Rey Acabpa Nabot uva eujã jãri atada
21
1 Maapai Jezrel p'uurudepema Nabotpa uva k'ãi uuji Samaria p'uurudepema rey Acab palacio ik'aawa; irua palacio iru bada Jezrelde.2 Ewari aba Acabpa mãgaji Nabotmaa:
—Mùmaa téeji pù uva k'ãi, mama mùa verdura uumerã, ma eujã mù palacio ik'aawa bairã. Ma pari mùa teeyada aji, awaraa uva k'ãi pipùara bù përé k'ãyaara maa–e pùrã p'aayada aji, eujã netopata valor pari.
3 Mamîda Nabotpa p'anauji:
—Tachi Ak'õrepa netopiamaa bù mù ak'õreerãpa atabëidap'edaa.
4 Mãga ûrik'ãri, Acab k'îra pia–ee, t'ãri ãrii wãji ichi temaa. K'îrapa paredmaa jêra beeji mãik'aapa nek'o k'inia–e paji.
5 Mãga bùde ichi wêra Jezabel ichi k'ait'a wãp'eda, mãgaji:
—¿Sãap'eda pù k'îra pia–ee nâbùma aji, nãgá nek'o k'inia–ee?
6 Acabpa p'anauji:
—Pedeeji Jezrel pida Nabot ome. Iidiji neto pëimerã ichi uva k'ãi maa–e pùrã t'erabaimerã awaraa uva k'ãi pari. Mamîda mãga oo k'inia–e pajida aji.
7 Mãpai chi wêra Jezabelpa mãgaji:
—¿Pù israelitaarã rey–ek'ã? aji. K'ãiwee beepáde aji. ¡Mùa pù–it'ee Nabot uva k'ãi atait'eeda! aji.
8 Aweda ma wêrapa k'art'a p'ãji mãik'aapa k'arap'eda, rey sellopa tauchaa bùji mãik'aapa pëiji israelitaarã poro waibùarã Nabot p'uurude p'anapatap'edaarãmaa. 9 Ma k'art'ade nãga jara pëiji: “Jarátù p'uuru pidaarã chip'edaidamerã nek'oda–ee mãik'aapa Nabot su–ak'ù beepítù jõmaarã taide. 10 Mãpai seewa–idaa beerã su–ak'ù p'aneepítù iru ik'aawa iru ùmùateedamerã. Jaradaipia bù irua pedee k'achia jarada Tachi Ak'õre ãpùte mãik'aapa rey ãpùte. Maap'eda Nabot p'uurudeepa taawa ateedapáde aji, mãupa bat'a peet'aadamerã.”
11 Ma k'art'a leedap'eda, Nabot p'uurudepema ùmùk'îraarã ãchi poro waibùarã ome oojida Jezabelpa jaradak'a. 12 Jara pëijida ma p'uurudepemaarã chip'edaidamerã nek'oda–ee mãik'aapa Nabot su–ak'ù beepidamerã jõmaarã taide. 13 Mãpai seewa–idaa beerã omé aneejida seewata jaradamerã Nabotpa pedee k'achia jarada Tachi Ak'õre ãpùte mãik'aapa rey ãpùte. Mãpai Nabot ateejida p'uurudeepa taawa mama mãupa bat'a peedait'ee. 14 Mãga oodap'eda, Jezabelmaa Nabot piuda jara pëijida.
15 K'awak'ãri, Jezabelpa Acabmaa mãgaji:
—P'irabáiji. Nabot uva k'ãi atáji pùchi–it'ee. Chi pùmaa neto pëiamaa bada piujida aji.
16 Mãga ûrik'ãri, Acab p'irabaip'eda, wãji Jezreldee mãik'aapa ataji ma uva k'ãi ichi–it'ee. 17 Ma t'êepai Tachi Ak'õrepa Tisbedepema Ak'õre pedee jarapari Eliamaa mãgaji: 18 “Wåji israelitaarã rey Samaria p'uurude bapari Acabmaa. Nãgaweda iru Jezrel p'uurude bù, Nabot uva k'ãide ma eujã ichi–it'ee atait'ee perã. 19 Irumaa nãga jaráji: “Tachi Ak'õrepa nãga jara bù: ‘Pùa Nabot peepida perã mãik'aapa ichi eujã jãri atada perã, usaarãpa pù waa senedait'eeda a bù, Nabot waa senedap'edaamãi.’ ”
20 Mãpai Acabpa mãgaji:
—¿Pùa mù k'îra unuamaa iru bùta, nama mù jùrù cheji–ek'ã? aji.
Eliapa p'anauji:
—Jùrù chejipù jarait'ee Tachi Ak'õre k'îrapite pù ichita ne–inaa k'achia oopari. 21 Maperã Tachi Ak'õrepa pùmaa nãga jara pëiru: “Mùa pù k'achia ooit'eeda a bù. Pùdeepa uchiadap'edaarã jõpiit'ee, pùdeepa uchiada ùmùk'îra apida unuda–e parutamaa Israel eujãde. 22 Pùchideerã ome mùa ooit'eeda a bù, mùa oodak'a Nabat warra Jeroboandeerã ome mãik'aapa Ahías warra Basadeerã ome, ãchia mù k'îraupidap'edaa perã mãik'aapa israelitaarã k'achiade baaipidap'edaa perã.” 23 Ma awara Jezabelmaa Tachi Ak'õrepa jara pëi bù: “Jezrel p'uurudeepa taawa usaarãpa Jezabel k'ap'ùa piuda k'odait'eeda” a bù. 24 Pùchideerã p'uurude piudait'eerã usaarãpa k'ok'oodait'ee. Jõdee chi p'uurudeepa taawa piudait'eerã ãkosoorãpa k'ok'oodait'ee.
25 (Israelde eperã k'achiara wê–e paji rey Acab k'ãyaara. Chi wêra Jezabelpa ûraa nâbada k'aurepa ne–inaa k'achia k'îra t'ãdoo oopachi Tachi Ak'õre k'îrapite. 26 Ne–inaa juapa ooda k'îrapite ùt'aa t'âpachi amorreorãpa oopatap'edaak'a. Maperã Tachi Ak'õrepa ãra jërek'ooji israelitaarã naa.)
27 Acabpa Elías pedee ûrik'ãri, chi p'aru jêt'aaji mãik'aapa chi–ùapata p'aru jâji. Ma awara nek'o–ee beeji. Ma chi–ùapata p'aru jâpachi k'ãi bùde paara mãik'aapa k'îra pia–ee nipapachi. 28 Mãga unuk'ãri, Tachi Ak'õrepa Eliamaa mãgaji: 29 “¿Unu bùk'ã aji, Acabpa oomaa bù mù k'îrapite? Audua–ee ni. Mãga ni perã, mùa irudeerã jõpi–e pait'ee iru chok'ai bù misa. Chi warra at'ãri chok'ai bù misa, mùa irumaa jara pëidak'a ooit'eeda” aji.