Micaiapa jarada rey Acab p'oyaadait'ee
(2 Crónicas 18.1-34)
22
1 Año õpee wãyaajida Siriadepemaarã, israelitaarã ome chõoda–ee. 2 Mamîda ma año õpeede Judadepema rey Josafat israelitaarã reymaa p'asiade wãji. 3 Mãga nùde israelitaarã reypa mãgaji ichi ek'ari beerãmaa:—Parãpa k'awa p'anù Ramot de Galaad p'uuru tachidé. Mãga bùta ¿sãap'eda Siriadepema rey juadeepa jãri atada–ema? aji.
4 Mãpai ma israelitaarã reypa iidiji Judadepema rey Josafatmaa:
—¿Wã k'inia bùk'ã aji, mù ome Ramot de Galaad p'uuru pidaarã ome chõode?
Josafatpa p'anauji:
—Mù, mùchi soldaorã ome, chi caballode wãpataarã paara parã eere p'anù. 5 Mamîda naapùara iididáma aji, k'ãata Tachi Ak'õrepa k'inia bù.
6 Mapa israelitaarã reypa t'â pëiji Ak'õre Waibùa pedee jarapataarã apatap'edaarã. Perá cuatrocientos paji. Iru k'îrapite panadak'ãri, ichia iidiji:
—¿Chõonadaipia bùk'ã aji, Ramot de Galaad p'uurude wa mãga–e?
Ãchia p'anaujida:
—Chõonadapáde ajida, Tachi Ak'õrepa pù juade baaipiit'ee perã.
7 Mamîda Judadepema rey Josafatpa mãùrãpa jaradap'edaa ijãa–e paji. Mapa iidiji:
—¿Nama wê–ek'ã aji, awaraa Tachi Ak'õre pedee jarapari, mãgùmaa auk'a iididait'ee?
8 Israelitaarã reypa p'anauji:
—Paraada aji. Mãgà Imlá warra, Micaías. Mãgùmaa iididayada aji. Mamîda mù t'ãri ãrii bapari iru ome, mùmaa pedee pia jarak'aa perã. Ma k'ãyaara ichita ne–inaa k'achia jarapari.
Mamîda Josafatpa mãgaji:
—Mãga jaranaapáde aji, Ak'õre pedee jarapari ãpùte.
9 Mãpai ma israelitaarã reypa t'âji ichi soldaorã poro waibùa mãik'aapa mãgaji:
—Imlá warra, Micaías isapai aneepáde aji.
10 Israelitaarã rey Judadepema rey Josafat ome su–ak'ù p'anajida rey su–ak'ù beeparide. Ãchi reyrã p'aru jâpata jâ p'anajida. Plazade su–ak'ù p'anajida Samaria p'uurudepema puerta k'ait'a. Ma Ak'õre Waibùa pedee jarapataarã apatap'edaarã ãchi k'îrapite ak'ùnâ p'anajida, pedee jõnù Ak'õre Waibùapa jarapidak'a. 11 Mãùrãdepema aba, Quenaná warra Sedequiapa ne–animal cachok'a hierrodee ooda iru baji ichi juade. Mãga nùde irua mãgaji: “Tachi Ak'õrepa nãga jara bù: ‘Nãgà cachopa surupa eperã peek'ajik'a, mãga pùk'a parãpa Siriadepemaarã peek'oodait'eeda” aji.
12 Apemaarã Ak'õre pedee jarapataarã apatap'edaarãpa auk'a jarapachida. Acabmaa mãgapachida: “Tachi Rey Waibùa, Ramot de Galaad p'uurude chõonapáde ajida. P'oyaait'eeda ajida, Tachi Ak'õrepa pùmaa jãri atapiit'ee perã.”
13 Mãùmisa ma soldaorã poro waibùa pëida Micaías aneemerã; mãgùpa irumaa nãga jaraji:
—Jõmaarã rey Ak'õre Waibùa pedee jarapataarãpa pedee pia jaramaa p'anùda aji, reymaa. Mapa mùa enenee nâbùda aji, pùa auk'a pedee pia jaranamerã.
14 Mamîda Micaiapa p'anauji:
—Tachi Ak'õre k'îrapite mùa juraa bù irua pedee jarapi bùk'apai reymaa jarait'eeda aji.
15 Maap'eda Micaías rey k'îrapite panak'ãri, reypa iidiji:
—Micaías, ¿taipa Ramot de Galaad p'uurude chõonadaipia bùk'ã aji, wa mãga–e?
Micaiapa p'anauji:
—Chõonadapáde aji, mãik'aapa ma p'uuru jãri atadapáde aji, Tachi Ak'õrepa p'oyaapiit'ee perã.
16 Mamîda israelitaarã reypa ijãa–e paji. Mapa Micaiamaa mãgaji:
—¿Jarada jõmasaa pùmaa jarapiima aji, Tachi Ak'õre t'âde mãik'aapa iru k'îrapite wãara pedeeta jaramerã?
17 Mãpai Micaiapa mãgaji:
—K'ãimok'araa pùk'a bùde mùa unujida aji, israelitaarã chok'ara pariatua nida ee jêra bùde, ovejaarã ãchi ak'ùpari wêe nipapatak'a. Mãga bùde Tachi Ak'õrepa jaraji: “Mãùrã chipari wêe chitoonù perã, wãdaipia bù ãchi te chaa.”
18 Mãga ûrik'ãri, israelitaarã reypa Judadepema rey Josafatmaa mãgaji:
—¿Jãga jara–e paji–ek'ã? aji. ¡Jãgùpa mùmaa ichita ne–inaa k'achia jaraparida! aji.
19 Mãpai Micaiapa awaraa pedee mãgaji:
—Pùa jãga jaraji perã Tachi Ak'õre pedee jarapari ãpùte, ûríji irua mùmaa jarapi bù: “Mùa unuji Tachi Ak'õre su–ak'ù bù ichi rey su–ak'ù beeparide. Ùt'aripemaarã jõmaarã ak'ùnâ p'anajida iru ik'aawa; juaraare, juabi eere. 20 Mãga nùde Tachi Ak'õrepa iidiji k'airãta wãdai rey Acab ûraade Ramot de Galaad p'uurude chõonamerã, mama piu baibeeit'ee perã. Mãga ûridak'ãri, ma ùt'aripemaarãpa pedee awara–awaraa jarajida irua oomerã. 21 Mãpai aba uchiaji Tachi Ak'õre k'îrapite. Mãgùpa jaraji ichia ma mimia oonai. Tachi Ak'õrepa iidiji sãga ooit'ee Acab mama chõonamerã. 22 Mãpai ma ùt'aripemapa jaraji ichiata seewa pedee jarapiit'eeda aji, rey Ak'õre Waibùa pedee jarapataarã apataarã ideepa. Mãpai Tachi Ak'õrepa jaraji mãgá rey k'ûranamerã. Mãga ooji. 23 Ârapù pùa k'awa bù Tachi Ak'õrepa pëidapa ma seewa jarapiji pùchi Ak'õre Waibùa pedee jarapataarã apataarãmaa, pùa oomerã ãchia ûraa p'anùk'a mãik'aapa mãgá pù jõmerã.
24 Mãpai Quenaná warra Sedequías, Micaías k'ait'a wãp'eda, k'îra sît'aaji mãik'aapa mãgaji:
—Mù ik'aawaapa uchiak'ãri, ¿chisãgà eere wãjima aji, ma ùt'aripemada a bùta? ¿Pùmaa wã–e pajik'ã aji, ma seewa nama jara chemerã?
25 Mãpai Micaiapa p'anauji:
—Pùa wãarata k'awaait'eeda aji, ewari cherude pariatua miru nipak'ãri te awara–awaraade.
26 Mãpai israelitaarã reypa mãgaji ichi soldaorãmaa:
—¡Micaías jita atadapáde! aji. ¡Ateedapáde aji, na p'uuru ak'ùpari Amón k'îrapite mãik'aapa mù warra Joás k'îrapite! 27 Jaradapáde aji, mùa ichi pëiru carcelde t'ù bùdamerã. Mama bùde ichimaa pan pitepai pania ome teedaipia bùda aji, mù chõodadeepa k'ap'ùa pia cheru misa.
28 Mamîda ateedai naaweda, Micaiapa mãgaji:
—Pù k'ap'ùa pia cheru pùrã, mãgara Tachi Ak'õrepa mù k'ap'ùa pari pedee–e pajida aji. ¡Parã jõmaarã, k'îsíatù mùa jarada pedeede!
Acab piuda
(2 Crónicas 18.28-34)
29 Maap'eda israelitaarã rey Judadepema rey Josafat ome chõonajida Ramot de Galaad p'uuru jãri atade. 30 Mama panadak'ãri, israelitaarã reypa Josafatmaa mãgaji:
—Mùa soldao p'aru jîp'aa jâit'eeda aji. Mamîda pùa rey p'aru jâ beepáde aji.
Mãgá israelitaarã rey soldao p'aru jîp'aa jâ bùde t'îuji chõode awaraa soldaorã ome. 31 Mamîda aù naaweda Siriadepemaarã reypa jaraji ichi treinta y dos soldaorã poro waibùarã carretade wãdap'edaarãmaa israelitaarã ome chõonaadamerã; jîp'a ãchi reyta peedamerã. 32 Maperã ma soldaorã poro waibùarã carretade wãdap'edaarãpa Josafat rey p'aru jâ bù unudak'ãri, k'îsiajida: “Jãgà israelitaarã rey.” Mapa p'ùrrabaijida iru ârù wãdait'ee. Mamîda Josafat biaji k'aripa iidide mãik'aapa Tachi Ak'õrepa iru k'aripaji. 33 Mãgá Siriadepema soldaorã poro waibùarãpa k'awaa atadak'ãri jãgà israelitaarã rey–eta, waa iru t'êe wãda–e paji. 34 Mamîda chõo jõnùde, Siriadepema soldaorãpa trù p'anadak'ãri, sia aba wãyaaji Acab p'aru hierrode jâ bada ewaraa k'obùde. Mãga p'asak'ãri, Acabpa mãgaji arii bada carreta p'eraparimaa:
—P'ùrrabaipáde aji, mãik'aapa mù ata chepáde aji, siapa mù trùdap'edaa perã.
35 Taarã chõo para beeji. Israelitaarã rey bainâ beeji ma carretade mãik'aapa chõomaa beeji ma Siriadepema soldaorã ome. Mamîda k'ewara pak'ãri, piuji audú waa bat'ada perã ma carretade wãde. 36 Ak'õrejîru baai wãk'ãri, nãgà pedee jara wãjida soldaorã t'ãide: “Wãdapáde ajida, pãchi temaa, tachi rey piuda perã.”
37 Rey Acab mãgá piup'eda, ichi k'ap'ùa piuda ateejida Samaria p'uurudee. Mama ùajida. 38 Maap'eda ma carreta ateejida sùùde pania t'ùpatap'edaamãi; prostitutaarã k'uipatap'edaamãi. Mama usaarãpa Acab waa senejida Tachi Ak'õrepa jaradak'a ichi pedee jarapari ideepa.
39 Awaraa ne–inaa Acabpa ooda, chi te oopida mãik'aapa marfilpa p'êeda mãik'aapa p'uuru t'ùak'au bùpida, ma jõma p'ã bù Crónicas librode awaraa Israeldepema reyrãpa oopatap'edaa ome. 40 Acab piup'eda, chi warra Ocozías rey beeji iru pari.
Judá eujãde Josafat rey pada
(2 Crónicas 20.31-37)
41 Acab año k'îmari rey bùde Israel eujãde, Asá warra Josafat rey beeji Judade. 42 Treinta y cinco año iru baji rey pak'ãri. Veinticinco año wãyaarude Judadepemaarã rey paji mãik'aapa Jerusalende bapachi. Chi nawe Siljí k'au Azuba paji.
43 Josafat rey pia baji ichi ak'õre Asá badak'a. Ne–inaa pia oopachi Tachi Ak'õre k'îrapite. Mamîda ãripi–e paji ijãadak'aa beerã ùt'aa t'âpatap'edaa te ee nok'ode p'anadap'edaa. Maperã eperãarãpa at'ãri mama ne–animalaarã mãik'aapa ne–inaa t'ûa bapari paapachida.
44 Rey Josafat pedeeji israelitaarã rey ome chõoda–ee p'anapataadait'ee. 45 Awaraa ne–inaa Josafatpa ooda, jura chõoda ome p'ã bù Crónicas librode awaraa Judadepema reyrãpa oopatap'edaa ome. 46 Josafat rey pak'ãri, Judadeepa jërek'ooji jõmaweda ùmùk'îraarã ãtau nopipatap'edaarã ijãadak'aa beerã ùt'aa t'âpatap'edaa tede; chi at'ãri uchiada–e padap'edaarã chi ak'õre Asapa mãgeerã jërek'ãri. 47 (Maapai Edom eujãde rey wê–e paji. Ma eujã baji eujã ak'ùpari jua ek'aripai.)
48 Ma t'êepai Josafatpa barco oopiji aùde Ofirdepema nêe atanadamerã. Mamîda ma barco ãyaa wãda–e paji Ezión Gueberde k'uadap'edaa perã. 49 Ma barco at'ãri iru bak'ãri, rey Acab warra Ocoziapa Josafatmaa mãgaji: “Mù barco p'erapataarã wãpipáde aji, përé ome.” Mamîda Josafatpa wãpi–e paji.
50 Rey Josafat jai–idaak'ãri, ùajida David p'uurude, iru chonaarã ùadap'edaamãi. Maap'eda chi warra Jorán rey beeji iru pari Judade.
Israel eujãde Ocozías rey pada
51 Josafat diecisiete año rey bùde Judade, Acab warra Ocozías rey beeji Israelde. Israelitaarã rey paji año omé mãik'aapa bapachi Samaria p'uurude. 52 Mamîda Tachi Ak'õrepa Ocozías pia–ee ak'ùpachi, ichia ne–inaa k'achia ooda perã chi ak'õre Acabpa oodak'a mãik'aapa chi nawepa oodak'a, ichiaba Nabat warra, chi ak'õchona Jeroboanpa oodak'a, mãgùpa israelitaarã k'achiade baaipik'ãri. 53 Ma awara Ocozías Baalmaa ùt'aa t'âpachi, chi ak'õrepa oodak'a. Mãga ook'ãri, israelitaarã Ak'õre Waibùa audú k'îraupiji.