Sunendepema wêrapa ichi net'aa waya atada
8
1 Ma t'êepai Eliseo pedeenaji ma wêra chi warra chok'ai p'irabaipida ome. Jaraji awara ãyaa wãmerã ichideerã ome Tachi Ak'õrepa jarrajara pëiit'ee bada perã ma eujãdee siete año wãyaaru misa. 2 Mãgá ma wêrapa ichi net'aa p'e atap'eda, Eliseopa ûraadak'a wãji ichideerã ome filisteorã eujãdee. Mama p'aneejida siete año wãyaaru misa. 3 Ma t'êepai Filistea eujãdeepa waya chedak'ãri, ma wêra wãji reymaa ichi te ichi eujã ome iidide. 4 Mãga nùde rey pedee baji Eliseo mimiapari Guiezi ome k'awa k'inia bada perã ne–inaa jõma Eliseopa ooda eperãarãpa p'oyaa oodak'aa ãchi juadoopa. 5 Guiezipa nepùrù bùde Eliseopa ma wêra warra piuda chok'ai p'irabaipida, ma wêra paji ichi te mãik'aapa eujã iidide. Mãga unuk'ãri, Guiezipa mãgaji reymaa:—Mù Rey Waibùa, nãgà wêradeta mùa nepùrù bajida aji, mãik'aapa nãgà warrata chi chok'ai p'irabaipida.
6 Mãpai reypa iidik'ãri ma wêra p'asada, irua jõmaweda nepùrùji. T'êepai reypa ichi jua ek'ari poro waibùamaa jaraji ma wêra te mãik'aapa eujã teemerã, madeepa net'a tau atadap'edaa paara, iru wãdadeepa ma ewate parumaa.
Siria eujãde Jazael rey pada
7 T'êepai Eliseo Siriadepema p'uuru waibùa Damascodee wãji. Maapai Siriadepemaarã rey Ben Adad k'ayaa baji. Eliseo pada nepùrùdak'ãri Ben Adadmaa, 8 irua nãga jaraji ichi ak'ùpari Jazaelmaa:
—Wåji Tachi Ak'õre pedee jarapari ak'ùde. Irumaa teeit'ee ne–inaa pi–ia atéeji. Iidipáde aji, irua Tachi Ak'õremaa ùt'aa iidimerã mù jùpai wa jùpa–e pai.
9 Mãga ooji Jazaelpa. Wãji Eliseo ome unude mãik'aapa irumaa Damasco p'uurudepema ne–inaa pipùara ateeji camello cuarenta ârù. Eliseo k'îrapite pak'ãri, mãgaji:
—Siriadepema rey Ben Adad pù warrak'a bairã mù pëiji pùmaa iidimerã jùpai wa jùpa–e pai ichi k'ayaadeepa.
10 Eliseopa p'anauji:
—Wåji jarade iru jùpai na k'ayaadeepa. Mamîda Tachi Ak'õrepa mùmaa unupijida aji, wãara iru piuit'ee.
11 Mãga jara bùde Eliseopa Jazael taumaa ak'ù baji. Mapa Jazael ãyaa wã k'inia baji. Mãpai Eliseo jêedachi. 12 Mãga bùde Jazaelpa iidiji:
—Mùchi waibùa, ¿sãap'eda jêe nâbùma? aji.
Eliseopa p'anauji:
—Jêe nâbù mùa k'awa bairã pùa israelitaarãmaa ne–inaa k'achia ooit'ee. Ãra soldaorã see nâbù te k'oopait'ee t'ùpùtaupa. Ãra k'ûtrãarã peek'ooit'ee espadapa. Ãra warra chak'eerã paara peedait'ee mãik'aapa ãchi wêraarã biak'oo p'anù bi t'oodait'ee espadapa.
13 Mãpai Jazaelpa mãgaji:
—Mamîda mù jõmaarã ek'ariara bù; usák'apù bù. ¿Sãga mùa ma jõma ooyama? aji.
Eliseopa p'anauji:
—Tachi Ak'õrepa mùmaa k'awapiji pù Siriadepema rey pait'ee.
14 Jazael Eliseo badamãiipa wãk'ãri, panaji ichi rey k'îrapite. Ma reypa iidiji:
—¿K'ãata jarajima aji, Eliseopa?
Jazaelpa p'anauji:
—Pù na k'ayaadeepa jùpait'eeda aji.
15 Mamîda aù norema Jazaelpa poroba atap'eda sã bùji paniade. Mãpai rey k'îra poro bùji ichi k'ãi bùde. Mãgá peet'aaji mãik'aapa Siriadepema rey beeji.
Judá eujãde Jorán rey pada
(2 Crónicas 21.1-20)
16 Acab warra Jorán año joisomaa rey bùde Israelde, Judadepema rey Josafat jai–idaaji. Ichi warra, ichiaba t'âjarapatap'edaa Jorán rey beeji Judade. 17 Treinta y cinco año iru baji rey pak'ãri. Rey paji Jerusalende ocho año wãyaarude. 18 Mamîda Joranpa Israeldepema rey Acabdeepa uchiadap'edaarãpa oopatap'edaak'a ne–inaa k'achia oopachi Tachi Ak'õre k'îrapite. Audupùara mãga baji Acabdeepa uchiada k'au ome miak'ãik'ãri. 19 Mamîda ma k'aurepa Tachi Ak'õrepa Judadeepa uchiadap'edaarã jõpi–e paji, ichia Davidmaa jarada perã irudeepa uchiadait'eerã ichita rey padait'ee.
20 Jorán rey bùde Edom eujãdepemaarãpa waa p'ana k'iniada–e p'aneejida Judadeepa uchiadap'edaarã rey jua ek'ari. Maperã ãchia rey bùjida. 21 Mãga k'awaa atak'ãri, rey Joranpa ichi soldaorã carreta ome, caballoorã ome p'e ataji mãik'aapa wãjida Zairdee chõode ma Edom pidaarã ome. Mãga nùde Edomdepema soldaorã ãchi wap'ùra atajida. Mamîda p'ãrik'ua rey Jorán ichi soldaorã poro waibùarã carretade wãpatap'edaarã ome uchiajida mãùrã juadeepa. 22 Mãgá Edom pidaarã uchiajida Judadeepa uchiadap'edaarã jua ek'ariipa. At'ãri ãra jua ek'ari p'anadaamaa p'anapata. Maapai Libná p'uurudepemaarã ichiaba uchiajida Judadeepa uchiadap'edaarã jua ek'ariipa.
23 Awaraa ne–inaa ooda Joranpa p'ã bù Crónicas librode awaraa Judadepema reyrãpa ne–inaa oopatap'edaa ome. 24 Jorán piuk'ãri, ùajida ichi chonaarã ùadap'edaamãi David p'uurude. Chi warra Ocozías rey beeji ichi pari.
Judá eujãde Ocozías rey pada
(2 Crónicas 22.1-6)
25 Israeldepema Acab warra Jorán doce año rey bùde, Judadepema rey Jorán warra t'âpatap'edaa Ocozías rey beeji. 26 Ocozías veintidós año iru baji rey beek'ãri. Rey paji año aba mãik'aapa Jerusalende bapachi. Chi nawe Atalía paji. Mãgà wêra Israeldepema rey Omrideepa uchiada paji. 27 Ocoziapa ne–inaa k'achia oopachi Israeldepema rey Acabpa oopariidak'a mãik'aapa irudeepa uchiadap'edaarãpa oopatap'edaak'a. Ma awara iru miak'ãi bada perã Acabdeepa uchiada ome, ne–inaa k'achia oopachi Tachi Ak'õre k'îrapite.
28 Ocozías rey pak'ãri, pedeeteeji Israeldepema rey Jorán ome auk'a chõonadait'ee Siriadepema rey Jazael ome Ramot de Galaad p'uurude. Mamîda mama p'anùde Siriadepema soldaorãpa Jorán p'ua oojida. 29 Maperã Jorán ãpùtee wãji Jezrel p'uurudee jùparumaa. Mãgá k'ayaa bada perã Ocoziapa iru ak'ùde wãji.