Ak'õre pedee jarapari Eliseopa ooda aceite ome
4
1 Eliseo Tachi Ak'õre pedee jarapari pak'ãri, awaraa Tachi Ak'õre pedee jarapari p'arat'a paraa bada piuji chi tewe p'aai naaweda. Maperã chi p'arat'a chiparipa ma Tachi Ak'õre pedee jarapari warra omé ata k'inia baji ichi esclavoorã papiit'ee. Mãga k'awa atak'ãri, ma Ak'õre pedee jarapari p'êtrãa Eliseomaa wãji k'aripa iidide. Mãgaji:—Mù ùmùk'îra jai–idaajida aji. Pùa k'awa bù irua Tachi Ak'õre waawee bapachi mãik'aapa oopachi Ak'õrepa oopidak'a. Ârá eperã irua tewe iru bada ome cheji mù warra omé atait'ee ichi esclavo papiit'ee ma tewe pari.
2 Mãga ûrik'ãri, Eliseopa iidiji:
—Mùa ¿k'ãata ooyama aji, pù k'aripait'ee? ¿K'ãata iru bùma aji, pùchi tede? P'aai–ek'ã aji, ma net'aapa.
Ma p'êtrãapa p'anauji:
—Mù pùchi mimiapari. Net'aa wê–eda aji, teeda. Jîp'a aceite ma–ãri chok'ode iru bùda aji.
3 Mãpai Eliseopa mãgaji:
—Wåji pùchi te k'ait'a p'anapataarãmaa mãik'aapa awaraa chok'o prestáji. Chok'ara jùrùipia bù, waa unu–e parumaa. 4 Mãpai pùchi warrarã p'e atap'eda, teeda t'ìutù. Puerta jâap'eda, ma chok'o prestada ipuruk'óoji pùa chok'o iru bada aceitepa mãik'aapa ma chok'o ipuruda awara bùpáde aji.
5 Ma p'êtrãapa mãga ooji. Eliseomaa despediip'eda, ichi tede t'îup'eda chi warrarã ome, puerta jâadachi. Mãpai chok'o ipurumaa beeji. 6 Jõmaweda chok'o chi warrarãpa aneedap'edaa ichia ipuruji. Maap'eda warra abaamaa iidiji:
—Awaraa chok'o aneedapáde aji.
Mamîda chi warrapa p'anauji:
—Waa wê–eda aji.
Aweda ma aceite waa wee–e paji. 7 Ma p'êtrãa wãk'ãri Ak'õre pedee jarapari Eliseomaa jarade, irua mãgaji:
—Aceite netonáji mãik'aapa ma p'arat'apa pù ùmùk'îrapa p'arat'a paraa bada p'áaji. Chi beeda iru bapáde aji, pùchi–it'ee, pùchi warrarã–it'ee.
Eliseopa ooda Sunendepema wêra–it'ee
8 Ewari aba Eliseo wãyaaji Sunén eujãde. Mama wêra p'arat'a paraa bapachi. Ma wêrapa k'awa bada perã Eliseo Tachi Ak'õre pedee jarapari, enenee nâbeeji wãmerã ichi temaa nek'ode. Maap'eda wãyaaru chaa, Eliseo wiibaiji ma wêra temaa nek'ode. 9 Bùù ap'eda, ma wêrapa mãgaji chi ùmùk'îramaa:
—Mùa k'awa bù ma eperã tachimaa wiibaipari Tachi Ak'õrepa awara bùda ichi pedee jaramerã. 10 Mapa cuarto k'aipee oodáma aji, te ùt'aripema terrazade iru aùde k'ãimerã. Cama, mesa, su–ak'ù beepari, lámpara ome ma cuartode bùdai. Mãgá iru na eujãde nipak'ãri, nama beeyada aji.
11 Mãga paji. Ewari aba Eliseo ma wêra tede bak'ãri, chi cuartode jêra beenap'eda, 12 mãgaji chi mimiapari Guiezimaa:
—T'ânapáde aji, na te chipari; ma sunamita pida wêra.
Mãga ooji. Ma wêra Eliseo k'îrapite pak'ãri, Eliseopa ichi mimiaparimaa mãgaji:
13 —Na wêramaa jaráji ichi tachi ome audú t'ãri pia bapari perã, iru–it'ee ne–inaa pia oo k'inia bù. K'inia bù pùrã, iru pari mù pedeei rey ome wa soldaorã poro waibùa ome, ãrapa iru pia ak'ùdamerã.
Mamîda ma wêrapa p'anauji:
—Mù nama k'ãiwee baparida aji, mùchi auk'aarã ome.
14 Mãpai Eliseopa iidiji:
—Mãgara, ¿k'ãata oodayama aji, iru k'aripadait'ee?
Chi mimiapari Guiezipa p'anauji:
—Ichia warra wêe bùda aji, mãik'aapa chi ùmùk'îra chonaa chù.
15 Mãpai Eliseopa chi mimiaparimaa mãgaji:
—T'âpáde aji.
Chi mimiaparipa mãga ooji. Mamîda ma wêra puerta t'aidepai ak'ùnâ ba cheji.
16 Mãpai Eliseopa ma wêramaa mãgaji:
—Año cherude na atane, pùa warra t'op'eda, juade iru bait'eeda aji.
Ma wêrapa p'anauji:
—¡Pù Tachi Ak'õre pedee jarapari bùta, mù k'ûranaapáde aji, mù pùchi mimiapari perã!
17 Mamîda Eliseopa jaradak'a, ma wêra biak'oo beeji mãik'aapa añomaa ùmùk'îra warra t'oji. 18 Wari wãda, wari wãda, ewari aba ma warra wãji chi ak'õre mimia badamaa net'a tau ewa p'anadap'edaarã ome. 19 Mama bùde golpe poro p'iradachi. Mapa chi ak'õremaa mãgaji:
—¡Aai, mù poro, mù poro p'ira nâbùda! aji.
Aramata chi ak'õrepa arii bada mimiaparimaa mãgaji:
—¡Isapai chi nawemaa ateepáde! aji. 20 Mãga ooji. Chi nawemaa ateeji. Ma wêrapa chi warra ichi sinapotede iru baji imat'ùpa parumaa. Mãpai ma warra jai–idaaji. 21 Mãpai ma wêrapa chi warra ateeji Ak'õre pedee jarapari cuartode mãik'aapa bùji iru camade. Mãpai puerta jâap'eda, wãji. 22 T'êepai chi k'ima t'âpip'eda, mãgaji:
—Mimiapari pëipáde aji, burro ome mù wãit'ee perã Ak'õre pedee jarapari jùrùde. Unuk'ãri, ãpùtee cheit'eeda aji.
23 Chi ùmùk'îrapa iidiji:
—¿Sãap'eda idi iru jùrù k'inia bùma? aji. Idi jedek'o ewari–e; âipata ewari–e pida.
Mamîda ma wêrapa p'anauji:
—K'îsianaapáde aji.
24 Mãpai chi ùmùk'îrapa jaraji chi mimiaparimaa burro atanamerã mãik'aapa chi su–ak'ù beepari aù ârù bùmerã. Batauk'ãri, ma wêrapa mãgaji chi mimiapari k'õp'ãya wãdamaa:
—Isapai wãdáma. Abaamãi p'ananaadáma aji, mùa jararumaa.
25 Mãgá wãjida. Carmelo eede panadak'ãri, ma Ak'õre pedee jarapari unu atajida. Eliseopa ma wêra cheru unuk'ãri, chi mimiapari Guiezimaa mãgaji:
—Pùchá ak'àji. Sunendepema wêra cheruda aji. 26 P'iráji iru ome k'îrachuude mãik'aapa iidíji: “¿Pù k'ap'ùa pia cheruk'ã? ¿Pù ùmùk'îra k'ap'ùa pia bùk'ã? ¿Pù warra k'ap'ùa pia bùk'ã?”
Mãga ooji Eliseo mimiaparipa. Iidinak'ãri, ma wêrapa jaraji ichideerã k'ap'ùa pia p'anùda aji. 27 Mamîda Tachi Ak'õre pedee jarapari Eliseomaa pak'ãri, bedabainaji ichi k'îrapite mãik'aapa chi bùùrù wëre ataji. Guiezipa ma wêra ãyaa ateeit'ee paji. Mamîda Eliseopa mãgaji:
—Ichiak'au bùpáde aji, audú k'îsia p'ua nâbairã. Tachi Ak'õrepa mùmaa waide jara–eda aji, sãgap'eda ichi nãga nâbù.
28 Mãpai ma wêrapa mãgaji:
—Mùchi waibùa, ¿mùa iidijik'ã aji, pùa warra teemerã mùmaa? ¿Jara–e pajik'ã aji, mù k'ûranaamerã?
29 Mãpai Eliseopa Guiezimaa mãgaji:
—Mù bastón atap'eda, jîp'a p'ira wåji ichi temaa. Ode wãde eperã ome unuru pùrã, saludaanáaji. Jîp'a p'iráji ichi warra bùmaa. Mama pak'ãri, mù bastón bùpáde aji, ma warra k'îra ârù.
30 Mamîda ma warra nawepa Eliseomaa mãgaji:
—Tachi Ak'õre k'îrapite mùa juraa bùda aji, mù ãyaa wã–e pait'ee pù auk'a wã–e pùrã.
Mapa Eliseo wãji iru ome. 31 Mãùmisa Guiezi ãchi naa wãda perã, ma warramaa pak'ãri, Eliseo bastón bùji ma warra k'îra ârù. Mamîda maarepida k'îra pa–e paji. Mapa Guiezi wãji Eliseo k'îrachuude. Mãgaji:
—K'îra pa–eda aji.
32 Eliseo pak'ãri, t'îuji ichi cuartode mãik'aapa ma warra piuda unuji ichi camade. 33 Puerta jâap'eda, Eliseopa ùt'aa iidiji Tachi Ak'õremaa. 34 T'êepai jêra beeji ma warra k'ap'ùa piuda ârù. Bùji chi it'ai ma warra it'ai ârù, chi tau ma warra tau ârù, chi jua ma warra jua ârù. Mãga nùde ma warra k'ap'ùa wãsia wãji. 35 Mãpai Eliseo p'irabaiji mãik'aapa p'ùrrùa beeji ma cuartode. T'êepai waya jêra beeji ma warra k'ap'ùa ârù. Mãga bùde ma warra jaisema siete jaiseji mãik'aapa chi tau êe beeji. 36 Mãga unuk'ãri, Eliseopa t'âji Guiezi chemerã mãik'aapa mãgaji:
—Ma Sunendepema wêra t'ânapáde aji.
Guiezipa mãga ooji. Ma wêra pak'ãri, Eliseopa mãgaji:
—Nama bùda aji, pùchi warra. Jita atapáde aji. 37 Ma wêra bedabaip'eda Eliseo k'îrapite, chi warra ataji mãik'aapa uchiaji ma cuartodeepa.
Eliseopa sapaya ome ooda
38 Maap'eda Eliseo wãji Guilgaldee. Maapai jarrajara paji ma eujãde. Ewari aba awaraa Ak'õre pedee jarapataarã Eliseo ome chip'e atadap'eda, su–ak'ù p'anadak'ãri iru ûraa ûrimaa, Eliseopa mãgaji chi mimiaparimaa: “K'uuru waibùa atapáde aji, mãik'aapa bùpáde aji, t'ùpùtaude sancocho ooit'ee na Ak'õre pedee jarapataarã–it'ee.”
39 Mimiapari aba mêe wãji nek'iru ne–aliño jùrùde. Mama bùde unu ataji pak'uru jep'edaa sapayak'a chau bùta. Ma sapayak'a bada pia k'awa–e paji mîda, ichi ârùpema p'arude p'e ataji mãik'aapa ateeji teedaa. Pak'ãri, ma sapayak'a bada chuu nâbùji chi sancochode. 40 T'êepai ma sanchocho tawadap'eda, ma Ak'õre pedee jarapataarãpa k'o p'aneedak'ãri, Eliseomaa biajida:
—¡Ak'õre pedee jarapari, na chik'o neera k'achia iru bùda! ajida.
—Harina ma–ãri aneepáde aji.
Ma harina pëip'eda ma sancochode, mãgaji:
—¡Ârá waya tawapáde aji, na eperãarãmaa!
Mãga ooji. Jõmaarãpa k'ojida Eliseopa ma neera k'achia wêpapida perã Tachi Ak'õre Jaure k'ap'ùa.
Eliseopa chik'o eepapida
42 Ma t'êepai eperã Baal Salisá p'uurudeepa pan veinte cebada naapùara ewadap'edaadee ooda aneeji Eliseomaa. Ma pan ewaa âpù baji. Ichiaba trigo tau aneeji ichi mochilade. Mãga k'awak'ãri, Eliseopa chi mimiaparimaa mãgaji:
—Tawapáde aji, na see jõnùùrãmaa.
43 Mamîda ma mimiaparipa p'anauji:
—¿Sãga mùa na pan chok'ara–e tawaima aji, na eperãarã cienmaa?
Eliseopa mãgaji:
—Jîp'a tawapáde aji, Tachi Ak'õrepa jarada perã jõmaarãpa k'odait'ee mãik'aapa chi beeda paraait'ee.
44 Mãgá ma mimiaparipa tawa beeji. Jõmaarãpa k'ojida mãik'aapa beeda paraaji Tachi Ak'õrepa Eliseomaa jaradak'a.