11
1 ¡Líbano eujãdepemaarã, t'ùpùtau urua nâbù parã eujãde t'îupítù parã cedro pak'uru jêra bù paa jõmerã!2 ¡Pino pak'uru, jèetù ma cedro pak'uru pi–ia bee tudú baaidap'edaa perã mãik'aapa paa jõdap'edaa perã! ¡Basán eujãdepema encina pak'uru, t'ãri p'uapa bíatù ma cedro pak'uru jêra bù jõdachi perã!
3 Ûrítù ovejaarã ak'ùpataarã jêepi ãchi p'ûajara pi–ia badamãi jõdachi perã. Ûrítù león biapi ãchi mirudap'edaamãi Jordán to–ide bada siruade jõdachi perã.
Ovejaarã ak'ùpataarã omé
4 Mù Ak'õre Waibùapa mùmaa nãga jaraji: “Ovejaarã ateedait'ee oveja peepatamaa ak'ùparíiji. 5 Ma ovejaarã neto atadak'ãri, chipariirã chupùria k'awa–ee ãra pëipata peepatamaa. Jõdee mãùrãmaa neto pëidap'edaarã k'îsia p'ua p'anadai k'ãyaara ãchi ovejaarã mãgá pëidap'edaa perã peek'oodamerã, ãchia jarapata: “¡Gracias Tachi Ak'õre, ârá mù p'arat'ara bait'ee perã!” Ma ovejaarã ak'ùpataarã paara k'îsia p'ua p'aneedak'aa ovejaarã ãchi jua ek'ari p'anadap'edaa mãgá peepatamaa pëidak'ãri. 6 Mãgá mùa pida Judá eujãdepemaarã waa chupùria k'awa–e pait'ee. Ãra ichiak'au bùit'ee ãchi pitapai chõopataadamerã mãik'aapa ãchi poro waibùarã jua ek'ari k'achia p'anapataadamerã. Mãùrãpa Judá eujã jõ wãdak'ãri, mùa eperã apida k'aripa–e pait'ee ãra juadeepa.
7 Mãgá ovejaarã netopataarãpa ma ovejaarã ateedai naaweda ãra peepatamaa, mãùrã jua ek'ari mù ma ovejaarã ak'ùpari beeji. Mãùmisa ovejaarã ak'ùpari bastón omé ataji. Aba t'â bùji “Pia Ak'ùpari”; chi apema t'â bùji “Araa p'anapata”. Mãgá mùa ma ovejaarã ak'ùmaa beeji. 8 Mãga nùde atane abaade mùa ovejaarã ak'ùpataarã õpee jërek'ooji ãra mimiadeepa. Ma k'aurepa ãra mù ome waa chooda–e paji mãik'aapa mù k'îra unuamaa iru p'aneejida.
9 Mãpai ãramaa mùa mãgaji: “¡Mãgara mùa ma ovejaarã waa ak'ù–e pait'ee! ¡Ma ovejaarã ak'ùpari wêe p'anùde piudaruta pùrã, piudait'ee; atuadaruta pùrã, atuadait'ee; ãchi pitapai jõdaruta pùrã, jõdait'eeda!” aji.
10 Maap'eda mùa mùchi ovejaarã ak'ùpari bastón “Pia Ak'ùpari” apariida k'õrat'aaji ak'ùpiit'ee mùa pacto ooda israelitaarã ome jõ baji. 11 Ma ewateweda ma pacto jõ beeji mãik'aapa ma ovejaarã netopataarãpa mùa ooda unudak'ãri, k'awaajida Jõmaarã Ak'õre Waibàapata mùmaa mãga oopi baji. 12 Mãpai ãramaa mùa mãgaji: “Parãpa k'inia p'anù pùrã, mùmaa p'áatù mù mimiada pari. K'iniada–e p'anù pùrã, p'aanaadapáde” aji. Mãpai ãrapa mù mimiada ewari juasiadap'eda, mùmaa treinta p'arat'a tau p'aajida.
13 Ma t'êepai Jõmaarã Ak'õre Waibùapa mùmaa mãgaji: “Ma p'arat'a ma–ãri pù, mù mimiaparimaa p'aadap'edaa bùnapáde aji, mù tedepema p'arat'a ùapatamãi.” Mùa mãga ooji. Ma treinta p'arat'a tau bùnaji Tachi Ak'õre tedepema p'arat'a ùapatamãi. 14 Maap'eda mùa chi apema ovejaarã ak'ùpari bastón “Araa p'anapata” apariida k'õrat'aaji ak'ùpiit'ee Judá eujãdepemaarã waa araa p'anapataada–e pait'ee awaraa israelitaarã ome.
15 Mãpai Jõmaarã Ak'õre Waibùapa mùmaa mãgaji: “Ârá mùa k'inia bù pù ovejaarã ak'ùparik'a waya pamerã; mamîda ovejaarã ak'ùpari k'achia bùk'a. Naawedapemak'a ovejaarã ak'ùpataarã net'aa anipapata anipaipia bù. 16 Mùa k'inia bù pù mãga pamerã ovejaarã ak'ùpari k'achia bùit'ee perã na eujãdepemaarã ak'ùpariimerã. Mãgùpa ovejaarã ichi jua ek'ari bee pia ak'ù–e pait'ee. Ãra k'aripa–e pait'ee piu wãdak'ãri; jùrù–e pait'ee o atua wãdak'ãri; jùpa–e pait'ee t'uda iru p'anadak'ãri; netawa–e pait'ee juatau wêe p'aneedak'ãri. Mãgá ãra k'aripai k'ãyaara, ma ovejaarã ak'ùpari k'achia bùpa ãra t'ãidepema poreera beerã peeit'ee k'oit'ee mãik'aapa ãra p'isii paara êt'a atait'ee. 17 ¡Aai, mùa ma ovejaarã ak'ùpari k'achiade baaipiit'ee mùa iru ma mimiade bùji mîda. Mãgá k'achiade baaipiit'ee irua ovejaarã atabaibëipari perã! ¡Maperã jura chõo nâbùde espada iru jua ârù baaiit'ee mãik'aapa iru juaraarepema tau êepiit'ee! ¡Mãgá iru jua k'achia bù; tau aba p'ãriu bù beeit'eeda!” aji.