Elías mirudariida Horebdee
19
1 Acab ichi temaa panak'ãri, chi wêra Jezabelmaa nepùrùji jõmaweda Eliapa ooda mãik'aapa irua espadapa Baal pedee jarapataarã peek'ooda.
2 Mãga ûrik'ãri, Jezabel k'îraudachi mãik'aapa Eliamaa nãga jara pëiji: “¡Pù Elías bù mîda, mùta rey wêra Jezabel! Mùchi ak'õre waibùarãpa mù k'achia oodaipia bù mùa pù pee–e pùrã. Nu na horade pù Baal pedee jarapataarãk'a bait'ee.”
3 Eliapa k'awaji wãara mãga p'asait'ee ichi beeda paara Jezrel p'uurude. Mapa mirunaji Bersebadee, Judadeepa uchiadap'edaarã eujãde bù. Mama ichi mimiapari atabëiji. 4 Maap'eda tap'ewedadeepa k'ewaraa parumaa iru t'ùmùpùara wãji eujã pania wêe bùdee. Mama pak'uru retama apata ununak'ãri, aù ek'ari su–ak'ù beeji âiit'ee. Piu k'inia baji. Mapa Tachi Ak'õremaa mãgaji: “¡Jãgapaipù, Mùchi Waibùa! ¡Mù peepáde aji, mù k'achia baibairã mùchi chonaarãk'a!
5 Mãga jarap'eda, jêra beeji mãik'aapa k'ãidachi. Mamîda mãga bùde ángel paji mãik'aapa Elías t'õbaip'eda, mãgaji: “P'irabáiji, mãik'aapa nek'opáde ” aji.
6 Eliapa ak'ùk'ãri, ichi poro k'ait'a unuji pan âpùmaa bù t'ùpùtau ârù. Ichiaba unuji jarra paniapa ipuru ak'ù nâbù. P'irabaik'ãri, k'oji mãik'aapa toji. Mãpai waya jêra beeji. 7 Mamîda t'êepai ma ángel waya paji mãik'aapa t'õbaip'eda, mãgaji: “P'irabáiji, mãik'aapa nek'opáde aji, at'ãri t'ùmà wãit'ee perã.”
8 Waya Elías p'irabaiji mãik'aapa nek'oji, toji. Mãgá nek'op'eda, juatau ataji nipait'ee k'ãima cuarenta Tachi Ak'õre ee Horeb apata parumaa. 9 Mama panak'ãri, t'îuji mãu tede mãik'aapa mama k'ãi beeji. Mamîda t'êepai Tachi Ak'õrepa irumaa mãgaji:
—Elías, ¿k'ãata oomaa bùma aji, nama?
10 Eliapa p'anauji:
—Tachi Ak'õre Waibùa, mùa pù jiwaa baparida aji. Israelitaarãpa ooda–e pù ley p'ãdade jara bùk'a. Pù altar jõmaweda ãrik'oojida mãik'aapa espadapa pù pedee jarapataarã peek'oojida. Mù aupai chok'ai beeji. Ârá mù jida jùrùmaa p'anùda aji, peedait'ee.
11 Mãpai Tachi Ak'õrepa mãgaji:
—Jã mãu tedeepa uchíaji. Na eede mù k'îrapite ak'ùnâ ba chepáde aji, mù nama wãyaait'ee perã.
Mãpai Tachi Ak'õre k'îrapite nãumia p'ua beeji mãu t'oorutamaa. Mamîda ma nãumiade Tachi Ak'õrepa ichi unupi–e paji. T'êepai awêrachai wãyaaji. Mamîda ma awêrachaide Tachi Ak'õrepa ichiaba ichi unupi–e paji. 12 Ma t'êepai t'ùpùtau wãyaaji. Mamîda made Tachi Ak'õrepa ichiaba ichi unupi–e paji. T'êepai Eliapa osausawaa pedee ûriji. 13 Mãga ûrik'ãri, Eliapa Tachi Ak'õre pedee k'awaji. Mapa ichi p'aru teesoo jâ badapa ichi k'îra wãk'aji mãik'aapa ak'ùnâ banaji ma mãu te t'îupatamãi. Mãpai Tachi Ak'õrepa mãgaji:
—Elías, ¿k'ãata oomaa bùma aji, nama?
14 Mãpai Eliapa p'anauji:
—Mùa pù jiwaa baparida aji, israelitaarãpa pù ley p'ãdade jara bùk'a oodaamaa p'anù perã mãik'aapa pù altar ãrik'oodap'edaa perã, ma awara espadapa pù pedee jarapataarã peek'oodap'edaa perã. Mù aupai chok'ai beeji mãik'aapa ârá mù ichiaba jùrùmaa p'anù peedait'ee.
15 Mãpai Tachi Ak'õrepa mãgaji
—Ãpùtee wãpáde aji, pania wêe bù eujã Damascodee. Mama panak'ãri, wãpáde aji, Jazaelmaa mãik'aapa iru awara bùpáde aji, Siriadepema rey beemerã. 16 Ichiaba awara bùpáde aji, Nimsi ãichak'e Jehú israelitaarã rey beemerã. Ma awara Abel Mejolá p'uurudepema Safat warra Eliseo awara bùpáde aji, mù pedee jarapari pamerã pù pari. 17 Mãgá chi Jazael juadeepa jirabodorutaarã baaidaridait'ee Jehú juade irua peek'oomerã. Jõdee chi Jehú juadeepa jirabodorutaarã baaidaridait'ee Eliseo juade irua peek'oomerã. 18 Mãga p'asait'ee mîda, Israel eujãde mùa eperãarã siete mil chok'ai bëiit'ee, ãchi Baal k'îrapite bedabaida–e padap'edaa perã mãik'aapa ichi k'îrak'a bù k'îra ât'aada–e padap'edaa perã.
Eliseo Ak'õre pedee jarapari pada
19 Mãpai Elías wãji mamãik'aapa. Ode wãde ununaji Safat warra Eliseo ome. Eliseopa ichi eujã poreetùmaa baji aradopa. P'ak'a omee–omee doce arado jidiu wãjida. Eliseo nipaji madepema p'ak'a omé t'êe. Elías Eliseomaa wãp'eda, chi p'aru teesoo jâ bada bùji Eliseo ârù. Mãga ook'ãri, jara k'inia bù Tachi Ak'õrepa iru jùrùt'erada ichi pedee jarapari pamerã. 20 Aramata Eliseo ma p'ak'a atabëiji mãik'aapa Elías t'êe wãji. Mãga bùde mãgaji Eliamaa:
—Pù ome nipaparii naaweda wãpipáde aji, mù ak'õreerãmaa mùa ãchi k'îra âmerã mãik'aapa despediimerã. Mãpaipù mù pù t'êe wãit'eeda aji.
Eliapa p'anauji:
—Wãpáde aji. Mamîda k'irãpapáde aji, mùa pù awara bùda Tachi Ak'õre mimia–it'ee.
21 Mãpai Eliseo ãpùtee wãji ichi p'ak'a atabëidamaa. Ma p'ak'a ùmùk'îra omé atap'eda, omeeweda peeji mãik'aapa chi k'ap'ùa piuda t'ùap'eji. Mãpai pak'uru jâ bada ma p'ak'a âbùside auk'a nipadamerã paa pëiji t'ùpùtaupa. Ma p'ak'a chiara paada jedep'eda ichi p'uuru pidaarãmaa, ãrapa k'ojida. Maap'eda wãji Elías t'êe. Ununak'ãri, iru ome nipapachi iru mimiaparik'a.