2 Reyes
Israelitaarã reyrãpa oopatap'edaa
Rey Ocozías piuda
1
1 Rey Acab piuda t'êepai Moab eujãdepemaarã uchiajida israelitaarã jua ek'ariipa. 2 Maapai rey Ocozías Samaria p'uurude bapachi. Mãga nùde tudú padachi palacio ùt'ùpùara piso bada ventanadeepa mãik'aapa p'ua oodachi. Mapa Ocoziapa ichi ek'ari beerã pëiji iididamerã Ecrón p'uurudepemaarã ak'õre waibùa apatap'edaa Baal Zebubmaa ãchi rey jùpai wa mãga–e. 3 Mamîda Tachi Ak'õrepa k'inia–e baji mãgá awaraamaa iididamerã. Mapa ángel pëiji Tisbedepema Ak'õre pedee jarapari Eliamaa. Nãga jara pëiji: “K'îrachuude wåji Israel eujãdepema reypa pëidaarã ome. Iidíji sãap'eda wãrutá Ecrondepema ak'õre waibùa apata, Baal Zebubmaa ne–inaa iidide. Ma awara nãga iidíji: ¿Israelitaarã Ak'õre Waibùa wêe p'anùk'ã irumaa reypa iidida iidinadamerã? 4 Ichiaba jaráji mù pari ãrapa Ocoziamaa nãga jaranadamerã: ‘Pù piuit'ee perã pùchi camadeepa p'irabai–e pait'ee.’ ”Eliapa ooji Tachi Ak'õrepa jaradak'a. 5 Ma pëidaarã ãpùtee wãdak'ãri rey Ocozías badamaa, irua iidiji:
—¿Sãap'eda ãpùtee chejidama? aji.
6 P'anaujida:
—Eperã tai ome k'îrachuude uchiaji mãik'aapa jaraji ãpùtee wãdamerã pùmaa nãgà pedee jarade. “Tachi Ak'õre Waibùapa nãga jara bùda aji: ‘¿Ak'õre Waibùa wê–e p'anùk'ã aji, Israel eujãde pùa iidi pëimerã Ecrondepema Baal Zebubmaa? Pùa mãga ooda perã pùchi camadeepa p'irabai–e pait'ee. Ma k'ãyaara pù piuit'ee.’ ”
7 Mãpai reypa iidiji:
—¿Sãga bajima aji, ma eperã parã ome k'îrachuude uchiada?
Reypa mãgaji:
—¡Mãgà Elías Tisbedepema pajida! aji. 9 Aramata reypa soldaorã cincuenta pëiji ãchi poro waibùa ome Elías jita atade. Panadak'ãri, iru su–ak'ù baji ee nok'ode. Mãga unuk'ãri, ma soldaorã poro waibùapa mãgaji:
—Tachi Ak'õre pedee jarapari apata, ¡reypa jara bù pù edaa chemerã tai ome!
10 Eliapa p'anauji:
—Mù wãara Tachi Ak'õre pedee jarapari pùrã, ¡mãgara ùt'ariipa t'ùpùtau baaiit'ee pù ârù mãik'aapa jã cincuenta soldaorã pù ome che p'anùùrã ârù!
Aramata ùt'ariipa t'ùpùtau baaiji ãchi ârù mãik'aapa ãchi k'iniijida.
11 Mãga k'awa atak'ãri, reypa awaraa soldaorã poro waibùa pëiji awaraa soldaorã cincuenta ome. Mãgùpa auk'a jarade wãji Eliamaa:
—Tachi Ak'õre pedee jarapari apata, ¡reypa jara bù pù aweda edaa chemerã tai ome!
12 Mãpai Eliapa p'anauji:
—Mù wãara Tachi Ak'õre pedee jarapari pùrã, mãgara t'ùpùtau baaiit'ee pù ârù mãik'aapa jã cincuenta soldaorã pù ome che p'anùùrã ârù.
Aramata ùt'ariipa t'ùpùtau baaiji ãchi ârù mãik'aapa k'iniijida.
13 Pëida õpee reypa awaraa soldaorã cincuenta pëiji ãchi poro waibùa ome. Mamîda ma poro waibùa Eliamaa wãp'eda, bedabaidachi iru k'îrapite mãik'aapa nãga chupùria iidiji:
—Ak'õre pedee jarapari, tai chupùria k'awaapáde aji. Tai pù mimiapataarã. 14 Apema soldaorã poro waibùarã omé mãik'aapa ãchi soldaorã jõmaweda ârù t'ùpùtau baaip'eda, k'iniijida. Mamîda mùa pùmaa iidi bù mù chupùria k'awaamerã mãik'aapa piupinaamerã.
15 Mãpai Jõmaarã Ak'õre Waibùa ángel k'ap'ùa pari Eliamaa mãgaji:
—Wåji iru ome. Iru waaweenaapáde aji.
—Tachi Ak'õrepa nãga jara bùda aji: “Pùa eperãarã pëida perã Ecrondepema ak'õre waibùa apata Baal Zebubmaa iidide, Israel eujãde Ak'õre Waibùa wê–e pak'ajik'a, pù p'irabai–e pait'ee pùchi camadeepa piuit'ee perã.”
17 Mãga p'asaji, Eliapa jaradak'a Tachi Ak'õre k'ap'ùa pari. Rey Ocozías piuji. Iru warra wêe bada perã, ichi âpema Jorán rey beeji iru pari. Mãga p'asaji rey Josafat warra ichiaba t'âjarapatap'edaa Jorán año omé rey bùde Judá eujãde.
18 Awaraa ne–inaa ooda Ocoziapa p'ã bù Crónicas librode awaraa Israeldepema reyrãpa ne–inaa oopatap'edaa ome.