Jehupa rey Acab ëreerã k'enat'aada
(2 Crónicas 22.2-9)
10
1 Maapai Samaria p'uurude Acabdeepa uchiadap'edaa warrarã setenta p'anajida. Maperã Jehupa k'art'a p'ã pëiji ma p'uuru poro waibùarãmaa, chonaarãmaa mãik'aapa Acab warrarã jâapataarãmaa. Mãgaji: 2 “Parãpa pãchi waibùa warrarã iru p'anù jãma, ichi caballoorã ome, carreta chõopata ome. Ma awara parã p'uuru pia jâa iru p'anapata mãik'aapa arma iru p'anù. Mapa na k'art'a pak'ãri parãmaa, 3 jùrùt'erátù pãchi waibùa warra aba, chi chõo k'awaara bù mãik'aapa pãchi rey papítù ichi ak'õre pari, jura chõodait'ee perã.”4 Ma k'art'a leedak'ãri, ma p'uurudepemaarã p'eradachida mãik'aapa mãgajida: “Reyrã omeerãpa p'oyaada–e paji pùrã iru ome, ¿sãgá tachia p'oyaadayama? ajida.
5 Mãpai palacio ak'ùpataarã poro waibùa, ma p'uurudepemaarã poro waibùa mãik'aapa chonaarã Acab warrarã jâapataarã ome nãga jara pëijida Jehumaa: “Taipa pùa jararuk'a oodait'eeda ajida. Mamîda rey bùda–e pait'ee. Oopáde ajida, pùchia oo k'iniata.”
6 Mãga k'awak'ãri, Jehupa waya k'art'a p'ã pëiji ãchimaa. Mãgaji: “Parã wãara oo k'inia p'anù pùrã mùa jararuk'a, mãgara pãchi rey waibùa warrarã poro t'ùap'edapáde aji, mãik'aapa nu na hora chedapáde aji, mùmaa Jezrel p'uurude.”
Ma p'uurudepema poro waibùarãpa rey warrarã setenta wari p'anadap'edaa perã, 7 ma k'art'a leedap'eda, aramãgá ma warrarã jõmaweda peek'oojida. Mãpai ãchi poro t'ùap'edap'eda p'e bùjida k'oraade mãik'aapa Jezreldee pëijida Jehumaa. 8 Ãchia pëida panak'ãri Jezrelde, Jehumaa mãgaji:
—Aneejidada aji, rey warrarã poro.
Mãpai Jehupa mãgaji:
—P'eda omeede p'e bùnadapáde aji, p'uuru t'îupatamãi nu paru misa.
9 Aù norema Jehú uchiaji mãik'aapa ak'ùnâ banaji p'uuru pidaarã k'îrapite. Mãpai mãgaji:
—Parãpa ne–inaa k'achia ooda–e paji Tachi Ak'õre k'îrapite. Mùata mùchi poro waibùa peeji. Mamîda ¿k'airãpa nãgùùrã peejidama? aji. 10 Parãpa nãga k'awadaipia bù. Tachi Ak'õrepa jaradak'a Acabdeerã ãpùte jõmaweda uchiait'ee. Iruata na jõma oomaa bù ichia ooit'ee adak'a iru mimiapari, Elías ideepa.
11 T'êepai Jehupa peek'ooji apema Acabdeepa uchiadap'edaarã Jezrelde p'anapatap'edaa; poro waibùarã iru jua ek'ari mimiadap'edaarã, iru k'õp'ãyoorã mãik'aapa p'aareerã iru jua ek'ari mimiapatap'edaa paara. Apida chok'ai uchiapi–e paji.
12 Ma t'êepai Jehú wãji Samaria p'uurudee. Ode wãdade panajida Bet Équed de los Pastoremãi. 13 Mama ununajida Judadepema rey Ocozías âpemaarã ome. Mãpai Jehupa iidiji:
—¿Parã, k'áirãma? aji.
P'anaujida:
—Tai rey Ocozías âpemaarã. Cheruta reydeerã ak'ùde.
14 Mãpai Jehupa mãgaji ichi ome nipadap'edaarãmaa:
—Jita atadapáde aji, chok'ai.
Mãga oojida. Ateejida pozo Bet Équed de los Pastores k'ait'a mãik'aapa peek'oojida. Ùmùk'îraarã cuarenta y dos paji. Apida chok'ai uchiapida–e paji.
15 Jehú mamãik'aapa uchiak'ãri, ununaji Recab warra Jonadab ome. Mãgà eperã che baji Jehú unude. Jehupa saludaap'eda, iidiji:
—¿Pù mù ome t'ãri pia cheruma aji, mù t'ãri pia baparik'a pù ome?
Jonadabpa p'anauji:
—Mãga bùda aji.
Mãpai Jehupa:
—Mãgara pù jua mùmaa teepáde aji. Mãga ook'ãri, Jehupa k'aripaji ichi carretade bataumerã. 16 Mãpai mãgaji:
—Wãdáma aji. Mùa ak'ùpiit'ee mùa oopari Tachi Ak'õrepa oopi bùk'a.
Mãgá wãjida Samaria p'uurudee. 17 P'uurude t'îudap'eda, Jehupa Acabdeepa uchiadap'edaarã jõmaweda p'aneedap'edaa peek'oo wãji. Jõmaweda jõpiji Tachi Ak'õrepa Eliamaa jaradak'a.
Jehupa Baal k'îrapite p'aareerã jõpida
18 Maap'eda Jehupa jara pëiji p'uuru pidaarã jõmaweda chip'edaidamerã. Mãga p'anadak'ãri, mãgaji:
—Acab Baalmaa ùt'aa–ùt'aa t'âpachida aji. Mamîda mù wãara ùt'aa t'âpariit'ee irumaa. 19 Maperã mùa k'inia bù t'â pëidamerã jõmaweda Baal pedee jarapataarã, p'aareerã irumaa ùt'aa t'âpataarã ome. Mùa ne–animalaarã cho–k'ara paait'ee Baal–it'ee. Irude ijãapari apida che–e pùrã, piuit'eeda aji.
Mamîda Jehú seewata mãga jaraji Baalde ijãapataarã chip'edaidamerã abaamãi. Mãgá ichia ma jõmaweda peek'ooi. 20 Ma ewate jara pëiji jõmaarãmaa fiesta waibùa oodait'ee Baal–it'ee. 21 Mãpai ichi mimiapataarã pëiji Israel eujã jõmaade jaradamerã Baalde ijãapataarã chedaipia bù Baal tede fiesta oode. Jõmaweda Baalde ijãapataarã chejida. Apida ãyaa bee–e paji. Baal te p'îu nâbaji. 22 Mãga bak'ãri, Jehupa jaraji p'aru ak'ùpataarã poro waibùamaa p'aru pia atanamerã ma fiesta oopataarã–it'ee. Mãga ooji. 23 T'êepai Jehú ma tede t'îuji Jonadab ome. Mãpai Jehupa mãgaji mama p'anadap'edaa Baalde ijãapataarãmaa:
—Pia ak'ùdapáde aji. K'iniada–e Tachi Ak'õrede ijãapari apida nama beemerã tachi ome. Aba Baalde ijãapataarã k'inia p'anùda aji.
24 Mãpai ma Baalde ijãapataarã t'îujida ma tedepema altar bùmaa ne–animalaarã peede iru–it'ee paa jõpidait'ee. Mãga oomaa p'anùde Jehupa jaraji ichi soldaorã poro waibùamaa soldaorã ochenta bùmerã ma te taawa. Jara pëiji:
—Parãdepema abaapa na tede p'anùùrã apida parã juadeepa jirabodopiru pùrã, piuit'eeda aji.
25 Mãpai Jehupa Tachi Ak'õre–it'ee ne–animalaarã paa jõpip'eda, mãgaji ichi jâapataarãmaa, soldaorã poro waibùarãmaa:
—¡Teeda wãdapáde aji, aùde p'anùùrã peek'oode! ¡Apida uchiapinaadapáde aji, pãchi juadeepa!
Mãgá Jehú eere p'anadap'edaarãpa ma Baalde ijãapatap'edaarã jõmaweda espadapa peek'oojida. Maap'eda mãùrã k'ap'ùa piuda ma te taawaa ateejida. Mãpai waya t'îudak'ãri ma tede, 26 madepema pak'uru awara bùdap'edaa Baal–it'ee paa pëijida 27 mãik'aapa madepema altar ãripijida. T'êepai ma te t'eepijida mãik'aapa ãripijida. Maadamãiipa ârá parumaa ma te badamãi p'uuru pidaarã ã wãpata.
28 Mãgá Jehupa Baal ichide ijãapataarã ome jõpiji Israel eujãde. 29 Jehupa ma jõma ooji mîda, oo amaa–e paji ne–inaa k'achia Nabat warra Jeroboanpa oopida israelitaarãmaa. At'ãri ùt'aa t'âpachi p'ak'a chak'e nêedee ooda k'îrapite Dan p'uurude bada mãik'aapa Betel p'uurude bada.
30 Maap'eda Tachi Ak'õrepa jaraji Jehumaa: “Pùa mù k'îrapite pia ooda perã Acabdeepa uchiadap'edaarã jõmaweda jõpik'ãri, pùdeepa uchiadait'eerã; warrarã, ãichak'eerã, ãchi warrarã, mãùrã warrarã paara rey su–ak'ù beeparide su–ak'ù p'anadait'ee.”
31 Tachi Ak'õrepa mãga jaraji mîda Jehumaa, t'ãripa irua ne–inaa jõmaweda oo–e paji Tachi Ak'õre ûraade jara bùk'a. At'ãri ooji ne–inaa k'achia Jeroboanpa oopidak'a Israel pidaarãmaa.
32 Maapai Tachi Ak'õrepa israelitaarã k'îra unuamaa iru p'anapatap'edaarã pëiji ãchi eujã jãri atadamerã. Siriadepema rey Jazaelpa israelitaarã ome chõopachi ãchi eujã i chaa: 33 Jordán to oriente eere, Galaad eujã, (Gaddeepa uchiadap'edaarã, Rubendeepa uchiadap'edaarã mãik'aapa Manasedeepa uchiadap'edaarã eujã); Aroer eujã Arnón to i k'ait'a; Galaad eujã Basán eujã ome.