Jõmaarã Ak'õre Waibùapa ooit'ee bù jarada
8
1 Mãpai Jõmaarã Ak'õre Waibùapa mùmaa mãgaji: 2 Mù, Jõmaarã Ak'õre Waibùapa nãga jara bù. Ak'õrepa ichi k'au jiwaaparik'a, mãga pùk'a mùa Sión p'uurudepemaarã jiwaapari. Mapa mù k'îrau bù ãra k'îra unuamaa iru p'anapataarã ome. 3 Mù waya banait'ee mù ee awara bùda Sionde. Bapariit'ee Jerusalén p'uurude. Mùa mãga ook'ãri, Jerusalén p'uuru t'âjarapataadait'ee Jõmaarã Ak'õre Waibùade ijãapataarã p'uuru mãik'aapa Sión t'âjarapataadait'ee Ee awara bùda Jõmaarã Ak'õre Waibùa–it'ee. 4 Maapai ma p'uurudepema plaza beede chonaarã, chõtrãarã ome bastón panau waya k'ãiwee su–ak'ù p'anapataadait'ee 5 mãik'aapa warrarã, wêra k'aurã ome ma plaza beede jemenepataadait'ee. 6 Mù p'uuru pidaarã ârapema ewari p'anapataarãpa ijãada–e p'anù mîda mãga p'asai, mùa jaradak'a p'asait'ee mù, Jõmaarã Ak'õre Waibùapa mãga p'asapiit'ee perã. 7 Ûrítù. Mùa mùchi p'uuru pidaarã k'aripait'ee oriente eerepema eujãdepemaarã juadeepa mãik'aapa occidente eerepema eujãdepemaarã juadeepa. 8 Ãra aneeit'ee Jerusalende nama p'anapataadamerã. Mùa mãga ook'ãri, ãra mùchi eperãarã pait'ee; jõdee mù ãra Ak'õre Waibùa pait'ee. Ãra p'anapataadait'ee mùa k'inia bùk'a mãik'aapa mùa ãra ome ichita ooit'ee mùa jara bùk'a.”9 Jõmaarã Ak'õre Waibùapa nãga jara bù: “Parãpa na pedee auk'a ûrimaa p'anù mù pedee jarapataarãpa jaradap'edaak'a mù p'uuru pidaarãpa mù tedepema basa oo p'aneedak'ãri: ‘¡Sõcharra p'anapatáatù!’ 10 Ma mimia oo p'aneedai naaweda, mãga jarapachida eperãarã ãchi ne–animalaarã ome ãchi ne–uude audú mimiapachida mîda, ma ne–uudap'edaadepema ewada–e pada perã. Ma awara ãra p'oyaa k'ãiwee p'anadak'aa paji ãra k'îra unuamaa iru p'anapatap'edaarãpa ãra ichiak'au bùdak'aa padap'edaa perã mãik'aapa mùa ãra chõopida perã ãchi pitapai. 11 Mamîda ârá mùa mãga oo–e pait'ee mù p'uuru pidaarã awaraa eujãdeepa namaa chedait'eerã ome. Mù, Jõmaarã Ak'õre Waibùapa mãga jara bù. 12 Ãra k'aripait'ee k'ãiwee ne–uupataadamerã. Ãrapa uva k'arra jau/uudak'ãri, pia chaudait'ee. Pajãdeepa sereno baai cheit'ee ãra ne–uu ârù pia chau beemerã. Mùa ãra, mù p'uuru pidaarã awaraa eujãdeepa chedait'eerã mãgá pia oopariit'ee. 13 Naaweda awaraa eujãdepemaarãpa parã Judá eujãdepemaarã, awaraa israelitaarã ome ek'ariara unujida mãik'aapa parã ãpùte pedee k'achia pedeepachida. Mamîda mùa parã k'aripapariit'ee mãik'aapa pia ak'ù bapariit'ee awaraa eujãdepemaarãpa parã t'o iru p'anapataadamerã. Mapa ¡waaweenáatù! ¡Waawee p'anadai k'ãyaara, sõcharra p'anapatáatù!”
14 Jõmaarã Ak'õre Waibùapa nãga jara bù: “Mùa parã chonaarã miapiji ãrapa mù k'îraupidap'edaa perã. Ooji ãra ome mùa k'îsia iru badak'a ooit'ee. 15 Jõdee ârá parã Jerusalendepemaarã, awaraa Judá eujãdepemaarã ome mùa ne–inaa pia ooit'ee. Mapa waaweenáatù. 16 Parãpa ichita nãga oodaipia bù: Awaraarãmaa wãara pedeeta aupai jarátù mãik'aapa charraarãpa eperãarã nepùra ak'ùdak'ãri, mùa k'inia bùk'a ak'ùpatáatù ãra k'ãiwee p'anapataadamerã. 17 K'îsianáatù awaraarãmaa ne–inaa k'achia oodait'ee mãik'aapa seewa jaranáatù awaraarã k'achiade baaipidait'ee mùa ma ne–inaa k'achia eperãarãpa oopata k'îra unuamaa iru bapari perã. Mù, Jõmaarã Ak'õre Waibùapa mãga jara bù.”
18 Mãpai Jõmaarã Ak'õre Waibùapa mùmaa mãgaji: 19 Parãpa ewari awara bùdap'edaa nek'oda–ee ùt'aa t'âpataadait'ee atane k'îmariide, joisomaade, sietede, diezde ma–it'ee waa awara bùda–e pait'ee. Ma k'ãyaara ma ewari Judadepemaarã fiesta o–îa oodaipia bù. Mamîda k'irãpátù k'îra jîp'a, k'ãiwee p'anapataadamerã.”
20 Mãpai Jõmaarã Ak'õre Waibùapa mùmaa mãgaji: “Eperãarã chok'ara p'uuru awara–awaraadepemaarã at'ãri Jerusalendee chedait'ee. 21 Mãga p'asak'ãri, p'uuru abaadepemaarãpa awaraa p'uurudepemaarãmaa jaradait'ee: ‘¡Wãdáma Jõmaarã Ak'õre Waibùa jùrùde irumaa iididait'ee perã tachi pia oopariimerã! ¡Tai jida wãdait'eepù!’ 22 Maapai p'uuru pidaarã chok'ara eujã awara–awaraadepemaarã chedait'ee Jerusalendee Jõmaarã Ak'õre Waibùa jùrùde mãik'aapa irumaa iidide irua ãra pia oopariimerã. 23 Maapai diez awaraa eujãdepemaarã pedee awara–awaraa pedeepataarãpa judío aba p'aru jâ bù jita atarutade, jaradait'ee: ‘¡Parã ome wã k'inia p'anùda adait'ee, ûripata perã Tachi Ak'õre parã ome bapari!’ ”