Acab chõoda Siriadepema rey Ben Adad ome
20
1 Maapai Siriadepema rey t'âjarapatap'edaa Ben Adad, awaraa treinta y dos reyrã ome ãchi soldaorã p'e atajida caballoorã ome, carreta caballopa jidiupata ome. Mãpai wãjida Samaria p'uurudee. Chõodait'ee wap'ùra atajida. 2 Mãga nùde rey Ben Adadpa nãga jara pëiji ma Samaria p'uurude bada, israelitaarã rey Acabmaa: “Ben Adadpa jara bù: 3 ‘Pùa net'aa iru bù jõmaweda mëré, pùchi wêraarã ome, warrarã pipùara beerã paara.’ ”4 Israelitaarã rey Acabpa p'anauji: “Pùa jara bùk'a; mù mãik'aapa mùa ne–inaa jõmaweda iru bù përeda” aji.
5 Mãpai Ben Adadpa pedee awara jara pëiji Acabmaa: “Ben Adadpa jara bù: ‘Mùa jara pëiji pùa pùchi net'aa, wêraarã ome, warrarã ome mùmaa tee pëimerã. 6 Nu na hora mù ek'ari beerã pëiit'ee pù palaciodepema net'aa pia atade pù ek'ari beerã tedepema net'aa ãchia ata k'inia p'anù ome.”
7 Mãpai israelitaarã reypa israelitaarã poro waibùarã p'e atap'eda, mãgaji:
—Parãpa k'awa p'anù jã eperãpa mù k'achia oo k'inia bù, mùa mùchi wêraarã, warrarã, nêe p'arat'a ome wãak'a–e paji mîda.
8 Ma poro waibùarãpa mãik'aapa arii p'anadap'edaa eperãarãpa p'anaujida:
—Ma t'êepai jara pëidak'a oonaapáde ajida.
9 Mãpai Acabpa nãga jara pëiji Ben Adadmaa:
—Jarátù pãchi waibùamaa mùa ooit'ee mùa naa jaradak'a. Mamîda irua t'êe jara pëidak'a p'oyaa oo–e payada aji.
Mãgà pedee jaranajida Ben Adadmaa. 10 Mãpai Ben Adadpa Acabmaa nãga jara pëiji: “Mù ak'õre waibùarãpa mù k'achia oodaipia bùda aji, Samaria p'uuru jõpi–e pùrã, yooro p'ora aupai beemerã. Tai audú chok'ara p'anadairã ma yooro p'ora beeda araa–e pait'ee mù soldaorãpa ãchi juapa t'oi atadamerã.”
11 Mãpai israelitaarã reypa jara pëiji: “P'oyaajida aik'araa bùda aji, p'oyaadai naaweda.”
12 Mãgà pedee jara chedak'ãri, Ben Adad tomaa baji apema reyrã ome te chak'e pak'uru juadee oodade. Mãga ûrik'ãri, ichia jaraji chi soldaorã poro waibùarãmaa: “¡Soldaorã chip'edapáde aji, chõonadait'ee perã!” Mãga oojida.
13 Mãùmisa Tachi Ak'õre pedee jarapari paji israelitaarã rey Acab k'îrapite. Mãgaji:
—Tachi Ak'õrepa jara bù: “Parã k'îra unuamaa iru p'anapataarã cho–k'ara unu p'anù mîda, idi mùa ãra pù juade bùit'ee, pùa k'awaamerã mùta jõmaarã Ak'õre Waibùa.”
14 Mãpai Acabpa iidiji:
—¿K'airã k'aurepa ãra mùmaa p'oyaapiit'eema? aji.
Ma Ak'õre pedee jaraparipa p'anauji:
—Tachi Ak'õrepa jaraji k'ûtrãarã Israel eujã ak'ùpataarã jua ek'ari p'anùùrãpa p'oyaadait'eeda aji.
Mãpai Acabpa mãgaji:
—¿K'airãpa naa chõonadait'eema? aji.
Ma Ak'õre pedee jaraparipa p'anauji:
—Pù eere p'anùùrãpa naa chõodait'eeda aji.
15 Mãpai Acabpa ma k'ûtrãarã chi eujã ak'ùpataarã jua ek'ari p'anadap'edaarã chip'e ataji Israeldepema soldaorã ome. Ma k'ûtrãarã doscientos treinta y dos paji. Jõdee soldaorã siete mil ùmùk'îraarã paji. 16 Imat'ùpa uchiajida chõode. Mãga nùde Ben Adad apema reyrã treinta y dos ome at'ãri to para baji te pak'uru juadee oodade. 17 Ma k'ûtrãarã naapùara uchiajida chõode. Ben Adadpa k'awa atak'ãri ùmùk'îraarã uchiaruta Samaria p'uurudeepa, 18 mãgaji: “¡Pedeetee cheruta pùrã chõoda–ee p'anadait'ee maa–e pùrã chõode cheruta pùjida, mùa k'inia bù chok'ai jita atadamerã!” 19 Ma eujã ak'ùpataarã jua ek'ari p'anadap'edaarã soldaorã naa uchiajida p'uurudeepa. 20 Ma chaachaa pee wãjida Siriadepema aba. Mãpai Siriadepema soldaorã jîchoodachida. Ma israelitaarã ãra t'êe chõo wãjida. Mamîda ãra rey Ben Adad uchiadachi israelitaarã juadeepa, ûk'uru caballode wãpata soldaorã ome. 21 Maap'eda israelitaarã rey uchiaji mãik'aapa atapiji Siriadepemaarã caballoorã ãchi carreta caballo jidiupata ome. Mãgá Siriadepema soldaorã p'oyaajida. 22 T'êepai Tachi Ak'õre pedee jarapari waya paji israelitaarã rey k'îrapite. Mãgaji:
—Wãpáde aji, waapùara soldaorã jùrùde año jõrumaa Siriadepema rey ichi eere p'anùùrã ome waya chõo chedait'ee perã.
23 Mãùmisa Siriadepema poro waibùarãpa ãchi reymaa nãga jarajida:
—Israelitaarã Ak'õre Waibùarã eedepemaarãda ajida. Maperã tachi p'oyaajida. Eujã jewedaade chõoruta pùrã, mãgara tachia p'oyaadait'eepù. 24 Nãga ooipia bùda ajida. Reyrã pari p'uuru chaachaa pùchi jua ek'ari soldaorã poro waibùarã bùipia bù. 25 Ichiaba soldaorã waya p'e ataipia bù; naaweda p'e iru badak'a. Caballoorã, carreta iru p'anadap'edaa auk'a p'e ataipia bù. Maap'eda chõodait'ee ãra ome eujã jewedaade mãik'aapa p'oyaadait'eepù.
Ben Adadpa ijãaji mãùrã pedee mãik'aapa ooji ãrapa ûraadap'edaak'a. 26 Año aba parumaa Ben Adadpa Siriadepema soldaorã p'e atap'eda, ateeji eujã jewedaadee mama Afec p'uurude israelitaarã ome chõode. 27 Israelitaarãpa ãchi soldaorã ichiaba p'e atajida. Ãchi chaachaa chik'o teedap'eda, uchiajida chõode Siriadepemaarã ome. Siriadepemaarã k'îrapite panadak'ãri, israelitaarã chok'ara–ee p'anajida, cabra chip'eda omeepai pùk'a. Jõdee ma Siriadepemaarã cho–k'ara p'anajida.
28 Made Tachi Ak'õre pedee jarapari paji israelitaarã rey k'îrapite mãik'aapa mãgaji:
—Tachi Ak'õrepa nãga jara bù: ‘Siriadepemaarãpa k'îsia p'anù perã mù eedepema Ak'õre Waibùa aupai, mamîda eujã jewedaadepema Ak'õre Waibùa–e, mùa pùmaa ma eperãarã audú chok'ara p'oyaapiit'eeda aji. Mãpaipù pùa k'await'ee mùta jõmaarã Ak'õre Waibùa.’
29 Ewari seis wãyaarude Siriadepemaarã, israelitaarã ome k'îrapite p'anajida, chõoda–ee. Ewari sietede chõomaa p'aneejida. Ma ewateweda israelitaarãpa Siriadepema soldaorã jîte nipapata cien mil peejida. 30 Apema Siriadepema soldaorã jîchoojida Afec p'uurudee. Mamîda mama p'anùde ma p'uuru t'ùak'au bada muralla baaidachi veintisiete mil mirudap'edaarã ârù mãik'aapa mãgá piuk'oojida. Ben Adad chok'ai uchiaji ma chõodadeepa mãik'aapa mirunaji ma Afec p'uurudepema te awara–awaraade.
31 Mãpai Ben Adad jâapataarãpa irumaa mãgajida:
—Ûridooda israelitaarã reyrã pedeepata chõoda–ee p'anapataadait'ee awaraarã ome. Mapa chi–ùapata p'aru jâdáma mãik'aapa jâk'ara jâdáma tachi otaude esclavoorãmaa jâpipatak'a. Mãpai wãdáma israelitaarã rey k'îrapite chupùria iidide. Mãgá nadeepa chok'ai uchiadayada ajida.
32 Mãga oojida. Chi ùapata p'aru jâdap'eda, otaude jâk'ara jâjida mãik'aapa wãjida israelitaarã rey k'îrapite. Mãgajida:
—Pù mimiapari Ben Adadpa chupùria iidi k'inia bùda ajida, pùa iru chok'ai uchiapimerã.
Acabpa p'anauji:
—¿Ben Adad at'ãri chok'ai bùk'ã? aji. ¡Iru mùchi âpemak'a!
33 Mãga ûridak'ãri, ma Siriadepemaarã o–îadachida. Mãgajida: “¡Wãarapù, tachi waibùa! ¡Ben Adad pù âpemák'ata bù!
Mãpai Acabpa mãgaji:
—¡Atanadapáde! aji.
—Waya teeit'eeda aji, mù ak'õrepa p'uuru jãri atada pù ak'õre juadeepa. Pùa net'aa netoyada aji, Damasco p'uurude, mù ak'õrepa oodak'a Samaria p'uurude.
Acabpa p'anauji:
—Jõdee mùa pù chok'ai pëiit'eeda aji. Mãgá Acab pedeeji Ben Adad ome chõo–ee p'anapataadait'ee mãik'aapa iru k'ena pëiji.
35 Ma t'êepai arii bada Tachi Ak'õre pedee jarapari abaapa jaraji chi k'õp'ãyomaa ichi p'ua oomerã. Mamîda chi k'õp'ãyopa mãga oo k'inia–e paji. 36 Mãpai ma Ak'õre pedee jaraparipa mãgaji chi k'õp'ãyomaa:
—Pùa oo–e pada perã Tachi Ak'õrepa oopidak'a, pù namãik'aapa wãk'ãri, leonpa pù ârù cheit'ee mãik'aapa peeit'eeda aji.
Mãga p'asaji. Ma eperã ãyaa wãk'ãri Tachi Ak'õre pedee jarapari ik'aawaapa, león uchiap'eda, peet'aaji.
37 T'êepai ma Ak'õre pedee jaraparipa awaraa eperã ome unuk'ãri, ichiaba jaraji ichi p'ua oomerã. Mãpai ma eperãpa p'ua oot'aaji. 38 Mãpai ma Ak'õre pedee jarapari bainâ banaji rey wãyaaru ode. Ichi tau p'ãrajâ iru baji. 39 Rey Acab wãyaa bù misa, ma Ak'õre pedee jaraparipa golpe mãgaji:
—Tachi rey waibùa, mù, pù mimiapari, soldaorã naa chõo uchiadap'edaarã ome nipaji. Mãga nùde soldao abaapa mùmaa aneeji preso jâamerã. Jaraji mùchi juadeepa ma preso uchiaru pùrã, mù piuit'ee paji iru pari maa–e pùrã ichimaa p'arat'a tau õpee mil p'aait'eeda aji. 40 Mamîda mù, pùchi mimiapari ne–inaa audú iru bada perã ooit'ee, ma preso jirabodoji mùchi juadeepa.
Mãpai israelitaarã reypa p'anauji:
—Pùchia jaraji sãga miapidaipia bù. Piuipia bù ma preso pia jâa–e pada perã.
41 Mãpai ma Ak'õre pedee jaraparipa chi p'aru taude p'ãrajâ bada ãyaa ataji. Mãgá reypa k'awaji iru Tachi Ak'õre pedee jarapari paji. 42 Mãpai Ak'õre pedee jaraparipa Acabmaa mãgaji:
—Tachi Ak'õrepa nãga jara bù: “Pùa k'ena pëida perã eperã mùa peepi k'inia bada, iru k'ãyaara pù piuit'ee mãik'aapa iru p'uuru pidaarã k'ãyaara pù p'uuru pidaarã k'achiade baaidait'ee.”
43 Mãga ûrik'ãri, israelitaarã rey Acab k'îra pia–ee, t'ãri ãrii beeji. Maap'eda wãji ichi temaa Samaria p'uurude.