Amasías rey pada Judade
(2 Crónicas 25.1-28)
14
1 Año omé Joacaz warra Joás rey bùde Israel eujãde, Judadepema rey Joás warra t'âjarapatap'edaa Amasías rey beeji Judade. 2 Amasías veinticinco año iru baji rey beek'ãri. Rey baji veintinueve año wãyaarude. Mãga nùde bapachi Jerusalén p'uurude. Chi nawe Joadán Jerusalendepema paji. 3 Rey Amasiapa ne–inaa pia oopachi Tachi Ak'õre k'îrapite. Mamîda jõma oo–e paji chonaarãwedapema rey Davidpa oodak'a. Ne–inaa jõma ooji chi ak'õre Joapa oodak'a. 4 Mamîda ijãadak'aa beerã ee nok'ode p'anadap'edaa ùt'aa t'âpata te jõpi–e paji. Maperã Judadepemaarãpa at'ãri ne–animalaarã mãik'aapa ne–inaa t'ûa bapari paapachida mama.5 Amasías rey pak'ãri, jõmaweda chi ak'õre peedap'edaarã peepiji. 6 Mamîda mãùrã warrarã peepi–e paji Tachi Ak'õre ley p'ãdade Moisepa nãga jara bairã: “Eperã ak'õreerã peedaik'araa bù ãchi warrapa ne–inaa k'achia ooda k'aurepa. Ichiaba warrarã peedaik'araa bù ãchi ak'õreerãpa ne–inaa k'achia oodap'edaa k'aurepa. Eperã chaachaa piuipia bù ichia ne–inaa k'achia ooda k'aurepa; mãgee ne–inaa ooda k'aurepa mùa jarada peedamerã.”
7 Amasías rey bùde chõonaji Edomdepemaarã ome Valle de la Salde. Edom pidaarã diez mil peejida mãik'aapa ãchi soldaorã p'anapatap'edaamãi Selá jãri atajida. Maap'eda ma punto t'â bùjida Joctel.
8 Ma t'êepai Amasiapa nãga jara pëiji Israeldepema rey Jehú ãichak'e, Joacaz warra Joamaa. “Chepáde aji, tai k'îrapite pedeedamerã.” 9 Mamîda Joapa nãga jara pëiji: “Libanodepema cardo apata pak'uru jep'edaa ne–ùùrù–idaa bùpa jara pëiji cedro apata pak'uru pia bùmaa: ‘Pù k'au teepáde aji, mù warramaa miak'ãidamerã’ Mamîda t'êepai ne–animal k'achia bùpa ma cardo ârù t'ùanajida. 10 Mùa k'awa bùda aji, pùa Edom pidaarã p'oyaada. Maperãpù audua ni. Mamîda pùchi tede beeipia bù mù ome t'îuru pùrã, k'achiade baaiit'ee perã; pù, Judadepemaarã pù jua ek'ari p'anùùrã paara.”
11 Israeldepema rey Joapa mãga jara pëiji mîda, Judadepema rey Amasiapa ma pedee ûriamaa beeji. Maperã Joapa ichi soldaorã p'e atap'eda, wãji Amasías ichi eere p'anadap'edaarã ome chõode. Unujida Bet Semes p'uurude Judá eujãde. 12 Ma ewate israelitaarãpa Judadepemaarã p'oyaajida. Mapa Judadepemaarã jîchoojida ãchi te chaa. 13 Ma Bet Semede chõo p'anùde Israeldepema rey Joapa Judadepema rey Amasías jita ataji mãik'aapa wãji Jerusalén p'uurudee. Ma p'uuru t'ùak'au bada muralla ãripiji Puerta de Efraindeepa Puerta de la Esquina parumaa; ciento ochenta metro. 14 Ma awara jãri ata wãji nêe, p'arat'a, net'aa pi–ia Tachi Ak'õre tede ùa bada mãik'aapa palaciode ùa bada. Mãpai eperãarã ûk'uru jita atap'eda, ãpùtee ateeji Samaria p'uurudee.
15 Awaraa ne–inaa ooda rey Joapa ichi bapariida ome mãik'aapa ma jura chõoda rey Amasías ome p'ã bù Crónicas apata librode awaraa Israeldepema reyrãpa ne–inaa oopatap'edaa ome. 16 Joás piuk'ãri, ùajida Samaria p'uurude awaraa Israeldepema reyrã ùadap'edaamãi. Joás piuda t'êepai chi warra Jeroboán rey paji.
17 Israeldepema rey Joacaz warra Joás piup'eda, Judadepema Amasías quince año waapùara bapachi. 18 Awaraa ne–inaa Amasiapa ooda p'ã bù Crónicas apata librode awaraa Judadepema reyrãpa oopatap'edaa ome.
19 Amasías Jerusalende bùde ûk'uru eperãarãpa pedeeteejida iru peedait'ee. Mãga k'awa atak'ãri, Amasías wãji Laquis p'uurudee. Mamîda iru t'êe wãjida mãik'aapa mama peejida. 20 Maap'eda iru k'ap'ùa piuda caballo ârù ateejida Jerusalendee. Mama ùajida ichi chonaarã ùadap'edaamãi David p'uurude. 21 T'êepai Judadepemaarãpa Amasías warra t'âjarapatap'edaa Azarías rey bùji iru pari. Azarías dieciséis año iru baji rey beek'ãri. 22 Azarías ak'õre piuda t'êepai, irua Elat p'uuru chiwidi oopiji, ma p'uuru waya bùp'eda Judadeepa uchiadap'edaarã jua ek'ari.
Jeroboán II rey pada Israelde
23 Judadepema rey Joás warra Amasías año quince rey bùde, Israeldepema rey Joás warra Jeroboán rey beeji Israelde. Ma Jeroboán rey paji cuarenta y un año wãyaarude. Bapachi Samaria p'uurude. 24 Jeroboanpa ne–inaa k'achia oopachi Tachi Ak'õre k'îrapite. Auk'a oopachi Nabat warra Jeroboanpa oopariidak'a israelitaarã k'achiade baaipik'ãri.
25 Jeroboanpa Israel eujã i waya bùji Jamat p'uuru t'îupatadeepa p'usa Arabá apata parumaa. Aù naaweda israelitaarã Ak'õre Waibùapa jaraji Jeroboanpa mãga ooit'ee. Mãga jaraji iru mimiapari Jonás ideepa. Ma Jonás Gat Jeferdepema Ak'õre pedee jarapari, Amitay warra paji. 26 Tachi Ak'õrepa mãga ooji israelitaarã–it'ee ãchi chupùria k'awaada perã. Chupùria p'anapachida mãik'aapa k'aripapari apida wê–e paji. 27 Maperã Ak'õrepa ãchi k'aripaji rey Joás warra Jeroboán k'ap'ùa pari. K'inia–e paji israelitaarã jõmaweda jõdamerã.
28 Awaraa ne–inaa ooda Jeroboanpa ichi bapariida ome mãik'aapa jura chõoda ome Damasco p'uuru, Jamat p'uuru ome waya bùit'ee israelitaarã jua ek'ari; ma jõma p'ã bù Crónicas apata librode, awaraa Israeldepema reyrãpa ne–inaa oopatap'edaa ome. 29 Jeroboán piuk'ãri, ùajida awaraa Israeldepema reyrã ùadap'edaamãi. Iru piuda t'êepai chi warra Zacarías rey beeji iru pari.