Acaz rey pada Judade
(2 Crónicas 28.1-27)
16
1 Remalías warra Pecaj año diecisiete rey bùde Israelde, Jotán warra Acaz rey beeji Judade. 2 Acazpa veinte año iru baji rey beek'ãri. Rey paji dieciséis año wãyaarude. Mãga nùde Jerusalende bapachi. Tachi Ak'õre k'îrapite Acaz oo–e paji ne–inaa pia, chi chonaa Davidpa oopariidak'a. 3 Ma k'ãyaara ne–inaa k'achia oopachi Israeldepema reyrãpa oopatap'edaak'a. Ichi warra paa peepiji awaraa ak'õre waibùa apatap'edaa–it'ee ma eujãdepemaarãpa oopatap'edaak'a. Mãga ooji ma k'aurepa Tachi Ak'õrepa ma eperãarã jërek'ooji mîda israelitaarã naa ma eujãde t'îudak'ãri. 4 Ma awara Acazpa ne–animalaarã ne–inaa t'ûa bapari ome paaji ee nok'ode ijãadak'aa beerã ùt'aa t'âpata tede mãik'aapa pak'uru ek'ari, ne–uudap'edaamãi; ãchia oopatap'edaak'a.5 Acaz rey bùde Siriadepema rey Rezín Israeldepema rey Remalías warra Pecaj ome Jerusalén p'uuru pidaarã ome chõo chejida. Mamîda p'oyaada–e paji Acaz eere p'anadap'edaarã ome. 6 Maapai ichiaba Edomdepema rey chõo cheji Judá eujãde. Ma chõode Edomdepemaarãpa Elat p'uuru jãri atajida mãik'aapa jãmãik'aapa Judadepemaarã jërek'oojida. Edom pidaarã at'ãri mama p'anapata.
7 Ma t'êepai Acazpa jara pëiji Asiriadepema rey Tiglat Pilesermaa ichi k'aripa chemerã Siriadepemaarã juadeepa mãik'aapa israelitaarã juadeepa. Nãga jara pëiji: “Mù pù mimiapari. Mù pùchi warrak'a. Maperã chéji mù k'aripade Siriadepemaarã juadeepa mãik'aapa israelitaarã juadeepa, ãchia mù eere p'anùùrã ome chõo p'anù perã.”
8 Ma k'art'a ome Acazpa pëiji p'arat'a, nêe ome Tachi Ak'õre tede ùa bada mãik'aapa palaciode ùa bada. 9 Maap'eda ma Asiriadepema reypa ichi soldaorã p'e atap'eda, Damasco p'uurudee wãji chõode. P'oyaajida mãik'aapa Damascode p'anapatap'edaarã ateeji Quir p'uurudee aùde p'anapataadamerã. Ma chõode Siriadepema rey Rezín peejida.
10 Maap'eda rey Acaz wãji Damascodee Asiriadepema rey Tiglat Piléser ome k'îrachuude. Altar choma mãpemaarã ak'õre waibùa apatap'edaa–it'ee unuk'ãri, Acazpa ma altar k'îrak'a bù dibujo oopip'eda, pëiji p'aareerã poro waibùa Uriamaa mãgee altar oomerã Tachi Ak'õre te k'îrapite. Mãga ooji Asiriadepemaarãpa iru pia ak'ùdamerã. 11 Mãgá Acaz Damascode bù misa, Uriapa altar chiwidi ooji Acazpa jara pëidak'a. Oo iru baji Acaz ãpùtee chek'ãri.
12 Mãgá rey Acaz Damascodeepa pachek'ãri, ma altar unuji mãik'aapa aùde ne–animalaarã paa jõpiji. 13 Ichiaba net'a tau tee cheji mãik'aapa vino weeji ma altar ârù. Ichiaba vino jîap'eji ma ne–animalaarã peedap'edaa waa ârù.
14 Ma t'êepai Acazpa jaraji altar ooda Tachi Ak'õrepa jaradak'a broncedee iru te k'ait'aara ateedamerã. Mãgá ma altar broncedee ooda beeji norte eere Tachi Ak'õre te ma altar chiwidi esajîak'a. 15 Maap'eda jaraji p'aareerã poro waibùa Uriapa ne–animal Tachi Ak'õre–it'ee tap'eweda paapata rey pari peemerã paa jõpiit'ee ma altar choma chiwidide mãik'aapa net'a tau k'ewara paapata rey pari paa jõmerã ma altarde. Auk'a eperãarã pari ne–animal Tachi Ak'õre–it'ee paa jõpiji mãik'aapa net'a tau paa jõpiji, vino weepiji ma altarde. Ichiaba jaraji ne–animalaarã paapatap'edaadepema waa jîap'edamerã ma altar chiwidide. Jaraji ma altar broncedee oodade iruapai ne–animalaarã paapiit'ee Tachi Ak'õrepa oopi k'inia bù k'awa k'inia bak'ãri.
16 P'aare Uriapa jõma ooji rey Acazpa jaradak'a. 17 Acazpa jaraji Tachi Ak'õre te ik'aawa bada pailak'a k'aipee p'anù ãyaa ateedamerã. Ichiaba jaraji pailak'a choma bù p'ak'a ùmùk'îra k'îrak'a bù ârù bada ma k'ãyaara bùdamerã mãu ârù. 18 Ichiaba Asiriadepema reypa iru pia ak'ùmerã Acazpa jaraji chi rey su–ak'ù beepari bùmãi Tachi Ak'õre tede bada ãyaa ateedamerã mãik'aapa rey puerta jâa bùdamerã.