7
1 Eliseopa p'anauji:—Ûríji Tachi Ak'õrepa jarapiru: “Nu na hora Samaria p'uuru t'îupatamãi harina litro siete netodai p'arat'a tau aba pari. Jõdee cebada net'a tau litro quince netodai p'arat'a tau aba pari.”
2 Ma rey pëidapa mãga ûrik'ãri, mãgaji:
—Tachi Waibùapa ùt'ariipa chik'o pëiru pùjida, pùa jara bùk'a p'asa–e pak'ajida aji.
Mamîda Eliseopa p'anauji:
—Pùchi taupa mãga unuit'ee. Mamîda ma chik'odepema maarepida k'o–e pait'eeda aji.
3 Mãùmisa leprapa k'ayaa beerã k'îmari ma p'uuru taawaik'a eere p'anapatap'edaarã, p'uurudepema puerta k'ait'a ãchi pitapai pedee p'aneejida:
—¿K'ãare–it'ee tachi nama su–ak'ù p'anùma tachi piuda nùmaa? 4 P'uurude t'îuruta pùrã, piudait'ee jarrapa, na p'uurudepemaarã jarra oomaa p'anadairã. Jõdee nama su–ak'ù p'aneeruta pùrã, piudait'ee chõodak'ãri. Maperã wãdáma Siriadepema soldaorã p'anùmaa mãik'aapa ãchi juade p'aneedáma. Auteebairuta pùrã, chok'ai uchiadai. Tachi peeruta pùrã, ichita piudait'eeda ajida.
5 Mãgá pedeedap'eda, p'ãriupodopa wãjida ma Siriadepema soldaorã p'anadap'edaamaa. Mamîda ma k'ait'a panadak'ãri, eperã apida unudak'aa paji. 6 Mãgá apida wê–e paji Tachi Ak'õrepa ma Siriadepema soldaorãmaa ûripida perã carreta, caballoorã, soldaorã cho–k'ara ome cheruta ãchi ârù. K'îsiajida Israeldepema rey uchiap'eda ma p'uurudeepa mãik'aapa hititaarã rey ome, Egipto pidaarã rey ome pedeeteep'eda, chewãjida chõode ãchi ome. 7 Maperã p'ãriupodopa erreuk'oodachida. Ãchi net'aa jõmaweda atabëijida: ãchi te ne–edee ooda, ãchi caballoorã, burroorã; chik'o paara. 8 Mãgá ma leprapa k'ayaa beerã t'îujida Siriadepema te ne–edee ooda abaade mãik'aapa nek'o p'aneejida; ne–inaa to p'aneejida. Ichiaba net'aa p'e wãjida: p'arat'a, nêe, p'aru paara. Maap'eda ma net'aa merãk'oonajida. T'êepai awaraa tede t'îujida mãik'aapa auk'a oojida. 9 Mamîda ma t'êepai ãchi pitapai pedee p'aneejida:
—Tachia pia ooda–e p'anùda ajida. Idi israelitaarãpa ãchi k'îra unuamaa iru p'anapataarã p'oyaajida. Wãdai k'ãyaara ma pedee pia jarade, nama k'îup'ee p'anù. Nùruta pùrã ewarirumaa, tachi k'aurepada adait'ee, chik'o mak'ùara wê–e paji mãik'aapa net'aa mak'ùara wê–e paji. Mapa wãdáma ajida, reymaa jarade.
10 Mãgá wãjida p'uuru t'îupatamaa. Ma p'uuru jâapataarãmaa biajida mãik'aapa mãgajida:
—Tai wãjida Siriadepema soldaorã p'anadap'edaamãi. Mama eperã apida wê–e. Pedee jida apida ûrida–e paji. Aba ãchi caballoorã, burroorã ome mama jâ p'anù. Ãchi te tuma beeda ajida.
11 Aramata ma p'uuru jâapataarãpa jara pëijida palaciode p'anadap'edaarãmaa. 12 Mãga nepùrùdak'ãri, p'ãrik'ua baji mîda, rey p'irabaiji mãik'aapa mãgaji ichi ek'ari beerãmaa:
—Mùa jarait'ee ma Siriadepemaarãpa oomaa p'anù. Ãra soldaorãpa tachi k'ûra k'inia p'anù. K'awa p'anù tachi nama piu wãda jarrapa. Ãchi te atabëijida mãik'aapa mêe mirunajida. Mãgá tachi na p'uurudeepa uchiadak'ãri ak'ùde, ãrapa tachi jita atadait'ee mãik'aapa mãgá tai p'uuru jãri atadait'eeda aji.
13 Mamîda ichi soldaorã poro waibùa abaapa mãgaji:
—Mãgara soldaorã joisomaa caballo ârù pëipáde aji, ak'ùnadamerã. Pùa jara bùk'a wãara pùrã, ma soldaorã peedait'ee. Piuruta pùrã, auk'a p'aneedai nama p'anùùrãk'a. Mamîda chok'ai uchiaruta pùrã, tachi apemaarã Israel pidaarã ome auk'a chok'ai uchiadait'eeda aji.
14 Ma reypa ijãaji. Soldaorãpa carreta omé caballo ome atadap'eda, reypa pëiji Siriadepemaarã p'anadap'edaamaa ak'ùdamerã. 15 Ma Israeldepema soldaorã Siriadepemaarã t'êe wãjida Jordán to ide parutamaa. Ma o jõmaade unujida p'aru, net'aa bat'ak'oodap'edaa waaweepa erreu wãdap'edaa perã. Ma t'êepai ma pëidaarã ãpùtee wãjida reymaa nepùrùde ãchia unudap'edaa. 16 Aramata ma p'uurudepemaarã uchiajida p'uurudeepa mãik'aapa p'e ata wãjida Siriadepemaarãpa atabëidap'edaa. Tachi Ak'õrepa jaradak'a Eliseo ideepa ma ewate harina litro siete netojida p'arat'a tau aba pari; jõdee cebada litro quince netojida p'arat'a tau aba pari.
17 Mãgá p'uuru pidaarãpa ma net'aa p'e ata wãruta misa, reypa ichi jâapari pëiji ma p'uuru t'îupatamãi jâamerã. Mamîda eperãarã p'uurudeepa uchia wãda see nâbada perã, ma eperã ârù t'ùajida. Mãgá iru mama piuji. Eliseopa jaradak'a ma chik'o p'e atadap'edaadepema maarepida k'o–e paji.
18 Jõmaweda p'asaji Tachi Ak'õre pedee jarapari Eliseopa jaradak'a. Samaria p'uuru t'îupatade harina litro siete netojida p'arat'a tau aba pari. Ma awara cebada litro quince netojida p'arat'a tau aba pari. 19 Ma rey jâaparipa jaraji mîda Tachi Ak'õrepa paara mãgá chik'o paraapi–e pak'aji, mãga unuji ichi taupa, mamîda maarepida k'o–e paji. 20 Mãga paji eperãarã iru ârù t'ùadap'edaa perã.