Azarías rey pada Judade
(2 Crónicas 26.3-5, 16-23)
15
1 Israeldepema rey Jeroboán año veintisiete rey bùde, Judadepema rey Amasías warra Azarías rey paji Judade. 2 Dieciséis año iru baji rey beek'ãri. Rey paji cincuenta y dos año wãyaarude. Mãga nùde bapachi Jerusalén p'uurude. Chi nawe Jecolías ma p'uurudepema paji.3 Azariapa ne–inaa pia oopachi Tachi Ak'õre k'îrapite, chi ak'õre Amasiapa oopatak'a. 4 Mamîda, ee nok'ode p'anadap'edaa ijãadak'aa beerã ùt'aa t'âpata te ãripi–e paji. Mapa eperãarãpa at'ãri ne–animalaarã, ne–inaa t'ûa bapari paapachida mama. 5 Rey bùde Azariapa ne–inaa k'achia ooji Tachi Ak'õre tede. Maperã Tachi Ak'õrepa irumaa lepra k'ayaa baripiji. Mãgá k'ayaa bada perã iru ituaba bapachi ichi palaciode mãik'aapa rey mimia p'oyaa oo–e paji. Mãga beeji iru piurumaa. Maperã chi warra Jotanpa Judadeepa uchiadap'edaarã ak'ùpachi chi ak'õre pari.
6 Awaraa ne–inaa Azariapa ooda p'ã bù Crónicas apata librode awaraa Judadepema reyrãpa oopatap'edaa ome. 7 Azarías piuk'ãri, ùajida chi chonaarã ùadap'edaamãi David p'uurude. Iru piuda t'êepai chi warra Jotán rey paji iru pari.
Zacarías rey pada Israelde
8 Judadepema rey Azarías treinta y ocho año rey bùde, Jeroboán warra Zacarías rey beeji Israelde. Rey baji atane seipai. Mãga nùde bapachi Samaria p'uurude. 9 Zacariapa ne–inaa k'achia oopachi Tachi Ak'õre k'îrapite, ichi chonaarãpa oopatap'edaak'a. Auk'a oopachi Nabat warra Jeroboanpa ne–inaa k'achia oopariidak'a israelitaarã k'achiade baaipik'ãri.
10 Zacarías rey bùde Jabés warra t'âjarapatap'edaa Salunpa k'îsia iru baji iru peede. Mãga ooji. Zacarías peeji eperãarã taide. Mãpai Salún rey beeji iru pari.
11 Awaraa ne–inaa Zacariapa ooda p'ã bù Crónicas apata librode awaraa Israeldepema reyrãpa oopatap'edaa ome. 12 Zacarías piuk'ãri, p'asaji Tachi Ak'õrepa naaweda jaradak'a Jehumaa, jarak'ãri irudeepa uchiadait'eerã rey pait'ee chi ãichak'e warra parumaa aupai.
Salún rey pada Israelde
13 Jabés warra Salún rey beeji Judadepema rey Uzías treinta y nueve año rey bùde. Mamîda Salún rey paji Samariade atane abapai. 14 Gadí warra t'âjarapatap'edaa Menajem Tirsá p'uurudeepa chep'eda Samariadee, Salún ârù wãji mãik'aapa peeji. Mãgá Menajem rey beeji iru pari.
15 Awaraa ne–inaa Salunpa ooda, ichia rey Zacarías peeda ome p'ã bù Crónicas apata librode, awaraa Israeldepema reyrãpa oopatap'edaa ome.
16 Menajem rey bùde uchiaji ichi p'uuru Tirsadeepa chõonait'ee Tifsa p'uurudee. Ma p'uurudepemaarã peek'oo wãji ãchi p'uurude chõonak'ãri, ãchi muralladepema puerta ewadaamaa p'anadap'edaa perã. T'êepai t'îuk'ãri, wêra biak'oo beerã bi t'ooji t'ãri k'achiapa. Maap'eda ma p'uurudepema net'aa pia jõmaweda jãri ataji.
Menajem rey pada Israelde
17 Judadepema rey Azarías treinta y nueve año rey bùde, Gadí warra Menajem rey beeji Israelde. Rey paji diez año wãyaarude. Mãga nùde bapachi Samaria p'uurude. 18 Menajempa ne–inaa k'achia oopachi Tachi Ak'õre k'îrapite. Auk'a oopachi Nabat warra Jeroboanpa oopariidak'a Israel pidaarã k'achiade baaipik'ãri.
Manahem rey bùde 19 Asiriadepema rey Pul chõo cheji Israelde. Mamîda iru ome chõoi k'ãyaara, Menajempa teeji treinta y tres mil kilo p'arat'a ma Asiriadepemaarã ichi eere t'îudamerã. 20 Ma p'arat'a ataji israelitaarã p'arat'a paraa beerã juak'aawa. P'arat'a kilo esa–auk'a waa ãra chaachaa p'aapiji. Ma p'arat'a atap'eda, Asiriadepema rey k'ãiwee ãpùtee wãji ichi eujãdee.
21 Awaraa ne–inaa Menajempa ooda p'ã bù Crónicas apata librode awaraa Israeldepema reyrãpa oopatap'edaa ome. 22 Menajem piup'eda, chi warra Pecajías rey beeji ichi pari.
Pecajías rey pada Israelde
23 Judadepema Azarías año cincuenta rey bùde Menajem warra Pecajías rey beeji Israelde. Rey baji año omé wãyaarude Mãga nùde bapachi Samaria p'uurude. 24 Pecajiapa ne–inaa k'achia oopachi Tachi Ak'õre k'îrapite. Oopachi Nabat warra Jeroboanpa oopatak'a israelitaarã k'achiade baaipik'ãri.
25 Mamîda Pecajías rey bùde ichi ek'ari beerãdepema aba, Remalías warra t'âjarapatap'edaa Pecajpa k'îsia iru beeji iru peeit'ee. Galaaddepemaarã cincuenta p'e atap'eda, palaciode chõonajida mãik'aapa Pecajías peejida. Ma t'êepai Pecaj rey beeji Israelde.
26 Awaraa ne–inaa Pecajiapa ooda p'ã bù Crónicas apata librode awaraa Israeldepema reyrãpa oopatap'edaa ome.
Pecaj rey pada Israelde
27 Judadepema Azarías cincuenta y dos año rey bùde, Remalías warra Pecaj rey beeji Israelde. Rey baji veinte año wãyaarude. Mãga nùde bapachi Samaria p'uurude. 28 Pecajpa ne–inaa k'achia oopachi Tachi Ak'õre k'îrapite. Oopachi Nabat warra Jeroboanpa oopatak'a israelitaarã k'achiade baaipik'ãri.
29 Pecaj Israelde rey bùde Asiriadepema rey Tiglat Piléser chõo cheji Israel eujãde. Mãgá Asiriadepemaarãpa jãri ata wãjida nãgà eujã: Iyón, Abel Betmacá, Janoa, Cedes, Jazor, Galaad, Galilea, jõmaweda Neftalideepa uchiadap'edaarã eujã paara. Mãgá p'oyaadap'eda, ma eujãdepemaarã p'e ateejida Asiriadee. 30 Maapai Elá warra t'âpatap'edaa Oseas k'îsia iru beeji Remalías warra Pecaj peeit'ee. Mãga ooji. Mãgá ma Oseas rey beeji Pecaj pari. Mãga paji Judadepema rey Amasías, ichiaba t'âjarapatap'edaa Uzías, warra Jotán año veinte rey bùde.
31 Awaraa ne–inaa Pecajpa ooda p'ã bù Crónicas apata librode awaraa Israeldepema reyrãpa oopatap'edaa ome.
Jotán rey pada Judade
(2 Crónicas 27.1-9)
32 Israeldepema Remalías warra Pecaj año omé rey bùde, Uzías warra Jotán rey beeji Judade. 33 Jotán veinticinco año iru baji rey beek'ãri. Rey paji dieciséis año wãyaarude. Mãga nùde Jerusalende bapachi. Chi nawe Sadoc k'au paji; t'âjarapatap'edaa Jerusa.
34 Jotanpa ne–inaa pia oopachi Tachi Ak'õre k'îrapite, chi ak'õre Oziapa oopariidak'a. 35 Jotanpa puerta chiwidi oopiji Tachi Ak'õre te t'ùak'au bada murallade. Mãgá irua ne–inaa pia oopachi mîda, ee nok'ode p'anadap'edaa ijãadak'aa beerã ùt'aa t'âpata te, ãchia ne–animalaarã ne–inaa t'ûa bapari ome paapatamãi ãripi–e paji.
36 Awaraa ne–inaa Jotanpa ooda p'ã bù Crónicas apata librode awaraa Judadepema reyrãpa oopatap'edaa ome.