29
1 T'êepai rey Davidpa mãgaji arii p'anadap'edaarã jõmaarãmaa: “Tachi Ak'õrepa mù warra Salomón jùrùt'eraji ichi te oopimerã. Mamîda mù warra at'ãri k'ûtrãa bù na mimia waibùa ooit'ee. Eperã–it'ee palacio jîp'aa oopi–e pait'ee. Jõmaarã Ak'õre Waibùa–it'ee te oopiit'ee. 2 T'ãripa mù mimiapari mù warra k'aripait'ee, irua mù Ak'õre Waibùa te pia oopimerã. Ma–it'ee p'e iru bù nêe ne–inaa nêedee ooda–it'ee; p'arat'a ne–inaa p'arat'adee ooda–it'ee; bronce ne–inaa broncedee ooda–it'ee; hierro ne–inaa hierrodee ooda–it'ee mãik'aapa pak'uru ne–inaa pak'urudee ooda–it'ee, ma ne–inaa chaachaa pia oodamerã. Ichiaba iru bù mãu pi–ia bee ónice; mãu pi–ia k'îra t'ãdoo ùrrada; awaraa mãu pi–ia k'îra t'ãdoo bee; marmol waibùa paara. 3 Ma awara mëredepema nêe, p'arat'a ome teeit'ee Tachi Ak'õre te–it'ee, mùa iru te k'inia iru bapari perã. 4 Mëredepema nêe pi–iara Ofir eujãdeepa atada cien mil kilo mãik'aapa p'arat'a pi–iara doscientos treinta mil kilo teeit'ee mãgùpa chi tedepema pared p'êedamerã. 5 Ma awara mëredepema nêe, p'arat'a ome teeit'ee ne–inaa nêedee mãik'aapa p'arat'adee oo k'awaa beerãpa aùdee net'aa oodamerã bùdait'ee Tachi Ak'õre tede. Parãpárama, ¿k'aipa auk'a net'aa tee k'inia bùma aji, Tachi Ak'õre te–it'ee?”6 Mãpai ëreerã chaa poro waibùarã, Israeldeepa uchiadap'edaarã poro waibùarã, soldaorã milmil mãik'aapa ciencien poro waibùarã mãik'aapa rey jua ek'ari mimiapataarã poro waibùarã; ma jõmaarãpa net'aa tee chejida Tachi Ak'õre te–it'ee. 7 Ma–it'ee teejida ciento sesenta y cinco mil kilo nêe waa diez mil p'arat'a tau nêedee ooda. Ichiaba trescientos treinta mil kilo p'arat'a, perá seiscientos mil kilo bronce mãik'aapa tres millón trescientos mil kilo hierro teejida.
8 Ma awara chi mãu pi–ia iru p'anadap'edaarãpa ãchi mãu pi–ia tee chejida ùa bùdamerã Tachi Ak'õre tede. Gersondeepa uchiada Jehiel bùjida ma net'aa pi–ia jâapariimerã.
9 Ma jõma t'ãripa Tachi Ak'õremaa teedap'edaa perã, eperãarã o–îa p'aneejida. Rey David auk'a t'ãri o–îa beeji.
10 Mãpai jõmaarã taide Davidpa Tachi Ak'õremaa na pedee pia jaraji: “Jõmaarã Ak'õre Waibùa, pù jõmaarã k'ãyaara t'ãri piara bapari perã, pù tai chonaa Israel Ak'õre Waibùa ichita pait'ee. 11 Pù jõmaarã k'ãyaara waibùara bù. Awaraa pùk'a wê–e. Ne–inaa jõmaweda pù jua ek'ari nâbù. Pù eujã k'îra wãree bapari. Ne–inaa jõmaweda ùt'aripema, na eujãdepema paara përé, pùa ooda perã. Jõmaarã pù jua ek'ari p'anapata pù jõmaarã rey perã. 12 Pùa eperã waibùa papipari awaraarã k'îrapite mãik'aapa pùa eperã p'arat'a paraa papipari. Pùa ne–inaa jõmaweda ak'ùpari jõma pù jua ek'ari bapari perã. Pù juapa ne–inaa k'îra t'ãdoo oopari ak'ùpiit'ee pù jõmaarã k'ãyaara waibùara bù mãik'aapa pùa eperãarã juataura, t'ãri o–îapipari. 13 Tachi Ak'õre, pù mãga bapari perã, t'ãri o–îapa taipa pùmaa pedee pia jarapata mãik'aapa gracias jarapata, pù t'â jõmaarã t'â k'ãyaara pipùara bairã. 14 ¿Mù, k'aima pùa mù mãik'aapa mù jua ek'ari p'anùùrã nãgá pia ak'ùmerã? Pùa mùmaa teeda k'aurepa mùa na net'aa jõma pùmaa teei. Ma awara pùa na p'uuru pidaarã k'aripada perã, ãrapa ichiaba net'aa waibùa pùmaa teedai. 15 Pù k'îrapite tai awaraa eujãdepemaaråk'apù p'anù; tai chonaarã p'anadap'edaak'a. Taarã–e na p'ek'au eujãde chok'ai p'anapata. Maap'eda wêpadaipata tachi jaure wêpadaiparik'a ak'õrejîru jêra–e pak'ãri. Pù wêe, ¿k'ãare ne–inaa piata nùdaima?
16 “Aai, Tachi Ak'õre, Tachi Waibùa, na net'aa aneedap'edaa përé, pù juadeepa iru p'anù perã. Tee chejida pù–it'ee te pia oo k'inia p'anù perã. Mãgá mama jõmaarãpa pù t'â, jõmaarã t'â k'ãyaara pipùara bù, t'o iru p'anadait'ee. 17 Mùchi Ak'õre Waibùa, pùa eperãarã k'îsia t'ãride iru bù k'awaapari mãik'aapa pùa k'inia iru bapari chi t'ãripa pùa jara bùk'a oopataarã. Maperã t'ãripa mùa na net'aa jõma pùmaa tee cheji. Mù o–îa bù pù p'uuru pidaarã, nama p'anùùrãpa auk'a t'ãripa pù–it'ee net'aa pia tee chedap'edaa perã. 18 ¡Pùta tai chonaarã Abraham, Isaac mãik'aapa Israel Ak'õre Waibùa! Na p'uuru pidaarã k'aripáji ichita nãgá t'ãripa tee k'inia p'anapataadamerã mãik'aapa t'ãripa pù nãgá k'inia iru p'anapataadamerã. 19 Ichiaba mù warra Salomón k'aripáji t'ãripa irua oo k'inia bapariimerã pùa jara bùk'a mãik'aapa pù leyde jara bùk'a. Ichiaba iru k'aripáji pù te pia oomerã mù pari. Ma–it'ee na net'aa jõmaweda pùmaa p'e tee chejida” aji.
20 Ma t'êepai Davidpa arii p'anadap'edaarãmaa nãga jaraji: “Ârá t'ãri o–îa ùt'aa t'âpatáatù pãchi Ak'õre Waibùamaa.”
Mãga oojida. Bedabaijida rey k'îrapite mãik'aapa Tachi Ak'õre k'îrapite. Mãpai t'ãri o–îa ùt'aa t'âjida ãchi chonaarã Ak'õre Waibùamaa. 21 Aù norema ne–animalaarã aneejida peedap'eda, Tachi Ak'õre–it'ee paapidait'ee mãik'aapa awaraa ne–animalaarã aneejida Tachi Ak'õre–it'ee paa jõpidait'ee israelitaarã jõmaarã pari. Tachi Ak'õre–it'ee p'ak'a ùmùk'îraarã mil, oveja ùmùk'îraarã mil mãik'aapa oveja chak'eerã mil paajida. Ma awara israelitaarãpa vino mãik'aapa ne–inaa awaraa chok'ara tee chejida Tachi Ak'õre–it'ee. 22 Ma ewate o–îapa Tachi Ak'õre k'îrapite nek'ojida mãik'aapa ne–inaa tojida. Ma t'êepai waya jarajida David warra, Salomón, k'inia p'anajida israelitaarã rey pamerã. Tachi Ak'õre k'îrapite iru awara bùjida ma–it'ee. Ichiaba Sadoc porode aceite awara bùdap'edaa weejida irua p'aareerã mimia oopariimerã. 23 Mãgá Salomón israelitaarã rey beeji Tachi Ak'õre jua ek'ari, chi ak'õre David pari. Rey pia baji. Maperã israelitaarã jõmaarãpa oo k'inia p'anapachida irua jaradak'a. 24 Ma awara israelitaarã poro waibùarãpa, soldaorã poro waibùarãpa mãik'aapa rey David warrarãpa Salomón k'aripa k'inia p'anapachida. 25 Tachi Ak'õrepa Salomón mãgá eperãarã poro waibùa papiji Israel pidaarã t'ãide. Jõmaarãpa iru t'o iru p'anapachida. Ichiaba Tachi Ak'õrepa Salomón p'arat'ara, net'aara iru bapiji. Maperã awaraa Israeldepema reyrã k'ãyaara pipùara bapachi.
26-27 Cuarenta año wãyaarude Isaía warra, David israelitaarã rey paji. Siete año wãyaarude Hebrón p'uurude bapachi. Apema treinta y tres año wãyaarude Jerusalén p'uurude bapachi. 28 Audú chonaa pak'ãri, David jai–idaaji. P'arat'ara baji mãik'aapa jõmaarãpa iru t'o iru p'anapachida. Iru warra Salomón rey beeji iru pari.
29 Awaraa ne–inaa rey Davidpa ooda ichi rey beedak'ãriipa jai–idaarumaa p'ã bù Tachi Ak'õrepa unupida jarapari Samuelpa libro p'ãdade, Tachi Ak'õre pedee jarapari Natanpa p'ãdade, mãik'aapa Tachi Ak'õrepa unupida jarapari Gadpa p'ãdade. 30 Made p'ã bù Davidmaa p'asada, israelitaarãmaa p'asada, awaraa eujãdepemaarã ãra ik'aawa p'anadap'edaarãmaa p'asada paara iru rey bùde.