Salomonpa Tachi Ak'õre te oopida
3
1 Salomonpa Tachi Ak'õre te oopiji Jerusalén p'uurude Moria eede. Aù naaweda mama Tachi Ak'õrepa ichi unupiji Salomón ak'õre Davidmaa, jebuseo t'âjarapatap'edaa Ornanpa trigo chi edeepa ãyaa p'epariidamãi; Davidpa neto atada eujãde. 2 Salomón año k'îmari rey bùde ma añode atane omeede, ewari omeede Tachi Ak'õre te oomaa beeji.3 Ma te basa teesoomaa veintisiete metro oopiji; chi jet'ee nueve metro oopiji. 4 Pórticoa oopiji ma te k'îrapite eere. Chi jet'ee nueve metro paji; chi ùt'ùa auk'a.
Ma pórtico edajãde nêepa p'êepiji. 5 Te edajãdepema mãu ârù bùpiji ciprés pak'uru, nêepa p'êeda. Ma nêe ârù oopiji palma k'iruk'a mãik'aapa cadenak'a. 6 Ma te chi–oopiji mãu pi–iapa mãik'aapa Parvayindepema nêe pi–iara bùpa. 7 Te edajãdepema jõma nêepa p'êepiji; chi viga, chi pared, chi puerta i jõmaweda, chi puerta paara. Paredde ùt'aripemaarãk'a isia paraa querubín apatap'edaa t'êpiji.
8 Te jãde cuarto omé oopiji. Chi edupùara bù cuarto Tachi Ak'õre–it'ee awara bùji. Mãgà cuarto teesoo nueve metro paji; chi jet'ee auk'a. Ma edupùara bù cuarto nêe piara bùpa p'êepiji. Ma–it'ee nêe veinte tres mil tonelada p'e atajida. 9 Clavo poro paara nêepa p'êepiji. Ma clavo chaa p'êedait'ee quinientos cincuenta gramos nêe p'e atajida. Ichiaba cuarto te jãdepema cuarto ùt'aik'a eere p'anadap'edaa nêepa p'êepiji.
10 Ma edupùara bù cuartode ùt'aripemaarãk'a isia paraa querubín apatap'edaa omé oopiji mãik'aapa omeeweda nêepa p'êepiji. 11 Ma querubink'a omeeweda isia ewaraa p'anùde teesoo nueve metro paji. Isia aba metro omé ap'eda veinticinco centímetro paji. Mãgà k'âpa pared aba t'õbaiji. Chi apema isia k'â awaraa querubink'a isia k'â ome t'õbaijida ma cuarto esajîak'a. 12 Jõdee apema querubink'a isia k'âpa apema pared t'õbaiji. Mãgà isia teesoo ichiaba metro omé ap'eda veinticinco centímetro paji. 13 Ma querubink'a bee omeeweda oopiji bainâ p'anadamerã mãik'aapa edupùara bù cuarto t'îupatamaa ak'ù p'anadamerã.
14 Ma t'îupata–it'ee Salomonpa p'aru teesoo k'apiji lino nãusaadee mãik'aapa oveja k'ara p'up'uchia, p'oree, p'ãwaraa t'ùdadee querubink'a aùde k'apiji.
15 Ma te k'îrapite eere columna omé oopiji. Ma chaachaa dieciséis metro teesoo baji. Ma columna k'â chaa ùt'aik'a eere awara columna chak'e oopiji; metro omé ap'eda veinticinco centímetro chi teesoo. 16 Ma columna chak'e ârù pùra pùk'a p'aneedamerã cadena k'ada trenzak'a oopiji mãik'aapa cien granadajõk'a bee oopiji bùdamerã ma cadenade. 17 Ma columna bainâ bùpiji Tachi Ak'õre te k'îrapite eere, aba sur eere, aba norte eere. Chi sur eerepema t'â bùji Jaquín; norte eerepema t'â bùji Boaz.