Eliseopa Siriadepema soldaorã poro waibùa Naamán jùpada
5
1 Eliseo at'ãri bapariik'ãri, Siriadepema soldaorã poro waibùa Naamán bapachi. Siriadepema reypa mãgà eperã pia ak'ùji, Siriadepema soldaorã iru jua ek'ari p'anadak'ãri, jura p'oyaadap'edaa perã. Mamîda Naamán k'ayaa k'achiapaa k'ayaadachi.2 Aù naaweda Siriadepemaarã israelitaarã ome chõo p'anadak'ãri, awêra aba atadachida mãik'aapa ateejida ãchi eujãdee. T'êepai ma awêra Naamán wêra mimiapari beeji. 3 K'awadak'ãri Naamán mãgá k'ayaa k'achiapa k'ayaa bù, ma awêrapa mãgaji chipari wêramaa:
—Mù chipari wãru pùrã Tachi Ak'õre pedee jarapari Samaria p'uurude bù ak'ùde, mãgùpa jùpayada aji.
—Pia bùda aji. Mùa k'art'a pëiit'eeda aji, Israeldepema reymaa.
Mãgá Naamán wãji Israeldee. Ateeji p'arat'a tau treinta mil, p'arat'a tau nêedee seis mil, p'aru pi–ia diez ome. 6 Ma k'art'a ateeji Israeldepema reymaa. Made jaraji: “Pùa na k'art'a jitak'ãri, k'awaait'ee mùa mù soldaorã poro waibùa, Naamán, pëida pùa iru jùpamerã k'ayaa k'achia bùdeepa.”
7 Israeldepema reypa mãga leek'ãri, chi p'aru jêt'aaji ãchobeepa mãik'aapa mãgaji:
—¿Mù Tachi Ak'õrek'ã eperã chok'ai bapimerã maa–e pùrã piupimerã? ¡Mùa jã eperã p'oyaa jùpa–e pai! Nãga oomaa bù–ek'ã aji, chõo jùrù k'inia bairã mù ome.
8 Tachi Ak'õre pedee jarapari Eliseopa k'awa atak'ãri reypa p'aru jêt'aada ma k'art'a k'aurepa, nãga jara pëiji reymaa: “¿Sãap'eda pùchi p'aru jêt'aajima ãchobeepa? Jã eperã mùmaa pïiji. Mãgá irua k'awaayada aji, Tachi Ak'õre pedee jarapari paraa Israel eujãde.”
9 Mãgá Naamán Eliseo temaa wãji ichi carretade caballopa jidiupata. Eliseo te k'îrapite pak'ãri, 10 Eliseopa eperã pëiji irumaa nãga jaramerã: “Wãpáde aji, Jordán todee mãik'aapa aùde k'uima siete k'uipáde aji. Mãgá pù k'ap'ùa pia beeyada aji, k'ayaa k'achia wêe.”
11 Mãga ûrik'ãri, Naamán k'îraudachi. Ãpùtee wãpa mãgaji:
—Mùa k'îsiaji jã eperã mù k'îrapite uchiait'ee paji mãik'aapa ak'ùnâ bùde mù pari ùt'aa iidiit'ee paji ichi Ak'õre Waibùamaa. Maap'eda ichi jua bùk'aji mù k'ap'ùa ârù na k'ayaa k'achia wêpamerã. 12 ¿Tai Damasco eujãdepema to pipùara bù–ek'ã jõmaweda Israel eujãdepema to k'ãyaara? K'ui k'inia bù pùrã, Abaná tode maa–e pùrã Farfar tode k'uinayada aji.
Mãpai k'îrau bada perã, ichi ode wãji. 13 Mamîda ichi mimiapataarã k'õp'ãya p'anadap'edaarãpa irumaa mãgajida:
—Tachi waibùa, ma Ak'õre pedee jaraparipa ne–inaa chaaree oopida paara, pùa aramãgá ook'ajida ajida. Mamîda ne–inaa chaaree–ee oopi bù. Mapa ¿sãa k'uina–ema ajida, irua jaradak'a? Mãgá pù jùpa beeyada ajida.
14 Mãga jaradap'edaa perã, Naamán wãji Jordán todee mãik'aapa Eliseopa jaradak'a k'uima siete k'uiji. Uchiak'ãri, ichi k'ap'ùa âdaa beeji k'ûtrãa k'ap'ùak'a, k'ayaa wêe. 15 Mãpai Naamán chi k'õp'ãyoorã ome Eliseo temaa chejida. Iru k'îrapite pak'ãri, Naamanpa mãgaji:
¡Ârara sí mùa k'awa bù awaraa Ak'õre Waibùa wê–e israelitaarã Ak'õre Waibùak'a! Mapa mùa pùmaa na net'aa pia tee k'inia bù. Mù pùchi mimiaparik'a beeruda aji.
16 Mamîda Eliseopa p'anauji:
—Tachi Ak'õre Waibùa k'îrapite mùa juraa bùda aji, net'aa maarepida jita–e pait'ee.
Naamán enenee nâbaji mîda net'aa atamerã, Eliseopa maarepida jita–e paji.
17 Mãpai Naamanpa mãgaji:
—Mãgara Israel eujãdepema yooro mùmaa ateepíji mula omeerãpa p'oyaa uapatak'a. Altar oo k'inia bù israelitaarã Ak'õre Waibùa–it'ee. Naamãik'aapa waa mùa ne–animalaarã awaraa ak'õre waibùa apataarã–it'ee paa jõpi–e pait'ee. Aba israelitaarã Ak'õre Waibùa–it'eeta ne–animalaarã paait'ee. 18 Aba mùa chupùria iidi k'inia bù irua na ne–inaa k'achia mùa oopari ãyaa bùmerã. Mùchi rey wãk'ãri ichi ak'õre waibùa apari Rimón temaa, mùa ichi k'aripapari, chonaa chairã. Mãga nùde mù auk'a bedabaipari ichi ome ma ak'õre waibùa apata k'îrapite. Aba mùa k'inia bù ma ne–inaa k'achia ooparita Tachi Ak'õrepa ãyaa bùmerã.
19 Mãpai Eliseopa mãgaji:
—K'ãiwee wãpáde aji.
Naamán wãji. Ode wãdade taarã pak'ãri, 20 Eliseo mimiapari, Guiezipa k'îsia beeji: “Mùchi waibùapa ma Siriadepema Naamán pëiji maarepida net'aa jita–ee. Tachi Ak'õre ichita chok'ai bù k'îrapite mùa juraa bù: Mùta iru t'êe p'irait'ee. ¿Mùmaa net'aa teei–ek'ã?” aji.
21 Mãgá Guiezi p'ira wãji Naamán t'êe. Êp'ek'ãri, Naamán ùrabaiji ichi carretadeepa mãik'aapa iidiji:
—¿Sãgajima? aji.
22 Guiezipa p'anauji:
—Sãga–eda aji. Aba mù chiparipa mù pëiji jarade Ak'õre pedee jarapataarã k'ûtrãarã et'ewa pajida Efraindeepa uchiadap'edaarã ee jêra bù eujãdepema. Mù chiparipa ãra k'aripa k'inia bairã, mù pëiji iidimerã õpee mil p'arat'a tau, p'aru omé pù juak'aawa.
23 Mãpai Naamanpa mãgaji:
—Pia bùda aji. Ma k'ãyaara mùa seis mil p'arat'a tau teeyada aji.
Naamanpa enenee nâbap'eda, Guiezipa ijãaji. Mapa Naamanpa ma p'arat'a tau, p'aru ome t'ù bùp'eda bolsa omeede, teeji chi mimiapataarãmaa ateedamerã Eliseomaa. 24 Eliseo te k'ait'a panadak'ãri, Guiezipa ma p'arat'a atap'eda, Naamán mimiapataarã ãpùtee pëiji. Mãpai ma p'arat'a tau teeda ùanaji. 25 T'êepai chipari k'îrapite pak'ãri, Eliseopa iidiji:
—Guiezi, ¿sãmãik'aapa chejima? aji.
Guiezipa p'anauji:
—Mù ãyaa wã–e pajida aji.
26 Mamîda Eliseopa ijãa–e paji. Mapa mãgaji:
—Eperã ichi carretadeepa ùrabaik'ãri, mù auk'a mama baji mùchi k'îsiade. Nãgaweda chîara juak'aawa jitadaik'araa bù p'arat'a tau, p'aru, ne–uu eujã, uva k'ãi, ovejaarã, p'ak'aarã, wa mimiapataarã. 27 Pùa mãgá seewa jarada perã Naamanmaa, ichi k'ayaa k'achiapa k'ayaa bada bariit'ee pùmaa, pùdeepa uchiadait'eerãmaa paara.
Mãga paji. Guiezi Eliseo ik'aawaapa uchiak'ãri, ma k'ayaa k'achiapa chi e t'o–t'oo beeji nievek'a.