Joás rey pada Judá eujãde
(2 Crónicas 24.1–16)
12
1 Israeldepema rey Jehú año siete rey bùde Joás rey beeji Judá eujãde. Joás Judadepema rey paji cuarenta año wãyaarude. Bapachi Jerusalén p'uurude. Chi nawe t'âpatap'edaa Sibia, Berseba p'uurudepema paji. 2 Joapa ne–inaa pia oopachi Tachi Ak'õre k'îrapite, p'aareerã poro waibùa Joyadapa iru warida perã mãik'aapa Ak'õre net'aa k'awapida perã. 3 Mãga baji mîda, ijãadak'aa beerã ee nok'ode ùt'aa t'âpatap'edaamãi jõmaweda ãripi–e paji. Mapa ma p'uurudepemaarãpa mama at'ãri ne–animalaarã peepachida paadait'ee mãik'aapa ne–inaa t'ûa bapari paapachida.4 Ewari aba Joapa mãgaji p'aareerãmaa:
—P'arat'a tee chepata Tachi Ak'õre–it'ee jõmaweda p'e atadapáde aji. P'edapáde aji, eperã chaachaa p'arat'a p'aapari impuestok'a, awaraa p'arat'a tee chepata primiciak'a ome. 5 Maap'eda jaradapáde aji, Tachi Ak'õre te ak'ùpataarãpa chi te chiwidi oodamerã, ûk'uru p'ok'eedai wã perã.
6 Reypa mãga jaraji mîda, año veintitrés ichi rey bùde ma p'aareerãpa waide te chiwidi oopida–e paji. 7 Mapa rey Joapa ma p'aareerã t'âpiji ãchi poro waibùa Joyadá ome mãik'aapa ãramaa iidiji:
—¿Sãap'eda parãpa waide Tachi Ak'õre te chiwidi oopida–ema? aji. Ârawedadeepa p'arat'a p'epataarãpa parãmaa waa teeda–e pait'ee. Ma awara parãpa p'arat'a p'e atadap'edaa teedaipia bù ma mimia–it'ee.
8 Ma p'aareerãpa ijãajida, wãara ma mimia ak'ù k'iniada–e pada perã. 9 Maap'eda p'aareerã poro waibùa Joyadapa baalte atap'eda, uria ma–ãri ooji ma t'ap'ade. Mãpai ma baalte bùji Tachi Ak'õre tedepema puerta k'ait'a altar bada juaraare; eperãarã wãyaapata eere. Mãgá p'aareerã, chi ma puerta jâapatap'edaarãpa p'arat'a eperãarãpa tee chedap'edaa primiciak'a bùjida ma baaltede. 10 Unudak'ãri ma baalte p'arat'apa ipuru wã, rey p'arat'a juasiapari, p'aareerã poro waibùa ome ma p'arat'a juasia chejida. Mãgá juasiadap'eda mãik'aapa p'ãdap'eda jõmasaa p'arat'a bù, bolsade ùa bùjida 11 mãik'aapa teejida te oopataarã poro waibùarãmaa. Mãpai mãùrãpa pak'uru t'êpataarã awaraa ne–inaa oo k'awapataarã ome jùrùjida ma mimia oodamerã Tachi Ak'õre tede. 12 Ma p'arat'apa neto atajida pak'uru, mãu, ne–inaa awaraa falta bada ome mãik'aapa p'aajida mãu t'ùù k'awaa beerã ãchi mimia pari. 13 Mamîda ma p'arat'a eperãarãpa tee chedap'edaa Tachi Ak'õre–it'ee; mãgùpa neto atada–e paji pailak'a bù wa ne–inaa k'usarrak'a bee wa awaraa ne–inaa p'arat'adee oopata wa nêedee oopata iru p'anadait'ee ma tede. 14 Aba ma p'arat'apa atajida ne–inaa falta bada ma te chiwidi oodait'ee. 15 Ma p'arat'a teejida ma te oopataarã poro waibùarãmaa ãchia neto atadamerã ne–inaa falta bada mãik'aapa ma mimiapataarã p'aadamerã. Iidida–e paji ne–inaa jõmaweda p'ã bùdamerã ak'ùpidait'ee p'aareerã poro waibùamaa, ma mimiapataarã poro waibùarã nechùadak'aa pada perã. Ma mimia t'ãri jîp'a oojida. 16 Israelitaarãpa p'arat'a teedak'ãri primiciak'a p'ek'au k'achia oodap'edaa k'aurepa, k'îsiap'eda wa k'îsiada–ee oodap'edaa paara bùda–e paji ma p'arat'a ome, mãgee primiciadepema p'arat'a p'aareerã–it'ee pada perã.
17 Maapai Siriadepema rey Jazael chõonaji Gat p'uurudee mãik'aapa ma p'uuru p'oyaaji. Maap'eda Jerusalendee auk'a p'oyaade wãit'ee paji. 18 Mãga k'awa atak'ãri, rey Joapa ne–inaa jõmaweda ichi chonaarãpa teedap'edaa Tachi Ak'õre–it'ee primiciak'a p'e ataji. Ma net'aa teejida reyrã Josafatpa, Joranpa, Ocoziapa mãik'aapa ichi k'ap'ùak'ùpa. Ma net'aa pia mãik'aapa nêe ùa bùdap'edaa Tachi Ak'õre tede mãik'aapa palaciode p'e atap'eda, pëiji Jazaelmaa chõo chenaamerã Jerusalende. Mãgá Jazaelpa Jerusalén p'uuru ichiak'au bùji.
19 Awaraa ne–inaa ooda Joapa p'ã bù Crónicas apata librode awaraa ne–inaa Judadepema reyrãpa oopatap'edaa ome. 20 Joás rey bùde iru ek'ari beerã pedeeteejida iru peedait'ee. Mãgá iru peejida Bet Miló tede, Sila o wãparide. 21 Mãgá Simat warra, Josacar Semer warra, Jozabad ome Joás peet'aajida. Piuk'ãri, ùajida David p'uurude. Ma t'êepai Joás warra Amasías rey beeji ichi pari.