Davidpa chi warra Salomón rey bùda
28
1 Maap'eda Davidpa israelitaarã poro waibùarã jõmaarã t'â pëiji chedamerã Jerusalendee. T'â pëiji ëreerã chaadepema poro waibùarã; rey jâapataarã poro waibùarã; soldaorã milmil mãik'aapa ciencien poro waibùarã; rey net'aa pia mãik'aapa eujã ak'ùpataarã poro waibùarã; rey ne–animalaarã ak'ùpataarã poro waibùarã; rey warrarã ak'ùpataarã; eunucoorãa rey palaciode mimiapatap'edaarã; chõo k'awaa p'anadap'edaarã mãik'aapa sõcharra p'anadap'edaarã.2 Ma jõmaweda David k'îrapite pachedak'ãri, ãra taide iru bainâ beeji mãik'aapa mãgaji: “Ûrítù mùchi auk'aarã Judadeepa uchiadap'edaarã mãik'aapa na p'uuru pidaarã jõma mù jua ek'ari p'anùùrã. Mùa te oopiit'ee paji Tachi Ak'õre aùde bapariimerã mãik'aapa ichi bùùrù âi pùk'amerã ichi baaltek'a bù ârù. Ma baaltek'a bù k'aurepa israelitaarãpa k'irãpadait'ee irua ãra ome pacto ooda. 3 Mamîda Tachi Ak'õrepa mùmaa mãgaji: ‘Pùa mù–it'ee te oo–e pait'eeda aji, pù chõoyaa bapari perã mãik'aapa eperãarã chok'ara peedoo perã.’
4 Mãga jaraji mîda, tachi israelitaarã Ak'õre Waibùapa mùchi te pidaarãdepema mù jùrùt'eraji, israelitaarã rey ichita pamerã. Iruata Judadeepa uchiadap'edaarã jùrùt'eraji apema Israeldeepa uchiadap'edaarã ãra jua ek'ari p'anapataadamerã. Maap'eda mùchi te pidaarã jùrùt'eraji. Mãpai mù âpemaarã ak'ùp'eda, mù jùrùt'eraji israelitaarã rey pamerã. 5 Ârá Tachi Waibùapa mùmaa warrarã chok'ara oopiji mîda, ichia mù warra Salomón jùrùt'eraji ichi jua ek'ari israelitaarã mù pari rey pamerã. 6 Tachi Waibùapa mùmaa ichiaba nãga jaraji: ‘Pù warra Salomonpa mù te ooit'ee chi atriob ome. Mùa iru jùrùt'eraji mù warra pamerã. Jõdee mù iru ak'õre pait'ee. 7 Irua israelitaarã ichita ak'ù bapariit'ee, ooru pùrã mù leyde jara bùk'a mãik'aapa mùa jara bùk'a, nãgaweda pùa oomaa bùk'a.
8 ‘Ârá parã israelitaarã k'îrapite mãik'aapa Tachi Ak'õre, tachi pedee ûripari, k'îrapite mùa nãga jara bù: Jùràtù Ne–inaa jõmaweda oopataadait'ee Tachi Ak'õre, parã Ak'õre Waibùapa jara bùk'a. Mãga ooruta pùrã, parã, parãdeepa uchiadait'eerã paara na eujã pia bùde ichita p'anapataadait'ee.
9 ‘Warra Salomón, k'awáaji pùchi ak'õre Ak'õre Waibùa mãik'aapa t'ãripa ne–inaa jõmaweda ooparíiji irua oopi bùk'a. Jõmaarã Ak'õre Waibùapa eperãarã t'ãri unu bù mãik'aapa tachia t'ãride k'îsiapata k'awa bù. Pùa jùrùru pùrã ooit'ee irua oopi bùk'a, irua pù k'aripait'eepù. Mamîda irude ijãa amaadaru pùrã, irua pù ichita yiaraa iru bait'ee. 10 Pia k'îsíaji Tachi Waibùapa pù jùrùt'erada perã iru te oomerã. Iru aùde bapariit'ee. Maperã t'ãripa ma mimia oopáde” aji.
11 Ma t'êepai Davidpa p'ãda dibujo ome teeji chi warra Salomonmaa. Made jaraji sãga oodaipia bù Tachi Ak'õre te; chi pórtico; chi te jãdepema cuarto; chi taawapema cuarto k'aipee bee; net'aa pi–ia ùapata cuarto; edupùara bù cuarto awara bùda Tachi Ak'õre–it'ee paara. Ma cuartode p'aareerã poro waibùapa iidipariit'ee Tachi Ak'õrepa israelitaarãpa p'ek'au k'achia oopata awara bùmerã. 12 Ma p'ãdade Davidpa ne–inaa jõma ak'ùpiji ichia aù naaweda k'îsia iru badak'a. K'îsiapiji patio oodamerã mãik'aapa aù ik'aawa cuarto chok'ara oodamerã Tachi Ak'õre tedepema net'aa pi–ia ùa bùdait'ee mãik'aapa Tachi Ak'õre–it'ee eperãarãpa net'aa pi–ia tee chedap'edaa ùa bùdait'ee. 13 Ma awara Davidpa jaraji sãga Levideepa uchiadap'edaarã awara–awaraa bùdait'ee: ûk'uru p'aareerã mimia oopataadamerã, ûk'uru Tachi Ak'õre te ak'ùpataadamerã. Ichiaba jaraji sãgá mimiadait'ee mãik'aapa k'ãare net'aa ma tede iru p'anadaipia bù ma mimia oodait'ee.
14 Ichiaba Davidpa nêe, p'arat'a ome teeji aùdee net'aa oodamerã Tachi Ak'õre te–it'ee. 15 Madee oodait'ee lámpara bùpata chi lámpara ome. Irua k'îsia iru badak'a Davidpa jaraji jõmasaa libra nêe mãik'aapa p'arat'a bùdaipia bù ma net'aa chaachaade. 16 Ichiaba jaraji jõmasaa nêe mãik'aapa p'arat'a bùdaipia bù mesa jõmaade, pan Tachi Ak'õre–it'ee erk'a bùpata mesa awara bùdap'edaade paara. 17 Ichiaba nêe teeji aùdee tenedor, taza mãik'aapa jarra oodamerã. Ichiaba nêe teeji aùdee copa oodamerã: nêe waibùara copa waibùa bee–it'ee, mak'ùara waibùa–e copa ma–ãriara bee–it'ee. P'arat'a jida teeji aùdee copa oodamerã: p'arat'a waibùa chi copa waibùara bee–it'ee; mak'ùara waibùa–e chi ma–ãriara bee–it'ee. 18 Nêe maarepida nejarra wêe teeji aùdee altar k'aipee oodamerã, ma ârù ne–inaa t'ûa bapari Tachi Ak'õre–it'ee paapataadamerã. Ichiaba p'ãda teeji k'awaadamerã sãga oodaipia bù Tachi Ak'õre baaltek'a bù chi t'ap'a ome. Ma p'ãdade jaraji ma baaltek'a bù t'ap'ade ùt'aripemaarãk'a oodamerã bainâ p'anù mãik'aapa k'îrapa edaa chi t'ap'amaa ak'ù p'anù; chi isia eratù jõnùpa ma t'ap'a wãk'adamerã. Ma baaltek'a bù k'aurepa israelitaarãpa k'irãpadait'ee Tachi Ak'õrepa pacto ooda ãra ome.
19 Davidpa mãgaji: “Na jõma p'ãda Tachi Ak'õrepa mùmaa k'awaapijida aji, mùa k'awamerã sãga iru te bait'ee.
20 Mãpai ma p'ãda Salomonmaa teep'eda, Davidpa mãgaji:
—¡Sõcharra baparíiji mãik'aapa t'ãride chóoji Tachi Ak'õrede ijãa bùde! ¡Na mimia t'ãripa óoji! ¡K'îsianáaji mãik'aapa waaweenáaji, Tachi Ak'õre, mù Ak'õre Waibùa, pù ome bapariit'ee perã! ¡Irua pù atabaibëi–e pait'eepù! Pù k'aripait'ee na mimia ooru misa, iru te oo auparumaa. 21 Na p'ãdade jara bù sãga p'aareerã mãik'aapa Levideepa uchiadap'edaarã turniadait'ee mimiadak'ãri Tachi Ak'õre tede. Ãra awaraa eperãarã chok'ara ome pari mimiadait'ee. Mãùrãpa ne–inaa k'îra t'ãdoo oo k'awaapata. Ma awara israelitaarã poro waibùarãpa ne–inaa jõmaade pùa jara bùk'a oo k'inia p'anùda aji.