Joacaz rey pada Israelde
13
1 Judadepema rey Ocozías warra Joás año veintitrés rey bùde Jehú warra Joacaz rey beeji Israelde. Rey baji diecisiete año wãyaarude. Mãga nùde bapachi Samaria p'uurude. 2 Joacazpa ne–inaa k'achia oopachi Tachi Ak'õre k'îrapite. Auk'a oopachi Nabat warra Jeroboanpa oopariidak'a israelitaarã k'achiade baaipik'ãri. 3 Mãgá auk'a ne–inaa k'achia oopachi perã, Tachi Ak'õre k'îraupiji israelitaarã ome. Mapa Tachi Ak'õrepa israelitaarã baaipiji Siriadepema rey Jazael juade mãik'aapa ichi warra Ben Adad juade.4 Israelitaarã mãùrã jua ek'ari p'anùde rey Joacazpa ùt'aa iidiji Tachi Ak'õremaa ãchi chupùria k'awaamerã. Tachi Ak'õrepa ma chupùria iidida ûriji, irua unuda perã ma Siriadepema reyrãpa israelitaarã k'achia iru p'anadap'edaa. 5 Tachi Ak'õrepa eperã pëiji ãchi uchiapimerã ma Siriadepemaarã jua ek'ariipa. Mãgá israelitaarã waya k'ãiwee p'anapachida ãchi eujãde. 6 Tachi Ak'õrepa ãchi mãgá k'aripaji mîda, Israel pidaarã auk'a ne–inaa k'achia oopachida Jeroboandeepa uchiadap'edaarãpa oopatap'edaak'a. Ma awara mãùrã ak'õre waibùa Aserá apatap'edaa k'îrak'a bù at'ãri iru p'anapachida Samaria p'uurude.
7 Siriadepema rey eere p'anadap'edaarãpa Israeldepema soldaorã audú jõpijida. Maperã rey Joacazpa mak'ùara soldaorã wêe beeji: soldaorã caballode wãpata cincuentapai; carreta caballoorãpa jidiupata diezpai; soldaorã jîte wãpata diez milpai.
8 Awaraa ne–inaa oopata Joacazpa ichi bapariida ome p'ã bù Crónicas apata librode awaraa Israeldepema reyrãpa oopatap'edaa ome. 9 Joacaz piuk'ãri, ùajida Samaria p'uurude. Iru piuda t'êepai chi warra t'âpatap'edaa Joás rey beeji ichi pari.
Joás rey pada Israelde
10 Judadepema rey Joás treinta y siete año rey bùde, Joacaz warra ichiaba t'âjarapatap'edaa Joás, rey beeji Israel eujãde. Rey baji dieciséis año wãyaarude. Mãga nùde Samaria p'uurude bapachi. 11 Rey Joapa ne–inaa k'achia oopachi Tachi Ak'õre k'îrapite. Oo amaa–e paji Nabat warra Jeroboanpa ne–inaa k'achia oopariida israelitaarã k'achiade baaipik'ãri.
12 Awaraa ne–inaa ooda Joapa ichi bapariida ome mãik'aapa jura chõoda Judadepema rey Amasías ome p'ã bù Crónicas apata librode awaraa Israeldepema reyrãpa oopatap'edaa ome. 13 Joás piuk'ãri, ùajida Samaria p'uurude awaraa Israeldepema reyrã ùadap'edaamãi. Ichi piuda t'êepai Jeroboán rey beeji.
Tachi Ak'õrepa jarapida Eliseomaa, iru jai–idaai naaweda
14 Joás at'ãri israelitaarã rey bùde k'awa ataji Eliseo juak'aya bù. Mapa wãji Eliseo ak'ùde. Mãgá juak'aya unuk'ãri, jêedachi mãik'aapa mãgaji:
—Mù ak'õre, mù ak'õre, ¡pùa Israel pipùara k'aripapari soldaorã caballode wãpataarã k'ãyaara mãik'aapa carretade wãpataarã k'ãyaara!
15 Mãpai Eliseopa mãgaji Joamaa:
—Ematrùma atapáde aji, sia ome.
Mãga ooji Joapa.
16 Mãpai Eliseopa mãgaji:
—Jã ematrùma atapáde aji, pùchi juade.
—Ventana oriente eere bù ewapáde aji.
Mãga ooji reypa. Mãpai Eliseopa mãgaji:
—Ârá trùpáde aji.
Reypa mãga ooji. Mãpai Eliseopa:
—¡Mãgá Tachi Ak'õrepa Siria eujãdepemaarã p'oyaapiit'eeda aji, pùmaa! ¡Pùa mãùrã jõpiit'ee Afecde!
18 Ma t'êepai Eliseopa mãgaji reymaa:
—Atapáde aji, awaraa sia.
Reypa mãga ook'ãri, Eliseopa mãgaji:
—Ârá ma siapa te jã wùpáde aji.
Reypa ma te jã wùma õpee wùji ma siapa. 19 Mãga unuk'ãri, Eliseo k'îraudachi rey Joás ome wùma chok'araara wù–e pada perã. Mãgaji:
—Pùa wùma joisomaa wa seis wùda paara pùa Siriadepemaarã jõpik'ajida aji, mùa jaradak'a. Mamîda mãga ooda perã, p'oyaada õpeepai p'oyaait'eeda aji.
20-21 T'êepai Eliseo jai–idaaji mãik'aapa ùajida. Maap'eda awaraa piuda ùa p'anadak'ãri Eliseo ùadap'edaa k'ait'a, atu p'anùde Moab eujãdepema nechù–idaa beerã chejida. Mãùrã waidoopa ma ùa p'anadap'edaarãpa ma k'ap'ùa piuda bat'at'aajida Eliseo ùa badamãi. Mãpai jirabodojida. Mamîda ma piuda k'ap'ùa Eliseo k'ap'ùa piuda beeda t'õbaik'ãri, ma eperã piu bada chok'ai p'irabaiji.
22 Rey Joacaz chok'ai bùde Siriadepema rey Jazaelpa israelitaarã k'achia iru baji ichi juade. 23 Mamîda Tachi Ak'õrepa israelitaarã chupùria k'awaaji irua ak'ùit'ee ada perã ãchi chonaarã Abrahammaa, Isaacmaa, Jacobmaa. Mapa ãchi jõpi–e paji ma Siriadepema reymaa. Tachi Ak'õrepa israelitaarã mãgá ak'ù bapari ârá parumaa.
24 Siriadepema rey Jazael piuk'ãri, chi warra Ben Adad rey beeji iru pari. 25 Mãgà rey bùde Joacaz warra Joapa ma Siriadepema rey ak'õrepa p'uuru jãri atada waya bùji ichi jua ek'ari. Ma awara Joapa ma Siriadepema rey Ben Adad p'oyaama õpee p'oyaaji. Mãgá Israel eujãdepema p'uuru ataji mãik'aapa bùji ichi jua ek'ari.