Seewata Tachi Ak'õre–it'ee nek'oda–ee ùt'aa t'âpata
7
1 Persiadepema rey Darío año k'îmari rey bùde quisleu apatap'edaa atane nuevede ewari k'îmariide Jõmaarã Ak'õre Waibùapa ichi pedee k'awapiji ichi pedee jarapari Zacariamaa. 2 Maapai Betel p'uurudepemaarãpa eperãarã Sarézer mãik'aapa Reguen Mélec ichi ome nipapataarã ome Jerusalendee pëijida Jõmaarã Ak'õre Waibùamaa iididamerã irua ãra pia ak'ùmerã. 3 Mama p'anùde Tachi Ak'õre pedee jarapataarãmaa mãik'aapa p'aareerã Jõmaarã Ak'õre Waibùa tede mimiapatap'edaarãmaa nãga iidijida: “¿Año chaa atane joisomaade tai chi–ùadaipia bùk'ã mãik'aapa nek'oda–ee ùt'aa t'âpataadaipia bùk'ã ajida, taipa at'ãri oopatak'a?”4 Mãpai Jõmaarã Ak'õre Waibùapa mùmaa mãgaji: 5 “Na eujãdepema p'uuru pidaarã jõmaarãmaa mãik'aapa p'aareerãmaa nãga jaráji mù k'ap'ùa pari: ‘Setenta año wãyaarude atane joisomaade, atane sietede paara parã nek'oda–ee ùt'aa t'â p'anadak'ãri mãik'aapa chi–ùadak'ãri, mù–it'ee mãga ooda–e paji. 6 ¿Parãpa nek'odak'ãri mãik'aapa ne–inaa todak'ãri, pãchi–it'ee mãga oopata–ek'ã? Mãga oopachida ichiaba ma setenta año wãyaarude nek'oda–ee ùt'aa t'âdak'ãri mãik'aapa chi–ùadak'ãri. Pãchi–it'ee aupai mãga oopachidada’ aji. 7 Mãpai mùa ãramaa mãgaji: ‘Chonaarãweda Jõmaarã Ak'õre Waibùapa ma pedee auk'a jara pëiji ichi pedee jarapataarã k'ap'ùa pari. Maapai Jerusalén p'uurude eperãarã chok'ara p'anapachida mãik'aapa mãùrã, ma p'uuru k'ait'a beede p'anapatap'edaarã, Néguev eujãde p'anapatap'edaarã, eujã jewedaade p'anapatap'edaarã paara k'ãiwee, chõoda–ee p'anapachida. ¿Mãga–ek'ã? aji.
Ak'õre Waibùapa jara bùk'a ooda–e p'anadap'edaarã awaraa eujãdee ateedap'edaa
8 Mãpai Jõmaarã Ak'õre Waibùapa Zacariamaa mãgaji: 9 Mù, Jõmaarã Ak'õre Waibùapa nãga jara bù. Parãpa pãchi auk'aarãpa oopatak'a ak'ùdak'ãri jaradait'ee mù leyde jara bùk'a oopata wa mãga–e, mãga óotù mùa k'inia bùk'a. T'ãri pia p'anapatáatù ãra ome mãik'aapa ãra chupùria k'awáatù. 10 Ne–inaa k'achia oonáatù p'êtrãarãmaa, ak'õre wêe beerãmaa, awaraa eujãdepemaarãmaa wa chupùria beerãmaa. K'îsianáatù ne–inaa k'achia oodait'ee awaraarãmaa.” 11 Ak'õre Waibùapa ichita mãga jarapipachi ichi pedee jarapataarãmaa. Mamîda israelitaarãpa oodak'aa paji irua jaradak'a. Iru pedee ûridaamaa p'anapachida mãik'aapa k'ùùrù k'isua beerãk'a p'anapachida. 12 Mãu chaaree baparik'a, mãga pùk'a ãra t'ãri chaaree p'anapachida. Chonaarãweda Jõmaarã Ak'õre Waibùapa ichi ley mãik'aapa ichia eperãarãmaa oopi k'inia bù jarateeji mîda ichi pedee jarapataarãmaa, ãrapa ma pedee irua Jaure jarapidak'a jaradak'ãri, ma israelitaarãpa ûri k'iniadak'aa paji.
Mapa Jõmaarã Ak'õre Waibùa ãra ome k'îraudachi 13 mãik'aapa mãgaji: “Mùa ma eperãarãmaa t'âk'ãri, ãrapa mù pedee ûridaamaa p'anapatap'edaak'a, mùa jida ãra pedee ûriamaa bapachi mùmaa ùt'aa t'âdak'ãri. 14 Mãga nùde mùa ãra ome ooji nãumiapa net'aa ome ooparik'a. Ãra t'ùmà jîchoopiji awaraa eujãdee; ãrapa k'awada–e bada eujãdee. Maapai ãra eujãde eperãarã p'anadak'aa paji eujã pania wêe bùk'a pada perã. ¡Aù naaweda ãra eujã pi–ia baji mîda, ãra k'aurepa eujã jõpidak'a beeji!”