Elías ùt'aa wãda
2
1 Tachi Ak'õrepa k'îsia iru baji Elías ùt'aa ateeit'ee nãumiade. Maapai Elías uchiaji Guilgal p'uurudeepa Eliseo ome. 2 Ma wãdade Eliapa Eliseomaa mãgaji:—Nama beepáde aji, Tachi Waibùapa mù pëiru perã Betel p'uurudee.
Mamîda Eliseopa p'anauji:
—Tachi Ak'õre k'îrapite mãik'aapa mùchi t'âde mùa juraa bù pù ik'aawaapa ãyaa wã–e pait'ee.
Mãga beeji. Auk'a wãjida Beteldee. 3 Ma p'uuru k'ait'a panadak'ãri, mãpema Ak'õre pedee jarapataarãpa Eliseo k'îrachuujida. Mãgajida:
—¿Pùa k'awa bùk'ã idi Tachi Ak'õrepa pù jarateepari ãyaa atait'ee?
Eliseopa p'anauji:
—K'awa bù. Mamîda maarepida jaranaadapáde aji.
4 Ma t'êepai Eliapa Eliseomaa mãgaji:
—Nama beepáde aji, Tachi Waibùapa mù pëiru perã Jericó p'uurudee.
Mamîda Eliseopa p'anauji:
—Tachi Ak'õre Waibùa k'îrapite mãik'aapa mùchi t'âde mùa juraa bù pù ik'aawaapa ãyaa wã–e pait'ee.
Mãgá auk'a wãjida Jericodee. 5 Mamîda Jericodepema Tachi Ak'õre pedee jarapataarã Eliseo k'îrachuujida mãik'aapa mãgajida:
—¿Pùa k'awa bùk'ã ajida, idi Tachi Ak'õrepa pù jarateepari ãyaa ateeit'ee?
Eliseopa p'anauji:
—K'awa bùpù. Mamîda maarepida jaranaadapáde aji.
6 Maap'eda Eliapa mãgaji Eliseomaa:
—Nama beepáde aji, Tachi Waibùapa mù pëiru perã Jordán todee.
Mamîda Eliseopa p'anauji:
—Tachi Waibùa k'îrapite mãik'aapa mùchi t'âde mùa juraa bù pù ik'aawaapa ãyaa wã–e pait'ee.
Mãgá auk'a wãjida. 7 Mamîda ma wãdade cincuenta Ak'õre pedee jarapataarã pachejida ãra k'îrapite, t'ùmùùpai. Mãga nùde Elías, Eliseo ome panajida Jordán to ide. 8 Panadak'ãri, Eliapa ichi ârùpema p'aru êrap'eda, pùrabaiji mãik'aapa mãgùpa to jã wùji. Mãga bùde Jordán to t'oodachi mãik'aapa ãchi omé sîajida to p'oo bùde. 9 Sîadap'eda, Eliapa mãgaji Eliseomaa:
—Jarapáde aji, k'ãata k'inia bù mùa oomerã pù–it'ee, mù ãyaa wãi naaweda.
Eliseopa p'anauji:
—K'inia bù pùa Ak'õre Jaure iru bù waa omé mùmaa teemerã.
10 Mãpai Eliapa mãgaji:
—Pùa ne–inaa waibùa iidimaa bù. Mamîda pùa mù unuru pùrã ãyaa wãk'ãri, p'asait'eeda aji, pùa iididak'a. Maa–e pùrã mãga p'asa–e pait'eeda aji.
11 Mãgá ode nidade mãik'aapa pedee jõnùde carreta t'ùpùtaudee ooda ùt'ariipa pacheji caballoorã t'ùpùtaudee ooda jidiupata ome. Mãgùpa Elías atadachi. Wêpadachi nãumiade. 12 Eliseopa mãga unuk'ãri, biaji: “Mù ak'õre, mù ak'õre, ¡pù israelitaarã carreta caballoorãpa jidiupaták'apù baji, tai audú k'aripada perã!
Ma t'êepai Elías waa unu–e paji, Tachi Ak'õrepa iru chok'ai ùt'aa ateeda perã. Mãpai Eliseo ichi ârùpema p'aru êrap'eda, jêt'aaji p'aru omeede.
Eliseo mimia beeda Elías pari
13 Ma t'êepai Eliseopa Elías ârùpema p'aru jâ bada eujãde baaida ataji mãik'aapa ãpùtee wãji Jordán to idee. 14 Aweda Eliseopa to jã wùji ma p'arupa mãik'aapa iidiji: “¿Sãma bùma aji, Elías Ak'õre Waibùa?”
Ma pania wùrude to t'oodachi mãik'aapa Eliseo sîaji to p'oodade. 15 Jericodepema Ak'õre pedee jarapataarã, chi arii p'anadap'edaarãpa mãga unudak'ãri, mãgajida: “¡Tachi Ak'õre Jaure bada Elías ome ârá Eliseo ome baparida!” ajida.
Mãpai ãchi wãjida Eliseo k'îrapite mãik'aapa bedabaidap'eda ãchi tau bùùrù eujãde t'õbairumaa, 16 mãgajida:
—Ak'àji taidepema cincuenta sõcharra p'anùùrã. Tai pù mimiapataarã. Jaráji tai wãdamerã pù jarateepari jùrùde. ¿Tachi Ak'õre Jaurepa iru ateeji–ek'ã ajida, awara ãyaa, ee jêra bùdee wa eujã jewedaadee?
Mamîda Eliseopa p'anauji:
—Mãga–eda aji. Apida wãnaadapáde aji, iru jùrùde.
17 Mamîda edek'a p'anadap'eda, ma cincuenta wãpiji Elías jùrùnadamerã. K'ãima õpee wãyaarude iru jùrù p'anajida, mamîda unuda–e paji. 18 Mãpai ãpùtee chejida Jericó p'uurudee, Eliseopa nù badamaa. Irua ãramaa mãgaji:
—Mùa jarajida aji, wãnaadamerã.
Eliseopa pania k'ùyaa naap'ee papida
19 Maap'eda Jericó p'uurudepemaarãpa Eliseomaa mãgajida:
—Na eujã ak'àji. Namãik'aapa t'ùmà unupari. Mapa na p'uuru bùmãi pia bù. Mamîda nãpema pania k'achia bù mãik'aapa ne–uudak'ãri, t'onok'aada ajida.
20 Mãpai Eliseopa mãgaji:
—Vaso chiwidi t'ã ome aneedapáde aji.
Aneejida. 21 Mãpai Eliseo wãji mama bada pania poátrù uchia bùmaa mãik'aapa ma t'ã aùde p'oji. Mãga oo bù misa, mãgaji:
—Nãga jara bùda aji, Tachi Waibùapa: “Mùa na pania naap'ee papiji. Waa k'ayaadaida–eda aji, na pania todak'ãri mãik'aapa nãgùpa eujãde week'ãri, waa k'achia ba–e pait'ee ne–uudak'ãri.”
22 Maadak'ãriipa ma pania naap'ee beeji, Eliseopa jaradak'a Tachi Ak'õre Jaure k'ap'ùa.
Eliseo oo iru p'anadap'edaa
23 Ma t'êepai Eliseo wãji Betel p'uurudee. Ee ùt'à ode wãde ûk'uru ma p'uurudepema k'ûtrãarãpa iru oo iru p'aneejida. Mãgajida: “Poro epa chùta, ¡ùt'aa wåji! ¡Poro epa chùta, ùt'aa wåji!
24 Mãga ûrik'ãri, Eliseo p'ùrrabaiji ãchi ak'ùit'ee mãik'aapa ãchimaa pedee k'achia jaraji, Tachi Ak'õrepa ãramaa k'achia oomerã. Aramata oso real omé uchiajida pak'uru jêra bùdeepa mãik'aapa ãchidepema cuarenta y dos peek'oojida. 25 Ma t'êepai Eliseo wãji Carmelo eedee. Maap'eda ãpùtee cheji Samaria p'uurudee.