Israel eujãde Jehú rey pada
9
1 Ocozías mama bùde Tachi Ak'õre pedee jarapari Eliseopa awaraa Ak'õre pedee jarapataarã p'e ataji mãik'aapa ãradepema abaamaa mãgaji:—Pùchi net'aa atáji wãit'ee perã Ramot de Galaad p'uurudee. Aceite botella aba atéeji. 2 Mama pak'ãri, jùrùnáji Josafat warra, Nimsi ãichak'e Jehú. Unu atak'ãri, chi k'õp'ãyoorã ik'aawaapa ãyaa atéeji awaraa cuartodee. 3 Mãpai na aceite pùa ateeru wéeji iru poro ârù. Mãga oo bùde nãga jarapáde aji: ‘Nãga jara bù Tachi Ak'õrepa: Mùa pù awara bùru israelitaarã rey pamerã.’ Mãga jarap'eda, isapai jirabodopáde aji.
4 Ma Ak'õre pedee jarapari k'ûtrãa badapa ooji Eliseopa jaradak'a. Wãji Ramot de Galaad p'uurudee. 5 Mama pak'ãri, ununaji soldaorã poro waibùarã abaamãi see nâbù. Mãpai mãgaji:
—Mùa ne–inaa jara k'inia bùda aji, mùchi poro waibùamaa.
Mãpai Jehupa mãgaji:
—Tai nama p'anùùrã jõmaweda poro waibùarãda aji. ¿Chisãgà ome pedee k'inia bùma? aji.
Mãpai ma Ak'õre pedee jaraparipa p'anauji:
—Mùchi poro waibùa, pù ome pedee k'inia bùda aji.
6 Aramata Jehú p'irabaiji mãik'aapa cuartode t'îuji ma k'ûtrãa ome. Mãpai ma Ak'õre pedee jaraparipa ma aceite weeji Jehú poro ârù mãik'aapa mãgaji:
—Israelitaarã Ak'õre Waibùapa nãga jara pëi bù: “Idi mùa pù awara bùru mù p'uuru, israelitaarã, rey pamerã. 7 Pùa pù chipari Acabdeepa uchiadap'edaarã jõpiit'eeda aji. Mãgá pùa iru k'achia ooit'ee iru wêra Jezabelpa k'achia ooda pari mù pedee jarapataarã peepik'ãri mãik'aapa awaraa mù–it'ee mimiapataarã peepik'ãri. 8 Acabdeerã jõmaweda jõdait'ee. Irudeepa uchiada ùmùk'îra apida chok'ai bee–e pait'ee. 9 Acabdeepa uchiadap'edaarã ome auk'a ooit'ee mùa oodak'a Nabat warra Jeroboandeerã ome mãik'aapa Ahías warra Basadeerã ome. 10 Jõdee Jezrel p'uurudeepa taawa usaarãpa Jezabel k'ap'ùa piuda k'odait'ee. Apidaapa iru k'ap'ùa piuda ùada–e pait'eeda aji.”
Mãga jarap'eda, ma Ak'õre pedee jarapari puerta ewaji mãik'aapa p'ira uchiaji. 11 Mãpai Jehú uchiak'ãri chi k'õp'ãyoorã p'anadap'edaamãi, mãùrãpa iidijida:
—¿Sãgajima? ¿K'ãata jara chejima ajida, jã k'îra k'awa–ee bùpa?
Jehupa p'anauji:
—Parãpa iru k'awa p'anùda aji. Parãpa k'awa p'anù irua pedee jarapari.
12 Mamîda ãchia mãgajida:
—Tai k'ûranáaji. ¡Jarapáde ajida, irua pùmaa jarada!
Mãpai Jehupa p'anauji:
—Mùmaa nãga jaraji: “Tachi Ak'õrepa jara bù: ‘Mùa pù awara bùru israelitaarã rey pamerã’ ”
13 Aweda ma poro waibùarã jõmaarãpa ãchi ârùpema p'aru êradap'eda, bùjida Jehú bùùrùde mama bada escalonmãi. Mãpai oveja cacho atadap'eda, chaajida bia jõnù misa: “¡Jehú tachi israelitaarã rey!”
Jehupa Israeldepema rey Jorán peeda
14 Ma t'êepai Josafat warra, Nimsi ãichak'e, Jehupa k'îsia iru beeji sãgá Israeldepema rey Jorán peeit'ee. Jorán israelitaarã ome uchiaji chõode Ramot de Galaad p'uurude Siriadepema rey Jazael ome. 15 Siriadepema soldaorãpa iru p'ua oodap'eda, ãpùtee wãji ichi p'uuru Jezreldee jùparumaa. Mãgá at'ãri chõo jõnùde Jehupa chi k'õp'ãyoorãmaa jaraji apida uchiapinaadamerã Ramot de Galaad p'uurudeepa, Jezreldee wãdai jîak'aapa jarade ichi rey papida. 16 Mãpai ichi carretade bataup'eda, Jehú wãji Jezreldee rey Jorán ak'ùde. Jorán at'ãri ichi camade baji. Judadepema rey Ocozías ichiaba mama baji iru ome. 17 Jezrel p'uuru murallade bada jâaparipa unuk'ãri Jehú awaraa soldaorã ome cheruta, biaji:
—Soldaorã cherutada aji.
Mãga ûrik'ãri, Joranpa mãgaji:
—Soldao aba caballode pëipáde aji, ãramaa iidimerã k'ãare–it'ee cheruta; chõode wa mãga–e.
18 Ma soldao Jehú badamãi pak'ãri, ichia mãgaji:
—Reypa k'awa k'inia bùda aji, pù chõode cheru wa mãga–e.
Jehupa p'anauji:
—¡Pù–it'ee p'ua–e bùda! aji. Mù ãpùte banapáde aji.
Mãga unuk'ãri, ma murallade bada jâaparipa reymaa jara pëiji:
—Pùa pëida panaji. Mamîda ârá mùa iru unu–eda aji.
19 Mapa reypa awaraa pëiji caballode. Jehú badamãi pak'ãri, mãgùpa mãgaji:
—Reypa k'awa k'inia bùda aji, pù chõode cheru wa mãga–e.
Jehupa p'anauji:
—¡Pù–it'ee p'ua–e bùda! aji. Mù ãpùte banapáde aji.
20 Mãpai ma muralla bada jâaparipa reymaa jara pëiji:
—Chi apema panaji. Mamîda iru ichiaba ãpùtee che–e paji. Chi eperã carretade cheru Nimsi ãichak'e Jehúk'apù bù, ichi carreta pariatua p'era bairã Jehupa ooparik'a.
21 Mãga ûrik'ãri, Joranpa mãgaji:
—¡Mù chõopari carreta atanadapáde! aji.
Mãga oojida. Mãpai Israeldepema rey Jorán Judadepema rey Ocozías ome ãchi carretade uchiajida Jehú ome k'îrachuude. Jezrel pida Nabot eujãde unujida. 22 Joranpa Jehú unuk'ãri, iidiji:
—Jehú, ¿pù tai ome chõo k'inia–e cheruk'ã? aji.
Jehupa p'anauji:
—¿Sãgá tachi k'ãiwee p'anapataadaima aji, pù nawe Jezabel ùt'aa t'â bù misa awaraa ak'õre waibùa apatamaa mãik'aapa chok'araarãmaa ne–inaa k'achia oomaa bù misa?
23 Aramata Jorán ichi carreta p'ùrrabaiji mãik'aapa jirabodoji ãpùtee. Mãga bùde Ocoziamaa biaji:
—¡Ocozías, traicionaa chejida! aji.
24 Mamîda mãgá Jorán jirabododarude, Jehú ichi ematrùma ùap'eda, trùji Joranmaa. Ek'arrade oop'eda, chi @sõde t'îuji. Mãgá Jorán piu wã beeji ichi carretade. 25 Mãpai Jehupa mãgaji chi jâapari Bidcarmaa:
—Atanáji mãik'aapa chi k'ap'ùa piuda bat'at'áaji Jezrel pida Nabotpa eujã iru badade. Mùa k'irãpa bù tachia chi ak'õre Acab carreta t'êe p'era p'anadak'ãri, Tachi Ak'õrepa irudé nãga jara pëiji: 26 ‘Mùa Nabot waa mãik'aapa ichi warrarã waa nuweda unudak'a, pùmaa auk'a p'asait'eeda aji, na eujãde. Mùta, jõmaarã Ak'õre Waibùapa mãga jara bù.’ Tachi Ak'õrepa mãga jarada perã, iru k'ap'ùa atapáde aji, bat'at'aait'ee Nabot eujãde.
Jehupa Judadepema rey Ocozías peeda
(2 Crónicas 22.7-9)
27 Judadepema rey Ocoziapa mãga unuk'ãri, jirabodoji Bet Hagán puntomaa. Mamîda Jehú ichi eere p'anadap'edaarã ome iru t'êe wãjida. Ma wãdade Jehupa mãgaji:
—¡Iru ichiaba peet'aadapáde! aji.
Êp'ejida Gurde, Ibleam k'ait'a. Mama Ocozías p'ua oojida ichi carretade wãde. Mamîda ãchi naa wãji Meguido parumaa. Mama piuji. 28 T'êepai Ocozías mimiapataarãpa ichi k'ap'ùa piuda ateejida Jerusalendee ichi carretade. Mama ùajida ichi chonaarã ùadap'edaamãi David p'uurude.
29 (Acab warra Jorán once año rey bùde Ocozías rey beeji Judá eujãde.)
Jezabel piuda
30 Maap'eda Jehú wãji Jezrel p'uurudee. Jezabelpa iru cheru k'awa atak'ãri, chi tau i p'uruji mãik'aapa chi puda bidaji. Mãpai ventanamãi bainâ banaji. 31 Jehú t'îuk'ãri ma p'uuru t'îupatade, Jezabelpa irumaa mãgaji:
—¿Sãga chejima aji, Zimri? ¿Irua oodak'a pùchi poro waibùa peeji–ek'ã? aji.
32 Mãga ûrik'ãri, Jehupa ùt'aa ak'ùji ma ventanamaa mãik'aapa mãgaji:
—¿K'airãta mù eere p'anùma? aji.
—¡Sîadapáde aji, edaa!
Aramãgá ma ak'ùpataarãpa Jezabel sîajida ma ventanadeepa. Tuda baaik'ãri, chi waa jîchooji ma te paredde mãik'aapa caballoorãde, ichi k'ap'ùa piuda ârù t'ùa p'anù misa. 34 Mãpai Jehú teeda wãji nek'ode mãik'aapa ne–inaa tode.
T'êepai mãgaji ichi mimiapataarãmaa:
—Jã wêra k'achia–idaa jaunadapáde aji, iru rey k'au pada perã.
35 Mamîda wãdak'ãri jãgà baaidamaa, ununajida chi poro, chi bùùrù, chi juajã ome aupai. 36 Jehumaa jaranadak'ãri, ichia mãgaji:
—Tachi Ak'õrepa jaraji iru pedee jarapari Tisbedepema Elías ideepa usaarãpa Jezabel k'ap'ùa piuda k'ok'oodait'ee Jezrel p'uurudeepa taawa. 37 Jaraji usaarãpa chi k'ap'ùa beeda atabëidait'ee Jezrel p'uurudeepa taawa mêe mãik'aapa apidaapa iru k'awada–e pait'ee. Mãga pajida aji, Tachi Ak'õrepa jaradak'a.