Eliseopa ooda chaara ome
6
1 Ewari aba awaraa Ak'õre pedee jarapataarãpa Eliseomaa mãgajida:—Ûríji. Tachi nama pù ome chip'edaipatamãi audú p'îsua bù tachi jõmaarã–it'ee. 2 Tai wãpipáde ajida, Jordán to k'ait'a, mama pak'uru t'upee atadamerã te waibùara oo atadamerã.
Eliseopa p'anauji:
—Wãdapáde aji.
3 Mamîda ãchidepema abaapa mãgaji:
—Chupùria k'awaapáde aji, cheit'ee tai ome.
Eliseopa p'anauji:
—Pia bùda aji. 4 Mãgá Eliseo ãchi ome wãji Jordán to idee. Mama pak'uru t'upee p'aneejida. 5 Mamîda mãgá pak'uru t'umaa p'anùde abaapa ichi chaara poro toidú baaipiji. Mapa nãga biaji:
—¡Aai, tachi jarateepari, mùa ma chaara prestajida! aji. Ârá mùa ¿k'ãata ooit'eema? aji.
6 Eliseopa iidiji:
—¿Sãmaapù baaijima? aji.
Apemapa ak'ùpik'ãri, Eliseopa pak'uru jua t'ùap'e atap'eda, bat'at'aaji ma baaidamãi. Mãga oo bùde ma chaara poro bai ûu beeji.
7 Mãpai Eliseopa mãgaji:
—Atanapáde aji.
Mãpai chi apemapa ma chaara poro jita ataji.
Eliseo Siria eujãdepemaarã ome
8 Maapai Jorán Israeldepema rey bùde, Siriadepema rey chõo jùrùji israelitaarã ome. Ichi soldaorã ome chip'edaidap'eda, jaraji sãma p'ananadait'ee israelitaarã chõodait'ee pak'ãri. 9 Tachi Ak'õrepa ichi pedee jarapari Eliseomaa ma Siriadepema reypa jarada k'awapik'ãri, Eliseopa jara pëiji Israeldepema reymaa ma Siriadepemaarã p'ananadait'ee badamãi wãyaanaamerã. 10 Mãga k'awaak'ãri, Israeldepema reypa ichi soldaorã pëipachi Eliseopa jaradamãi. Mãgá at'apai Siriadepema soldaorã t'îupida–e paji ãchi eujãde. 11 Mãga unuk'ãri, Siriadepema reypa t'â pëiji ichi soldaorã poro waibùarãmaa mãik'aapa mãgaji:
—Tachi Rey Waibùa, tai eerepema apidaapa ãchi k'aripada–epù. Israelitaarã Ak'õre Waibùa pedee jarapari Eliseópata jarak'oo bùda aji, pùa jara bù, pùchi cuartode ituaba bak'ãri jara bù pùjida.
13 Mãpai Siriadepema reypa mãgaji:
—Iidinadapáde aji, Eliseo bùmãi. Mãgá mùa soldaorã pëiyada aji, iru jita atade.
Iididak'ãri, k'awajida Eliseo Dotán eujãde bù. 14 Siriadepema reypa mãga k'awa atak'ãri, pëiji soldaorã caballode wãpataarã, carretade wãpataarã, jîte wãpataarã paara, Dotán p'uuru wap'ùra atanadamerã. P'ãrik'ua panajida. 15 Mãgá tap'eweda Eliseo mimiapari p'irabaik'ãri, unuji ma Siriadepema soldaorã chok'ara carretade wãpataarã ome, caballode wãpataarã paara ma p'uuru wap'ùra iru p'anù. Eliseomaa jaranak'ãri, mãgaji:
—Mùchi Waibùa, ¿tachia, k'ãata oodayama? aji.
16 Eliseopa p'anauji:
—Waaweenaapáde aji. Tachi eere p'anùùrã chok'araara p'anù ãchi eere p'anùùrã k'ãyaara.
17 Mãpai Eliseopa nãga ùt'aa iidiji Tachi Ak'õremaa: “Tachi Waibùa, mù mimiaparimaa pùchi eere p'anùùrã unupipáde” aji. Mãga ooji Tachi Ak'õrepa. Ãchi p'anadap'edaamãi ee ik'aawa ma mimiaparipa unuji soldaorã caballo ârù wãpataarã, carreta wãpataarã ome t'ùpùtáuk'apù p'anù.
18 T'êepai, ma Siriadepema soldaorã chõo chewãdak'ãri, Eliseopa Tachi Ak'õremaa iidiji ãchi tau p'ãriupik'oomerã. Mãga ooji Tachi Ak'õrepa. 19 Mãpai Eliseo ãchimaa wãji mãik'aapa mãgaji:
—Parã o atuadachidapù. Nãgà p'uuruta parãpa jùrùda–e paji. Chedapáde aji, mù ome. Mùa ak'ùpiit'eeda aji, eperã parãpa jùrùmaa p'anù.
Mãgá Eliseopa ãchi ateeji israelitaarã p'uuru waibùa Samariadee. 20 Mama panadak'ãri, Eliseopa nãga ùt'aa iidiji: “Ârapù, Tachi Waibùa, tau eratùpik'oopáde” aji. Unudak'ãri, Samaria p'uuru jãde p'anajida. 21 Israeldepema reypa ãchi unuk'ãri, Eliseomaa iidiji:
—Mùchi Waibùa, ¿peedaipia bùk'ã? aji.
22 Mamîda Eliseopa p'anauji:
—Peenaadapáde aji. ¿Parãpa peedaik'ã aji, presoorã atadap'edaa espadapa mãik'aapa ematrùmapa? Peedai k'ãyaara nek'opidapáde aji, mãik'aapa ne–inaa topidapáde aji. Maap'eda pëidapáde aji, ãchi poro waibùamaa.
23 Mãga oojida. Fiesta waibùa oojida. Nek'ojida mãik'aapa ne–inaa tojida. Maap'eda Israeldepema reypa ãchi pëiji ãchi poro waibùamaa. Ma t'êepai Siriadepemaarã waa chõo cheda–e paji israelitaarã eujãde.
Eliseo Samaria p'uurude bùde reypa jùrùda peepiit'ee
24 Mamîda taarã pak'ãri, Siriadepema rey Ben Adadpa ichi soldaorã jõmaweda p'e atap'eda, Samaria p'uuru pidaarã ome chõode chejida. 25 Ma p'uuru taarã wap'ùra iru p'anadap'edaa perã, chik'o mak'ùara wê–e paji. Mãga nùde burro poro âpùa netojida; p'arat'a tau ochenta pari. Ma awara arvejak'a bee paloma ã apatap'edaa netopachida; litro esa–auk'a p'arat'a tau joisomaa pari. Mãga bùde p'uuru pidaarã piu wãjida jarrapa.
26 Ewari aba Israeldepema rey murallade wãyaa wã bùde wêra abaapa irumaa biaji:
—Mùchi rey waibùa, ¡mù k'aripapáde! aji.
27 Ma reypa p'anauji:
—Tachi Ak'õrepa pù k'aripa–e pùrã, ¿mùa, sãgá k'aripaima? Mùa trigo, vino wêe bù apidaamaa teeit'ee. 28 ¿Pù, sãga nâbùma? aji.
Ma wêrapa p'anauji:
—Jãgà wêrapa mùmaa jaraji mù warra teemerã k'odait'ee jarrapa piupiamaapa. Jõdee aù norema ichideta k'odait'eeda aji. 29 Mãgá mù warra peejida mãik'aapa k'ojida zancochode. Mamîda aù norema mùa jarak'ãri ichi warra atamerã, wê–e paji merãdap'edaa perã.
30 Israeldepema reypa ma wêra nepùrùda ûrik'ãri, chi p'aru jêt'aaji k'îraupa. Ùt'à murallade bada perã, eperãarãpa unujida ichi p'aru chi–ùadak'ãri, jâpatak'a jâ baji. 31 Mãpai ma rey mãgá k'îrau bada perã, mãgaji: “¡Tachi Ak'õrepa mù k'achia ooipia bùda aji, idiweda mùa Safat warra Eliseo poro t'ùap'epi–e pùrã!”
32 Mãga nùde Eliseo ichi tede su–ak'ù baji israelitaarã poro waibùarã ome. Mãùmisa reypa ichi jâapari pëiji Eliseo atade. Mamîda mãgà pai naaweda, Eliseopa mãgaji ma p'uurudepema poro waibùarãmaa:
—Pùchá ak'àtù jã chîara peeparipa aba pëiji mù poro t'ùap'emerã. Mamîda iru pachep'eda, puerta jâadapáde aji, iru t'êe chipari cheru perã.
33 At'ãri mãga pedee bù misa, ma eperã pëida paji Eliseo k'îrapite mãik'aapa reypa jara pëida jaraji:
—¿Tachi Ak'õrepa tachimaa na k'achia oomaa bù–ek'ã? aji. ¿Mùa k'ãare–it'ee waa nùyama aji, irua tachi k'aripamerã?