Salomonpa Tirodepema rey Hirammaa jara pëida
2
1 Salomonpa Tachi Ak'õre–it'ee te oopiji. Ma awara ichi–it'ee palacio aba oopiji. 2 Ma–it'ee bùji setenta mil ne–inaa uapataarã mãik'aapa ochenta mil mãu sîpataarã ee jêra bùde mimiadamerã. Ichiaba bùji tres mil seiscientos poro waibùarã mãgà mimiapataarã ak'ùpataadamerã. 3 Ma t'êepai Salomonpa Tirodepema rey Hirammaa nãga jara pëiji:“Mù ome óoji mù ak'õre David ome oodak'a cedro pak'uru pëik'ãri irua ichi palacio oopimerã. 4 Mùa te ooit'ee mùchi Ak'õre Waibùa–it'ee. Ma te awara bùit'ee mama iru k'îrapite ne–inaa t'ûa bapari paadamerã, pan awara bùda iru–it'ee erk'a p'e bùdamerã mãik'aapa ne–animalaarã peedap'eda, tap'eda mãik'aapa k'ewara iru–it'ee paa jõdamerã; ma awara ne–animalaarã paadamerã âipata ewate, ai ewarik'ãri mãik'aapa fiesta ewate, fiesta oodak'ãri Tachi Waibùa, Jõmaarã Ak'õre Waibùa–it'ee. Israelitaarãpa ma jõma ichita oodaipia bù.
5 ’Mùa ma te pi–ia oopiit'ee, Tachi Ak'õre waibùara bairã awaraarã ak'õre waibùarã apata k'ãyaara. 6 Mamîda ¿mùa sãgá te ooima iru–it'ee, ùt'ari araa–e pùrã iru mama bapariimerã? Ma awara ¿mù, k'aima iru–it'ee te oomerã? Jîp'a mùa te oo k'inia bù, mama ne–inaa t'ûa bapari iru–it'ee paadamerã.
7 ’Maperã mùa k'inia bù pùa mùmaa eperã mimia k'îra t'ãdoo k'awaa bù pëimerã k'aripade na mimia ome. Mãgùpa ne–inaa oo k'awaa baipia bù nêedee, p'arat'adee, broncedee mãik'aapa hierrodee. Ichiaba mãgùpa p'aru k'a k'awaa baipia bù hilo p'up'uchia, p'oree, p'ãp'ãraa t'ùdadee. Ma awara pak'urudee nonoree k'îra t'ãdoo oo k'awaa baipia bù. Mãgá iru Judade mãik'aapa Jerusalende mimiai mù ak'õrepa mimiapataarã bùda ome ãrapa ichiaba ne–inaa k'îra t'ãdoo oo k'awaa p'anapata perã.
8 ’Ichiaba Líbano eujãdeepa cedro, ciprés mãik'aapa sándalo pak'uru pïiji, mùa k'awa bairã pù mimiapataarã pak'uru t'upee k'awaara p'anù awaraa eujãdepemaarã k'ãyaara. Mù mimiapataarãpa pù mimiapataarã k'aripadait'ee. 9 Ãrapa pak'uru chok'ara t'upeedaipia bù mùa ma te pi–ia ooit'ee perã. 10 Ma pak'uru t'upeepataarã–it'ee mùa tee pëiit'ee veinte mil cargaa trigo, cebada auk'a mãik'aapa veinte mil medidab vino, aceite auk'a.”
11 Mãpai Tirodepema rey Hirampa Salomonmaa k'art'a pëiji. Nãga jara pëiji:
“Tachi Waibùapa ichi eperãarã k'inia iru bapari perã, pù ãchi rey papiji.”
12 Ma awara Hirampa jara pëiji:
“¡Israelitaarã ùt'aripema Ak'õre Waibùa t'ãri pia bapari! ¡Irua na eujã pajã ome ooji! Rey David warra k'îsia k'awaa, poro wêsaa papiji. Mãgàpata te ooit'ee Tachi Waibùa–it'ee mãik'aapa palacio ooit'ee ichi–it'ee.
13 ’Pùmaa mùa ùmùk'îra k'îsia k'awaa, poro wêsaa pëiit'ee; t'âjarapata Hiram Abí. 14 Iru nawe Dandeepa uchiada; chi ak'õre Tiro p'uurudepema. Irua ne–inaa oo k'awaa bù nêedee, p'arat'adee, broncedee mãik'aapa hierrodee. Mãu sî k'awaa bù mãik'aapa pak'uru t'ê k'awaa bù. Ne–inaa k'a k'awaa bù lino nãusaadee, hilo p'up'uchia, p'ãp'ãraa, p'oree ome. Pak'urude wa p'arude nonoree k'îra t'ãdoo oo k'awaa bù, pùchia k'inia bùk'a. Iru mimiait'ee pùchi mimiapataarã ome mãik'aapa mùchi waibùa pada, pù ak'õre Davidpa mimiapataarã iru bada ome.
15 ’Pù t'ãri piapa teeit'eeda adak'a trigo cebada ome mãik'aapa aceite olivodee vino ome pïiji. 16 Mãgá nama Libanode mimiapataarãpa pak'uru t'upee p'aneedait'ee. T'upeedap'eda, mùa ateepiit'ee p'usadee. Mama balsade jâ bùdap'eda, ateedait'ee Jope p'uurudee. Mamãik'aapa parãpa ateedait'ee Jerusalendee.”
17 Salomonpa awaraa eujãdepemaarã Israelde p'anapatap'edaarã juasiapiji. Ma juasiapida chi ak'õre Davidpa juasiapida t'êe paji. Juasia aupadak'ãri, awaraa eujãdepemaarã ciento cincuenta y tres mil seiscientos paji. 18 Salomonpa madepema setenta mil awara bùji ne–inaa uadamerã; ochenta mil awara bùji mãu sîdamerã ee jêra bùde mãik'aapa tres mil seiscientos awara bùji ma mimiapataarã poro waibùarã p'aneedamerã.