Atalía reina pada Judá eujãde Joás rey pada naa
(2 Crónicas 22.10-23.21)
11
1 Rey Ocozías nawe Ataliapa chi warra piuda k'awaa atak'ãri, jùrùji reyrã ëreerã jõmaweda jõpiit'ee ichi iru pari reina bee k'inia bada perã. 2 Mamîda rey Jorán piuda k'au aba, Ocozías âpewêra Josabapa mãga k'awaak'ãri, ichia Ocozías warra aba, Joás awaraa rey warrarã peek'oo wãdap'edaa ik'aawaapa ataji mãik'aapa alcobade merã nâbùji chi ak'ùpari ome. Mãgá Atalía eere p'anadap'edaarãpa mãgà warra p'oyaa peeda–e paji. 3 Joás at'ãri warra bada perã, Tachi Ak'õre tede merã bùjida seis año wãyaaru misa. Mãga nùde Atalía reina paji Judá eujãde.4 Atalía año siete reina bùde p'aareerã poro waibùa t'âjarapatap'edaa Joyadapa jara pëiji chip'edaidamerã soldaorã ciencien poro waibùarã, quereteorã soldaorã, rey jâapatap'edaarã ome. Tachi Ak'õre tede cheepurudap'eda, Joyadapa jaraji Tachi Ak'õre k'îrapite juraadamerã Judadepema rey jâadait'ee mãik'aapa k'aripait'ee. Mãpai ãramaa unupiji Ocozías warra miru bada Joás. 5 Mãpai ma soldaorãmaa mãgaji: “Nãga oodapáde aji. Parã âipata ewari mimiapataarã esa–auk'a pait'ee palaciodepema puerta jâadait'ee. 6 Awaraa esa–auk'a pait'ee Sur apata puerta jâadait'ee. Apema esa–auk'a pait'ee soldaorã te ãpùteik'a eere puerta jâadait'ee. Mãgá t'erabaidak'ãri awaraa soldaorã ome, Tachi Ak'õre te pia jâadait'ee. 7 Mamîda mùa k'inia bù chi t'erabaidap'edaa soldaorã auk'a chedamerã nama Tachi Ak'õre tede tachi rey jâade. 8 Tachi rey wap'ùra atadaipia bù arma panau. Apidaapa parã soldaorã erk'a jira bùde reymaa t'îuru pùrã, peet'aadapáde aji. Mãgá parã wãdaipia bùda aji, rey ome iru wãrumaa.”
9 Ma soldaorã poro waibùarãpa oojida jõmaweda p'aare Joyadapa jaradak'a. Ãchi jua ek'ari soldaorã palacio jâapataarã, chi t'erabaidap'edaarã paara atanajida mãik'aapa Joiadá k'îrapite ak'ùnâ p'ana chejida. 10 Mãpai ma p'aareerã poro waibùapa rey David miasu, escudo ome Tachi Ak'õre tede ùa iru bada teeji ma soldaorã poro waibùarãmaa. 11 Mãpai ma soldaorã arma panau ak'ùnâ p'ananajida Tachi Ak'õre te sur eere, norte eere, altar ik'aawa rey jâadait'ee. 12 Maap'eda Joyadapa rey piuda warra atanaji mãik'aapa rey poro jâra jâ bùji awaraa rey net'aa jâpari ome. Mãpai aceite atap'eda, iru ârù weeji mãik'aapa jaraji ma warra rey pada. Mãga jarak'ãri, jõmaweda arii p'anadap'edaarãpa jua t'aap'ejida mãik'aapa biajida, “¡Tachi rey, pia baparíiji!”
13 Reina Ataliapa ma biuk'a para bee ûrik'ãri, wãji eperãarã see nâbadamaa Tachi Ak'õre tede. 14 Ununaji rey ak'ùnâ bù te bùùrù k'ait'a rey ak'ùnâ p'anapatamãi. Iru ik'aawa unuji Judá eujãdepema poro waibùarã, música chaapataarã ome mãik'aapa eperãarãpa o–îa trompeta chaamaa p'anajida. Mãga unuk'ãri, Ataliapa ichi p'aru jêji t'ãri k'achiapa mãik'aapa biaji:
—¡Mù traicionaajida; mù traicionaajida!
15 Mãpai p'aare Joyadapa k'inia–e pada perã ma reina peet'aadamerã Tachi Ak'õre tede, ma Judadepema soldaorã poro waibùarãmaa mãgaji:
—¡Jita atadapáde aji, mãik'aapa aba beeru pùrã ichi eere, peet'aadapáde! aji.
Joyadapa jara bada perã Atalía peenaadamerã Tachi Ak'õre tede, 16 ateejida caballoorã iru p'anadap'edaamãi, rey te k'ait'a. Mama peet'aajida.
17 Ma t'êepai Tachi Ak'õre k'ap'ùa pari p'aare Joyadapa pacto ooji rey Joás ome mãik'aapa eperãarã ome ãra Ak'õre eperãarã p'anadamerã. Ichiaba rey k'ap'ùa pari pacto ooji eperãarã ome jõmaarãpa p'anapataadamerã Tachi Ak'õre ûraade jara bùk'a. 18 Maap'eda jõmaarã wãjida reina piuda Atalía ak'õre waibùa Baal temaa mãik'aapa ma te t'eepijida. Aùde bada net'aa jõmaweda ãrik'oojida, altar, ne–inaa k'îrak'a bù aù k'îrapite ùt'aa t'âpata ome. Ichiaba Baal pedee jarapari Matán peejida ma tedepema altar k'îrapite. Mãga oodap'eda, p'aare Joyadapa jâapataarã bùji Tachi Ak'õre tede. 19 Mãpai iru, soldaorã ciencien poro waibùarã ome, quereteo soldaorã ome, rey jâapataarã ome ãchi rey ateejida tedeepa palaciomaa. Jâa paraa puertade t'îudap'eda, rey Joás su–ak'ù beeji rey su–ak'ù beeparide. 20 Mãga k'awaadak'ãri, ma p'uurudepemaarã jõmaarã o–îadachida. Ma reina Atalía piuda perã palaciode, ma p'uurudepemaarã k'ãiwee p'aneejida.
21 Joás siete año iru baji rey beek'ãri.