Israel eujãde Jorán rey pada
3
1 Judadepema rey Josafat dieciocho año rey bùde, Acab warra Jorán rey beeji Israelde. Doce año rey baji. Mãga nùde Samaria p'uurude bapachi. 2 Jorapa ne–inaa k'achia oopachi Tachi Ak'õre k'îrapite. Mamîda ne–inaa audú k'achia oo–e paji chi ak'õre Acabpa oodak'a maa–e pùrã chi nawe Jezabelpa oodak'a. Joranpa ãyaa pëiji mãu chi ak'õrepa oopida mãik'aapa awara bùda ãchi ak'õre waibùa Baal apatap'edaa–it'ee. 3 Mãga ooji mîda, irua ne–inaa k'achia oopachi Nabat warra Jeroboanpa oodak'a israelitaarã k'achiade baaipik'ãri.Eliseopa jarada Moabdepemaarã ome chõodamerã
4 Maapai Moabdepema rey Mesapa ovejaarã chok'ara waripiji ichi jua ek'ari beerãmaa. Moabitaarã p'anapatap'edaa perã israelitaarã rey jua ek'ari, irua oveja chak'eerã cien mil, oveja ùmùk'îraarã cien mil ome, chi k'ara t'ùùda–ee, tee pëiji israelitaarã reymaa primiciak'a. 5 Mamîda Israeldepema rey Acab piuk'ãri, ma Moabdepema rey uchia k'inia baji israelitaarã jua ek'ariipa. 6 Mãgá Israeldepema rey Jorán rey beek'ãri, ichi uchiaji Samaria p'uurudeepa Israeldepema soldaorã ak'ùde. 7 Maap'eda ma israelitaarã rey Joranpa nãga jara pëiji Judadepema reymaa: “Moabdepema rey mù jua ek'ariipa uchia k'inia bùda aji. Maperã mù wãit'ee iru ome chõode. ¿Mù ome auk'a wã k'inia bùma? ” aji.
Judadepema reypa p'anauji: “Pù ome wãdait'ee mù, mùchi soldaorã caballoorã ârù wãpataarã paara. 8 Mamîda mùa k'awa k'inia bù chisã ode wãdait'eeda” aji.
Mãpai Joranpa p'anauji: “Edom eujãdepema pania wêe bù eujãde wãyaadait'eeda” aji.
9 Ma t'êepai Israeldepema rey, Judadepema rey, Edomdepema rey ome ãchi soldaorã p'e atadap'eda, wãjida. Mamîda k'ãima siete wãyaarude p'ùrrabai wãdap'edaa perã, pania anipadap'edaa jõdachi. Wê–e paji soldaorã–it'ee, ne–animalaarã–it'ee paara. 10 Mãga k'awaak'ãri, Israeldepema reypa mãgaji:
—“Aai, mãgara, ¿Tachi Ak'õrepa tachi õpee tachi ome nipapataarã aneeji–ek'ã aji, nama moabitaarãpa tachi p'oyaadamerã?
11 Mamîda Judadepema rey Josafatpa iidiji:
—¿Na eujãde Tachi Ak'õre pedee jarapari wê–ek'ã aji, irumaa iidinadamerã?
Israeldepema rey jâaparipa p'anauji:
—Safat warra Eliseo nama k'ait'a bapari. Mãgà Elías k'aripapari pajida aji.
12 Mãpai Judadepema rey Josafatpa mãgaji:
—¿Tachi Ak'õre iru ome bairã irua tachi ûraai–ek'ã? aji.
Aweda ma reyrã õpee wãjida Eliseo ak'ùde. 13 Mamîda Eliseo badamãi panadak'ãri, irua mãgaji Israeldepema reymaa:
—Mù pù eere–eda aji. ¿Sãap'eda mùmaa chejima? aji. Iidinaipia bù pù ak'õreerã ak'õre waibùa pedee jarapata apataarãmaa.
Mãpai ma Israeldepema reypa mãgaji:
—Mãga–eda aji. Mùa k'awa bù Tachi Ak'õre Waibùapa tai nama aneeji baaipiit'ee Moab eujãdepemaarã juade.
14 Mãpai Eliseopa mãgaji:
—Tachi Ak'õre Waibùa, mù chipari k'îrapite mùa juraa bù Judadepema rey Josafat pù ome che–e pada paara, pùa iidi cheda mùa ûri–e pak'aji mãik'aapa pù unuamaa iru bak'aji. Mamîda ichiaba iru nama bù. 15 Mapa arpa chaa k'awaa bù aneedapáde aji.
Aneejida. Ma arpa chaa k'awaa bùpa chaa beek'ãri, Tachi Ak'õre Jaure ba cheji Eliseo ome. 16 Mãpai Eliseopa mãgaji:
—Tachi Ak'õrepa jara bù: “Na eujã jewedaade zanja chok'ara óotù. 17 Nãu p'ua–e pait'ee mîda mãik'aapa k'oi che–e pait'ee mîda, na eujã jewedaade paniara paraait'ee parã jõmaarã, parã ne–animalaarã ome todamerã. 18 Tachi Waibùapa ma ne–inaa mak'ùara chaaree–e ooit'ee parãmaa ak'ùpiit'ee iruta jõmaarã Ak'õre Waibùa. Ma awara irua Moabdepemaarã parã juade baaipiit'ee. 19 Maap'eda parãpa mãùrã p'uuru jõmaweda jõpidait'ee; chi p'uuru waibùara bee, murallapa t'ùak'au bee paara. Mãga oo p'anùde parãpa ãra nejõ bùùrù jõmaweda t'upeedait'ee; ãra pania poátrù uchia bù jõmaweda t'ap'ak'oodait'ee mãik'aapa jõmaweda ãra ne–uu k'ãide mãu chok'ara bat'at'aadait'ee.’
20 Aù norema ne–animalaarã Tachi Ak'õre–it'ee paapata hora, Edom eujã eereepa pania wee beeji Eliseopa jaradak'a. Ma eujã jewedaa ûu beeji paniapa. 21 Mãùmisa Moabdepemaarãpa k'awa atajida ma reyrã õpee cheruta chõode ãchi ome. Mapa soldaorã, k'ûtrãarã, chonaarã paara pëijida nù p'aneedamerã ãchi eujã ide. 22 Tap'eweda p'irabaidak'ãri, unujida ma eujã jewedaa ûu bù paniapa. Mamîda ak'õrejîru ma pania ârù jêra bada perã, ãchia ma pania k'îra p'oree unujida waak'a. 23 Mãga unudak'ãri, mãgajida: “¡Jã waata! ¿Ma reyrã ãchi pitapai chõo para baji–ek'ã mãik'aapa k'iniijida–ek'ã? ¡Moabitaarã, wãdáma ajida, ãchia net'aa p'e atade!”
24 Mamîda ma Moabdepemaarã israelitaarã p'anadap'edaamaa t'îudak'ãri, Israeldepema soldaorã ãchi ârù wãjida mãik'aapa jërek'oojida jãmãik'aapa. T'êe wãdap'eda, peek'oojida. 25 Ma t'êepai ma Moabdepemaarã p'uuru jõ wãjida. Ãra pania poátrù uchia bù t'ap'a wãjida mãik'aapa mãu chok'ara bat'a wãjida ãra ne–uu k'ãide. Ãra nejõ bùùrù paara t'upee wãjida. Maap'eda p'uuru apai beeji, t'âjarapatap'edaa Quir Jaréset. Mamîda jâk'arapa mãu bat'a k'awaa p'anapatap'edaarãpa ma p'uuru ichiaba p'oyaajida.
26 Moabdepema reypa unuk'ãri ichi eere p'anadap'edaarã atua wãda, ichi soldaorã espada panau setecientos p'e ataji mãik'aapa uchiaji chõode ãchi k'îra unuamaa iru p'anadap'edaarã esajîak'a wãyaadai jîak'aapa Edomdepema rey badamãi parumaa. Mamîda p'oyaada–e paji. 27 Mãpai ma Moabdepema reypa ichi warra naapema, ichi pari rey pait'ee pada, ataji mãik'aapa ichi ak'õre waibùa apatap'edaa–it'ee paa peeji ma p'uuru t'ùak'au bada muralla ârù. Mãga unudak'ãri, Moabdepemaarã audú k'îrau p'aneedap'edaa perã, israelitaarã ãpùtee erreujida ãchi eujãdee, waa chõoda–ee.