2 Crónicas
Israelitaarã reyrãpa oopatap'edaa mãik'aapa p'anapatap'edaa
Salomonpa Tachi Ak'õremaa iidida k'îsia k'awaapimerã
(1 Reyes 3.3-15; 10.26-29)
1
1 David warra, Salomón rey waibùara pa wãji mãik'aapa Tachi Ak'õrepa k'aripap'eda, waibùara beeji awaraa reyrã k'ãyaara.2 Maapai irua israelitaarã jõmaweda t'â pëiji: soldaorã milmil mãik'aapa ciencien poro waibùarã, charraarã poro waibùarã, mãik'aapa Israeldeepa uchiadap'edaa ëreerã poro waibùarã. 3 Ma eperãarã jõma araa chip'edaidak'ãri, wãjida Tachi Ak'õre ome unupata tedee, Gabaón eujãde ee nok'ode badamãi. Ma Tachi Ak'õre ome unupata te Tachi Ak'õre mimiapari Moisepa eujã pania wêe bùde ooji. 4 Aù naaweda Davidpa Tachi Ak'õre baaltek'a bù Quiriat Yearín p'uurudeepa aneeji Jerusalén p'uurude mãik'aapa te ne–edee oodade bùji. 5 Mamîda chi altar Uri warra mãik'aapa Jur ãichak'e Besalelpa ooda broncedee Gabaonde baji Tachi Ak'õre ome unupata te k'îrapite. Maperã Salomón ma chip'edaidap'edaarã jõmaarã ome mama wãjida Tachi Waibùamaa ne–inaa iidide. 6 Mama panadak'ãri, Salomón eede ùt'aa wãji mãik'aapa Tachi Ak'õre ome unupata te t'ùak'au badade t'îup'eda, iru k'îrapite ma altar broncedee oodade iru–it'ee ne–animalaarã mil paa jõpiji. 7 Ma ewate p'ãrik'ua, Tachi Ak'õrepa ichi Salomonmaa unupiji mãik'aapa mãgaji:
—¿Awaraa ne–inaa k'ãyaara k'ãata audú k'inia bùma? Mùa pùmaa teeit'eeda aji.
8 Salomonpa p'anauji:
—Pùa mù ak'õre David audú chupùria k'awaaji mãik'aapa iru pari mù rey papiji. 9 Ârá Tachi Waibùa, Jõmaarã Ak'õre Waibùa, óoji pùa mù ak'õre Davidmaa jaradak'a pùa mù rey papida perã mãik'aapa na p'uuru pidaarã chok'ara yooro p'orak'a nâbù mù jua ek'ari bùda perã. 10 Mùmaa k'îsia k'awaara papíji mãik'aapa ne–inaa k'îra t'ãdoo k'awapíji, mãgá mùa na p'uuru pidaarã pia ak'ùpariimerã pùa k'inia bùk'a. Ãra nãgá chok'ara p'anùta, ¿sãgá mùa ãra pia ak'ù bayama aji, mùchi k'îradoopa?
11 Tachi Ak'õrepa Salomonmaa mãgaji:
—Mùa pù rey bùji mîda, pùa p'arat'a waibùa mãik'aapa net'aa pia iidi–e bù mãik'aapa iidi–e bù mùa pù jõmaarã reyrã k'ãyaara waibùara papimerã. Ma awara pùa iidi–e bù pù k'îra unuamaa iru p'anapataarã piudamerã mãik'aapa iidi–e bù taarã chok'ai bapariit'ee. Ma k'ãyaara iidi bù k'îsia k'awaa bait'ee mãik'aapa ne–inaa k'îra t'ãdoo k'awaait'ee, mãgá pù jua ek'ari p'anapataarã pia ak'ùpariit'ee. 12 Maperã mùa ooit'ee pùa iididak'a. Pù k'îsia k'awaapiit'ee mãik'aapa ne–inaa k'îra t'ãdoo k'awaapiit'ee. Mamîda pùa audua–ee mãgá iidida perã, mùa ichiaba p'arat'a waibùa mãik'aapa net'aa pia k'îra t'ãdoo pùmaa teeit'ee mãik'aapa pù awaraa reyrã k'ãyaara waibùara papiit'ee. Pù rey pai naaweda, awaraa reyrãpa mãgá p'arat'a, net'aa waibùa iru p'anada–e paji mãik'aapa reyrã pù t'êe cherutaarãpa paara mãgá iru p'anada–e pait'ee.
13 Ma t'êepai Salomón Tachi Ak'õre ome unupata tedeepa uchiap'eda mãik'aapa ma Gabaón eujãdepema eedeepa edaa chep'eda, Jerusalendee cheji. Iru rey bùde mamãik'aapa Israel eujã ak'ùpachi.
Salomonpa carreta caballoorã ome neto atapariida
14 Maapai Salomonpa caballoorã mãik'aapa caballopa jidiupata carreta chok'ara p'e ata wãpachi. Mãgee chõopata carreta mil cuatrocientos iru baji, caballoorã doce mil ome. Mãgee carreta ûk'uru chi caballoorã ome ùapiji carreta ùapata p'uurude; ûk'uru ùapiji Jerusalende ichi palacio k'ait'a. 15 Jerusalén p'uurude Salomonpa audú p'arat'a iru baji. Mãu chok'ara badak'a ma eujãde, mãga pùk'a p'arat'a waibùa paraaji. Cedro pak'uru waibùa ichiaba paraaji. Cho–k'ara paraaji higuera pak'uru cho–k'ara paraak'a eujã jewedaade. 16 Salomonpa ichi ek'ari beerãmaa caballo neto atapiji aneedamerã Egiptodeepa mãik'aapa Ciliciadeepa, chi caballoorã rey–it'ee netopataarãpa mama netopachida perã. 17 Egiptodepema carreta aba pari seiscientos p'arat'a tau p'aajida. Jõdee caballo aba pari ciento cincuenta p'arat'a tau p'aajida. Maapai hititaarã reyrãpa mãik'aapa siriorã reyrãpa carreta caballoorã ome netopachida rey Salomón jua ek'ari beerã juak'aawa.