Awaraa poro waibùarã Davidpa awara bùda
27
1 Davidpa israelitaarã ùmùk'îraarã awara bùji ûk'uru ãra ëreerãdepemaarã poro waibùarã pamerã mãik'aapa ûk'uru soldaorã milmil maa–e pùrã ciencien poro waibùarã pamerã. Mãgùùrã rey jua ek'ari turnia mimiapachida atane aba–abaa israelitaarã soldaorã ome. Soldaorã awara–awaraa bùjida veinticuatro mil, veinticuatro mil awara p'aneedamerã.2 Davidpa awara bùji soldaorã veinticuatro mil chip'edaidap'edaa soldaorã mimia oopataadamerã naapùara atanede año chaa. Mãùrã poro waibùa Zabdiel warra Yasobeán paji. 3 Mãgà Faredeepa uchiada paji. Iru ma naapùara atanedepema soldaorã poro waibùarã jõmaweda poro waibùa paji.
4 Atane omeedepema soldaorã veinticuatro mil chip'edaidap'edaarã ajojita t'âjarapatap'edaa Doday jua ek'ari baji. Miclot ma soldaorã poro waibùa paji.
5 Atane õpeedepema soldaorã veinticuatro mil chip'edaidap'edaarã poro waibùa p'aareerã poro waibùa Joyadá warra Benaías paji. 6 Ma Benaías ichiaba soldaorã treinta sõcharrara p'anadap'edaarã poro waibùa paji. Mapa chi warra Amisabad bùji ma atane õpeedepema soldaorã poro waibùa pamerã.
7 Atane k'îmaridepema soldaorã veinticuatro mil chip'edaidap'edaarã poro waibùa Joab âpema Asael paji. Asael piuk'ãri, chi warra Zebadías mãùrã poro waibùa paji.
8 Atane joisomaadepema soldaorã veinticuatro mil chip'edaidap'edaarã poro waibùa Izradeepa uchiada Samut paji.
9 Atane seidepema soldaorã veinticuatro mil chip'edaidap'edaarã poro waibùa Tecoa p'uurudepema Iqués warra Irá paji.
10 Atane sietedepema soldaorã veinticuatro mil chip'edaidap'edaarã poro waibùa pelonita t'âjarapatap'edaa Heles paji. Mãgà Efraindeepa uchiada paji.
11 Atane ochodepema soldaorã veinticuatro mil chip'edaidap'edaarã poro waibùa Jusadepema Sibecay paji. Mãgà zeraitaarãdeepa uchiada paji.
12 Atane nuevedepema soldaorã veinticuatro mil chip'edaidap'edaarã poro waibùa Anatot p'uurudepema Abiezer paji. Mãgà Benjamindeepa uchiada paji.
13 Atane diezdepema soldaorã veinticuatro mil chip'edaidap'edaarã poro waibùa Netofa p'uurudepema Maray paji. Mãgà zeraitaarãdeepa uchiada paji.
14 Atane oncedepema soldaorã veinticuatro mil chip'edaidap'edaarã poro waibùa Piratondepema Benaías paji. Mãgà Efraindeepa uchiada paji.
15 Atane docedepema soldaorã veinticuatro mil chip'edaidap'edaarã poro waibùa Netofa p'uurudepema Jelday paji. Mãgà Otonieldeepa uchiada paji.
Israeldeepa uchiadap'edaarã poro waibùarã
16 Israeldeepa uchiadap'edaarã poro waibùarã nãgùùrã paji: Rubendeepa uchiadap'edaarã poro waibùa Zicrí warra Eliezer paji. Simeondeepa uchiadap'edaarã poro waibùa Macá warra Sefatías paji. 17 Levideepa uchiadap'edaarã poro waibùa Quemuel warra Jasabías paji. Aarondeepa uchiadap'edaarã poro waibùa Sadoc paji. 18 Judadeepa uchiadap'edaarã poro waibùa David âpema Eliú paji. Isacardeepa uchiadap'edaarã poro waibùa Micael warra Omrí paji. 19 Zabulondeepa uchiadap'edaarã poro waibùa Abdías warra Ismaías paji. Neftalideepa uchiadap'edaarã poro waibùa Azriel warra Jerimot paji. 20 Efraindeepa uchiadap'edaarã poro waibùa Azazías warra Oseas paji. Manasedeepa uchiadap'edaarã esa–auk'a p'anadap'edaarã poro waibùa Pedaías warra Joel paji. 21 Apema Manasedeepa uchiadap'edaarã esa–auk'a Galaad eujãde p'anapatap'edaarã poro waibùa Zacarías warra Idó paji. Benjamindeepa uchiadap'edaarã poro waibùa Abner warra Jasiel paji. 22 Dandeepa uchiadap'edaarã poro waibùa Jeroán warra Azarel paji. Mãùrã paji Israeldeepa uchiadap'edaarã poro waibùarã.
23 Israelitaarã juasiadak'ãri, Davidpa juasiapi–e paji eperãarã veinte año edaa OJO iru beerã, Tachi Ak'õrepa jarada perã israelitaarã îwapiit'ee chok'ara uchiarutamaa, lucero pajãde nâbùk'a. 24 Sarvia warra Joabpa ma juasiadap'edaa mimia oo beeji. Mamîda aupa–e paji, ma juasia wãdap'edaa k'aurepa Tachi Ak'õre israelitaarã ome k'îraudaida perã. Mapa ma eperãarã chok'ara juasiadap'edaa p'ã bùda–e paji Davidpa ne–inaa oopariida ome.
Rey ak'ùpatap'edaarã
25 Adiel warra Azmávet rey net'aa chok'ara pia iru bada ak'ùpari paji. Jõdee Uzías warra Jonatanpa ak'ùpachi ne–uu ewadap'edaa rey–it'ee ùapatamãi. Ma net'a tau ewadap'edaa ùapata te paraaji p'uurude, p'uuru k'aipeede, p'uurudeepa taawa mãik'aapa soldaorã p'anapatap'edaamãi.
26 Ne–uupataarã poro waibùa Quelub warra Ezrí paji. 27 Uvajõ k'ãi ak'ùpataarã poro waibùa Ramat p'uurudepema Simí paji. Vino ùapataarã poro waibùa Sefandepema Zabdí paji. 28 Olivo pak'uru mãik'aapa sicómoroa pak'uru eujã jewedaade jêra bee ak'ùpataarã poro waibùa Guederdepema Baal Janán paji. Olivodeepa aceite ju atadap'edaa ùapatap'edaamãi ak'ùpataarã poro waibùa Joás paji. 29 Sarón eujãde p'anadap'edaa p'ak'aarã ak'ùpataarã poro waibùa Sarondepema Sitray paji. Jõdee eujã jewedaade p'anadap'edaa p'ak'aarã ak'ùpataarã poro waibùa Adlay warra Safat paji. 30 Camelloorã ak'ùpataarã poro waibùa Ismaeldeepa uchiada paji; t'âjarapatap'edaa Obil. Burroorã ak'ùpataarã poro waibùa Meronotdepema Jehedías paji. 31 Ovejaarã ak'ùpataarã poro waibùa agareno t'âjarapatap'edaa Jaziz paji. Ma poro waibùarã jõmaarãpa rey David net'aa ak'ùpachida.
32 David chîapa Jonatán k'îsia k'awaa bapachi mãik'aapa rey Davidpa oopariida p'ãpachi. Mapa Davidpa iru bùji rey ûraapariimerã. Jacmoní warra Jehielpa rey warrarã ak'ùpachi. 33 Ajitofel ichiaba rey ûraapari paji. Rey Davidpa ichiaba ûraa iidipachi arquita t'âjarapatap'edaa Husaymaa. 34 Ajitofel David ik'aawaapa uchiak'ãri, Benaías warra Joyadá rey ûraapari beeji. Maap'eda Abiatar ichiaba rey ûraapari beeji. Joab rey David jua ek'ari soldaorã jõmaarã poro waibùa paji.