Asiriadepemaarãpa israelitaarã p'oyaadap'edaa
17
1 Judadepema rey Acaz año doce rey bùde Elá warra Oseas rey beeji Israelde. Rey paji nueve año wãyaaru misa. Samaria p'uurude bapachi. 2 Rey Oseapa ne–inaa k'achia oopachi Tachi Ak'õre k'îrapite. Mãga ooji mîda, audú ne–inaa k'achia oo–e paji awaraa Israeldepema reyrãpa oopatap'edaak'a.3 Oseas rey bùde Asiriadepema rey Salmanasar chõo cheji iru ome. Maapai israelitaarã ãchi rey ome p'anapachida Asiria pidaarã jua ek'ari. 4 Mamîda rey Salmanasarpa k'awa ataji Oseapa k'îsia iru bada iru juadeepa uchiait'ee. Nãga paji. Oseapa ichi ek'ari beerã ûk'uru pëiji Egiptodepema rey So k'aripa iidide mãgá israelitaarã uchiadai jîak'aapa ma Asiriadepemaarã jua ek'ariipa. Ma awara Oseapa impuesto p'aa amaa beeji Asiriadepema rey Salmanasarmaa. Maperã Salmanasarpa jaraji ichi soldaorãmaa Oseas atanadamerã mãik'aapa carcelde t'ù nâbùdamerã. 5 Maap'eda Asiria pidaarã chõo chejida Israelde. Año õpee wãyaaru misa ãchi chõojida Samaria p'uuru p'oyaadait'ee. 6 Mãgá Oseas año nueve rey bùde, ma Asiriadepema reypa Samaria p'uuru p'oyaaji mãik'aapa israelitaarã ateepiji Asiria eujãdee. Mama p'anapijida Jalaj, Gozande Jabor to ide bada mãik'aapa Media pidaarã p'anapatap'edaa p'uurude.
7 Tachi Ak'õrepa israelitaarã mãgá t'ùmà ateepiji ãchia ne–inaa k'achia oopatap'edaa perã iru k'îrapite. Iruata Egipto eujãdeepa, Egipto pidaarã Faraón juadeepa uchiapiji. Mãga ooji mîda, ãchi ùt'aa t'âpachida awaraa ak'õre waibùa apatap'edaamaa. 8 Oopachida awaraa eujãdepemaarãpa oopatap'edaak'a; ma eujãdepemaarã Tachi Ak'õrepa jërek'ooda ãchi eujãdeepa. Ichiaba ne–inaa k'achia oopachida ãchi reyrãpa oopatap'edaak'a.
9 Ma awara israelitaarãpa merã ne–inaa k'achia oopachida Tachi Ak'õre ãpùte, iru ãchi Ak'õre Waibùa baji mîda. Ãchi p'uuru bee chaa ijãadak'aa beerã ùt'aa t'âpata te oojida; soldaorã p'uurude paara, eujã ak'ùpata torre badamãi paara. 10 Ma awara mãu awara bùjida awaraa ak'õre waibùa apatap'edaa–it'ee mãik'aapa Ak'õre Waibùa Aserá apatap'edaa k'îrak'a bù bùjida ãchi ne–uude mãik'aapa pak'uru jua–idaa jua ek'ari. 11 Ma awara ne–inaa t'ûa bapari paapachida ma eujãdepemaarã Tachi Ak'õrepa jërek'ooda ãchi naa, mãgùùrãpa oopatap'edaak'a awaraa ne–inaa k'achia mãùrãpa oopatap'edaak'a paara. Mãga oodak'ãri, Tachi Ak'õre k'îraupijida. 12 Ma awara ùt'aa t'âpachida ne–inaa juapa ooda k'îrapite, Tachi Ak'õrepa jîp'a jaraji mîda mãga oonaadamerã.
13 Ma ne–inaa k'achia jõmaweda oo p'anù misa, Tachi Ak'õrepa ichi pedee jarapataarã pëiji ãchimaa. Mãùrãpa jarajida ma ne–inaa k'achia oo amaadamerã mãik'aapa waya oopataadamerã Tachi Ak'õre ûraade jara bùk'a; ma ûraa iru mimiapataarãpa jaradap'edaa ãchi chonaarãmaa. 14 Mamîda ãchia mãga oo k'iniadak'aa paji. K'ùùrù k'isua p'aneejida ãchi chonaarãk'a. Ma chonaarã ichiaba irude ijãa amaajida. 15 Ma awara oo amaajida iru ûraade jara bùk'a mãik'aapa ijãa amaajida irua jaradade ãchi chonaarãmaa. Ichiaba ijãa p'aneejida awaraa ak'õre waibùa apatap'edaade, wãara Ak'õre Waibùa–e paji mîda. Ma k'aurepa ne–inaa k'achia oo p'aneejida ãchi eujã ik'aawa p'anapatap'edaarãpa oopatap'edaak'a, Tachi Ak'õrepa jaraji mîda ma ne–inaa k'achia oonaadamerã. 16 Tachi Ak'õre ûraa ûri amaajida, iru ãchi Ak'õre Waibùa paji mîda. Irumaa ùt'aa t'âdai k'ãyaara broncedee oojida p'ak'a chak'e k'îrak'a bù omé mãik'aapa ak'õre waibùa apatap'edaa Aserá k'îrak'a bù ma ne–inaa juapa ooda k'îrapite ùt'aa t'âdamerã. Ichiaba ùt'aa t'âpachida lucero pajãde beemaa mãik'aapa ak'õre waibùa apatap'edaa Baalmaa. 17 Ma awara ãchi warrarã k'aurã ome paa peepipachida awaraa ak'õre waibùa apatap'edaa–it'ee mãik'aapa iidinajida eperãarãmaa jaradamerã ne–inaa p'asait'ee maa–e pùrã iidinajida petau tau k'awaa beerãmaa ne–inaa k'achia oodamerã ãchi pari. Ma ne–inaa k'achia jõmaweda oo p'anùùpa Tachi Ak'õre k'îraupijida.
18 Maperãpù Tachi Ak'õre k'îrau beeji israelitaarã ome mãik'aapa ãchi jërek'ooji ma eujã, iru bapata eujãdeepa. Judadeepa uchiadap'edaarãpai atabëiji ma eujãde. 19 Mamîda mãùrã pida ooda–e paji iru ûraade jara bùk'a. Ma k'ãyaara ne–inaa k'achia oopachida israelitaarãpa oopatap'edaak'a. 20 Mapa Tachi Waibùapa Israeldeepa uchiadap'edaarã yiaraa iru baji. K'îra nejasia papiji ãchi k'îra unuamaa iru p'anapatap'edaarã juade mãik'aapa ãchi jërek'ooji iru badamãiipa. 21 Mãgá Tachi Ak'õrepa Daviddeepa uchiadap'edaarã awara bùji apema Israeldeepa uchiadap'edaarãdeepa ma israelitaarãpa oopatap'edaa perã ãchi rey, Nabat warra Jeroboanpa ne–inaa k'achia oopidak'a. 22 Israelitaarãpa oo amaa p'anada–e paji ma rey Jeroboanpa oopidak'a. 23 Tachi Ak'õrepa ooji ichia jaradak'a iru pedee jarapataarã ideepa mãik'aapa iru mimiapataarã ideepa. Israelitaarã ãyaa pëiji iru badamãiipa. Atapiji Asiriadepemaarãmaa mãùrãpa ãchi t'ùmà ateedamerã Asiria eujãdee. At'ãri mama p'anù.
Awaraa eujãdepemaarã Samaria p'uurude p'anapatap'edaa
24 Ma t'êepai Asiriadepema reypa awaraa eujãdepemaarã pëiji p'anapataadamerã Samaria eujãde, israelitaarã p'anadap'edaamãi. Nãgà eujãdeepa eperãarã pëiji: Babilonia, Cuta, Ava, Jamat, Sefarvayin; mãgà eujãdeepa. Ma eujãdepemaarã p'aneejida Samaria eujãde p'uuru beede. 25 Mamîda ma eperãarãpa Tachi Ak'õre k'awada–e paji mãik'aapa irumaa ùt'aa t'âda–e paji. Maperã Tachi Waibùapa león pëiji ãchi t'ãide, ûk'uru peedamerã. 26 Mãga nùde ma eperãarã poro waibùarã wãjida Asiriadepema reymaa pedeede. Mãgajida: “Eperãarã pùa pëida p'ananadamerã Samaria eujãdepema p'uurude ma eujãdepema Ak'õre Waibùa k'awada–e p'anùda ajida. Mapa ma Ak'õre Waibùapa león pëimaa bùda ajida, ãchi peek'oodamerã.”
27 Mãga ûrik'ãri, ma Asiriadepema reypa mãgaji: “Mãgara p'aareerã pëiit'eeda aji, ãchimaa jarateedamerã ma eujãdepema Ak'õre Waibùa ûraa.”
28 Mãga ooji. P'aare aba jëret'aada Samariadeepa ãpùtee pëiji Betel p'uurude bapariimerã mãik'aapa awaraa eujãdepemaarã mama p'anapatap'edaarãmaa Tachi Ak'õre ûraa jarateemerã. 29 Mãga ooji mîda, ma eperãarã chaachaa ãchi ak'õre waibùa apatap'edaa k'îrak'a bù oojida bùdait'ee ãchi p'uurude Samariadepemaarã ùt'aa t'âpatap'edaa tede ee nok'ode p'anadap'edaa. 30 Babiloniadepemaarãpa oojida ãchi ak'õre waibùa apatap'edaa Sucot Benot k'îrak'a bù. Cutadepemaarãpa oojida ãchi ak'õre waibùa apatap'edaa Nergal k'îrak'a bù. Jamatdepemaarãpa oojida ãchi ak'õre waibùa apatap'edaa Asimá k'îrak'a bù. 31 Avadepemaarãpa oojida ãchi ak'õre waibùa apatap'edaa omé Nibjaz k'îrak'a bù mãik'aapa Tartac k'îrak'a bù. Jõdee Sefarvayindepemaarãpa ãchi warrarã paa peejida ãchi ak'õre waibùa apatap'edaa Adramelec–it'ee mãik'aapa Anamelec–it'ee. 32 Ma awaraa eujãdepemaarãpa ãchi ak'õre waibùa apatap'edaa chaachaa mãgá iru p'anajida mîda, ichiaba ãchi auk'aarã awara bùjida ùt'aa t'âpataadamerã Tachi Ak'õremaa. Mãga oojida ijãadak'aa beerã ùt'aa t'âpata tede. 33 Mãgá Tachi Ak'õremaa ùt'aa t'âpachida mîda, ijãa amaada–e paji ãchi ak'õre waibùa apatap'edaade. Ma ak'õre waibùa apatap'edaamaa ùt'aa t'âpachida ãchi eujãdepemaarãpa oopatap'edaak'a.
34 Ârawedapema ewari auk'a oo p'anù. Ùt'aa t'âdak'aa Tachi Waibùamaa mãik'aapa oodak'aa irua ley p'ãpidade jara bùk'a. Ma ley jara pëiji Jacobdeepa uchiadap'edaarãmaa, pia jarait'eera Israeldeepa uchiadap'edaarãmaa. 35 Ãra ome pacto ook'ãri, Ak'õrepa jaraji: “Ijãanaadapáde aji, awaraa ak'õre waibùa apataarãde mãik'aapa ùt'aa t'ânáatù mãgùùrãmaa. Ichiaba primicia teenáatù mãgùùrãmaa. 36 Mùmaa aupai ùt'aa t'âpataadaipia bù, mù parã Ak'õre Waibùa perã. Mùchi júapata parã chonaarã uchiapiji Egipto eujãdeepa. Maperã mùmaa aupai ùt'aa t'âpataadaipia bù mãik'aapa ak'ùpidaipia bù mù k'inia iru p'anù primicia tee p'anùùpa. 37 Ma awara mùa ley jarada mãik'aapa p'ãpida chonaarãmaa, ma leyde jara bùk'a oopataadaipia bù. Awaraa ak'õre waibùa apataarãmaa ùt'aa t'ânáatù. 38 K'irãpátù mùa pacto ooda parã chonaarã ome. Mùmaa aupai ùt'aa t'âpataadaipia bùda aji. 39 Mùta parã Ak'õre Waibùa. Mùchi juapa parã k'îra unuamaa iru p'anapataarã p'oyaait'eeda” aji.
40 Tachi Ak'õrepa mãga jaraji mîda, ma Israeldeepa uchiadap'edaarãpa iru pedee ûri k'iniada–e paji. Ma k'ãyaara ãchia oo k'inia p'anadap'edaa oo wãpachida, naaweda oopatap'edaak'a. 41 Tachi Ak'õremaa ùt'aa t'âpachida mîda, mãùmisa awaraa ak'õre waibùa apatap'edaa, ne–inaa juapa oodamaa ùt'aa t'âpachida. Maap'eda ãchideepa uchiadap'edaarãpa auk'a oopachida idi ewate parumaa.