãarã chok'ai p'anapidapa nãga jara bù: 2 “Mùa Jerusalén p'uuru copa vinopa ipuru bàk'apù papiit'ee. Ma copade bù vinopa, pia jarait'eera mù k'îraupa, Judá eujã ik'aawa bee eujãdepemaarã piu pùk'a p'aneedait'ee mãik'aapa mãùrãpa Jerusalén p'uuru awaraa p'uuru Judá eujãde bee paara wap'ùra atadait'ee p'oyaadai jîak'aapa.3 Mãga p'asak'ãri, mùa Jerusalén p'uuru mãu chùk'ùa bàk'apù papiit'ee. Eperã ichi juadoopa mãu chùk'ùa p'oyaa jira–e paik'a, mãga pùk'a ma awara–awaraa eujãdepemaarãpa Jerusalén p'uuru p'oyaada–e pai. T'ùmùùpa awara–awaraa eujãdepemaarã cheruta pùjida mãga oodait'ee apidaapa ooda–e pai mùa ãra chaachaa ne–inaa k'achia ooit'ee perã. Eperãpa mãu chùk'ùa jirarupa p'ua oodaik'ajik'a, mãga pùk'a mùa mãùrãmaa ne–inaa k'achia ooit'ee. 4 Mãùrãpa mãgá Jerusalén p'uurudee chõode chedak'ãri, mùa ãra caballoorã audú p'erapiit'ee ãra ârù wãpataarã k'îra k'awa–ee beerãk'a p'aneerutamaa. Mamîda mùa Judá eujãdepemaarã ak'ù bapariit'ee. Maapai mùa ma awara–awaraa eujãdepemaarã Jerusalendee chõode chedap'edaarã caballoorã jõmaweda tau p'ãriupiit'ee. 5 Mãga unudak'ãri, ma Judá eujãdepemaarã poro waibùarãpa k'îsiadait'ee: ‘Jõmaarã Ak'õre Waibùata Jerusalén p'uurude bapari. Iru júapata ma p'uurudepemaarã choomaa p'anù.’
6 Ma ewate mùa ma Judá eujãdepemaarã poro waibùarã papiit'ee eperãpa t'ùpùtau braserode bùp'eda, t'ùpù k'îra p'e bù k'ait'a atabëidak'a. T'ùpùtaupa net'a tau k'õrajâma p'e atadap'edaa paa jõ wãparik'a, mãga pùk'a ma Judá eujãdepemaarãpa ma awara–awaraa eujãdepemaarã chõode chedap'edaarã peek'oo wãdait'ee. Judá eujã juaraarepema ide p'anapataarã, juabi eere ide p'anapataarã paara jõ wãdait'ee. Mãga nùde Jerusalén p'uurude p'anapataarã k'ãiwee p'anapataadait'ee ãchi p'uurude. 7 Naapùara mù, Jõmaarã Ak'õre Waibùapa Judá eujãdepema soldaorãmaa p'oyaapiit'ee, awaraa eujãdepemaarãpa rey Daviddeepa uchiadap'edaarã Jerusalende p'anapataarã ma Judadeepa uchiadap'edaarã k'ãyaara audupùara t'o p'ananaadamerã. 8 Maapai mùa Jerusalén p'uurudepemaarã jâapariit'ee. Mãga nùde mãpema juatau wêe beerã sõcharra papiit'ee rey David sõcharra badak'a mãik'aapa ãchi poro waibùarã, Daviddeepa uchiadap'edaarãpa ãra ak'ùpataadait'ee mù angelpa ak'ù bak'ajik'a.
9 Maapai mùa ma awara–awaraa eujãdepemaarã Jerusalén p'uurude chõo chedap'edaarã k'iniipi wãit'ee. 10 Jõdee Daviddeepa uchiadap'edaarã Jerusalén p'uurude p'anapataarãmaa mùa t'ãri awara papiit'ee ãrapa awaraarã chupùria k'awaadamerã mãik'aapa mùmaa ùt'aa t'â p'anadamerã mùa ãrapa p'ek'au k'achia oopatap'edaa ãyaa bùmerã. Mùmaa ak'ùdait'ee ãrapa eperã miasupa sudap'edaa k'aurepa mãik'aapa iru–it'ee t'ãri p'uapa jêedait'ee eperã warra apai iru bù piuk'ãri, iru–it'ee t'ãri p'uapa jêeparik'a. 11 Maapai Jerusalén p'uurude t'ãri p'uapa audú jêedait'ee chonaarãweda audú jêedap'edaak'a Hadad Rimonde Meguido eujã jewedaade. 12 T'ãri p'uapa Judá eujãdepemaarã nãgá chi–ùadait'ee; awara–awaraa ëreerãdeepa uchiadap'edaarã, ãchi wêraarã awara. Daviddeepa uchiadap'edaarã chi–ùadait'ee ãchi p'anapata chaa, ãchi wêraarã awara; Natandeepa uchiadap'edaarã chi–ùadait'ee ãchi p'anapata chaa, ãchi wêraarã awara; 13 Levideepa uchiadap'edaarã chi–ùadait'ee ãchi p'anapata chaa, ãchi wêraarã awara; Simideepa uchiadap'edaarã chi–ùadait'ee ãchi p'anapata chaa, ãchi wêraarã awara; 14 mãik'aapa mãùrãdeepa uchiadap'edaarã awaraarã chi–ùadait'ee ãchi p'anapata chaa, ãchi wêraarã awara.