Jõmaarã Ak'õre Waibùapa ichi eperãarã k'aripait'ee
10
1 Jõmaarã Ak'õre Waibàapata jâarara t'ãmaa bee oopari, pa baaipipari mãik'aapa k'oi waibùa pëipari parãpa ne–uudap'edaa warimerã mãik'aapa pia chaumerã. Mapa parã año chiwidide t'îu wãdak'ãri, irumaa iidítù k'oi pëimerã pãchi eujãde. 2 Ne–inaa juapa ooda pãchi tede iru p'anùùrãmaa iidináatù maarepida p'oyaa jaradak'aa p'anadairã mãik'aapa ne–inaa p'asait'ee bù jarapataarã apataarãmaa iidináatù ãchia k'ãimok'araa pùk'a bùde unudap'edaa apata seewa perã. Ãrapa jara p'anùde ijãaruta pùrã, parã t'ãri o–îa p'anadak'aa pait'ee. Mãgeerãpa jara p'anùde ijãapata k'aurepa eperãarã pariatua nipapata oveja o atua beerãk'a, ak'ùpari wêe.3 Maperã Jõmaarã Ak'õre Waibùapa jara bù: “Mù audú k'îrau bù mù p'uuru pidaarã ak'ùpataarã ome. Ãra poro waibùarã k'achia ooit'eeda” a bù. Jõmaarã Ak'õre Waibùapa Judadeepa uchiadap'edaarã pia ak'ù bapariit'ee ãra ichi ovejaarãk'a perã. Irua ãra jura chõopata caballo ùmùk'îraaråk'apù papiit'ee chõo k'awaa p'aneedamerã.
4 Ãradeepa poro waibùarã juataura beerã uchiadait'ee. Te oopataarãpa mãu pipùara bùpaták'apù p'anadait'ee; te ne–edee estacák'apù p'anadait'ee mãik'aapa jura chõopata ematrùmák'apù p'anadait'ee. Ãradeepa poro waibùarã jõmaweda uchiadait'ee. 5 Ãra chik'aripa p'anapataadait'ee perã soldaorã sõcharra beerãk'a p'aneedait'ee mãik'aapa eperãarãpa calle jãdepema yooro ârù t'ùadak'ãri, piarsîpatak'a, mãga pùk'a ãrapa ãra k'îra unuamaa iru p'anapataarã p'oyaadait'ee. Mãga oodak'ãri, mãùrãdepema caballode wãpataarã k'îra nejasia papidait'ee.
6 Jõmaarã Ak'õre Waibùapa nãga jara bù: “Mùa Judadeepa uchiadap'edaarã juataura papiit'ee mãik'aapa Josedeepa uchiadap'edaarã k'aripa atait'ee ãra k'îra unuamaa iru p'anapataarã juadeepa. Mùa ma jõmaarã aneeit'ee ãchi eujãde waya p'anapataadamerã mùa ãra chupùria k'awaapari perã. Waya p'anapataadait'ee mùa ãra yiaraa iru ba–e pak'ajik'a. Mù, ãchi Ak'õre Waibùapa ûripariit'ee ãrapa ùt'aa iidipata.
7 Mùa Efraindeepa uchiadap'edaarã eujãdepemaarã sõcharra papiit'ee soldaorã sõcharra beerãk'a p'aneedamerã. Mãga pak'ãri, ãra t'ãri o–îa p'anadait'ee eperã t'ãri o–îadaiparik'a vino tok'ãri. Ma awara ãchi warrarãpa ãra mãgá unudak'ãri, auk'a t'ãri o–îa p'aneedait'ee. ¡Mù, ãchi Ak'õre Waibùapa ãra–it'ee oopari k'aurepa, mãgá ãra jõmaweda t'ãri o–îa p'anadait'ee!
8 Mùa ãra t'âit'ee ãra p'anapatamãiipa uchiadamerã mãik'aapa mù ome chip'edaidamerã. Mãga ooit'ee ãra awaraa eujãdepemaarã juadeepa k'aripa k'inia bairã. Mãgá ãra waya chok'ara p'anadait'ee chonaarãwedapemaarãk'a.
9 Mùa ãra awara–awaraa eujãdee jîchoopiji mîda, mama t'ùmà bee eujãde p'anùde, mù k'irãpadait'ee mãik'aapa ãchi warrarã mama t'odait'eerãmaa jarateedait'ee mùde ijãapataadamerã. T'êepai ãra ãchi eujãdee chedait'ee ma warrarã ome. 10 Egipto eujãdeepa mãik'aapa Asiria eujãdeepa mùa ãra chepiit'ee ãchi eujãdee. Ãra audú chok'ara p'anadait'ee perã, ãra eujãde awara mùa ãra p'anapiit'ee Galaad eujãde, Líbano eujãde paara. 11 Maapai ãra uchiadait'ee ãra k'achiade p'anapatap'edaadeepa Egipto pidaarã jua ek'ari mãik'aapa ma p'usak'a bee p'oyaadait'ee. Nilo to nãpùa bùmãi p'oo wãit'ee. Mùa Asiria pidaarã audua–ee papiit'ee mãik'aapa Egipto eujãdepemaarã juatau wêe papiit'ee. 12 Mùa mù eperãarã juataura papiit'ee ãra mù ode nipapataadamerã mãik'aapa mùa oopi bùk'a oopataadamerã. Mù, Jõmaarã Ak'õre Waibùapa mãga jara bùda” aji.