Salomonpa ne–inaa oopida bùdait'ee Tachi Ak'õre te jãde
(1 Reyes 7.23-26, 38-51)
4
1 Salomonpa ichiaba altar broncedee oopiji. Mãgà altar teesoo nueve metro paji; chi jet'ee auk'a. Jõdee chi ùt'ùa metro k'îmari ap'eda esa–auk'a paji. 2 Ichiaba pailak'a bù choma metal torrabaidadee oopiji aùde pania ùadamerã. P'ùtrùa baji; i abaadeepa aù k'îrapite i parumaa metro k'îmari ap'eda esa–auk'a paji. Chi ùt'ùa metro omé ap'eda veinticinco centímetro paji. Chi i jõmaweda trece metro ap'eda esa–auk'a paji. 3 Ma pailak'a bù i edaik'a eere p'ak'a ùmùk'îrak'a bee erk'ama omeede oojida ma pailak'a bù oodak'ãri. Ma p'ak'a ùmùk'îrak'a bee diez bùjida cuarenta y cinco centímetro chaachaa. 4 Ma pailak'a bù bùùrù p'ak'a ùmùk'îrak'a bee doce broncedee ooda paji. Õpee ak'ù p'anajida norte eere; õpee sur eere; õpee oriente eere; õpee occidente eere. Ma p'ak'a ùmùk'îrak'a bee ek'arra ârù mãik'aapa ãpùteik'a eerepema bùùrù ârù bùjida ma pailak'a bù. 5 Ma pailak'a bù padaa ocho centímetro paji. Chi i jõree baji copadek'a maa–e pùrã lirio nep'onok'a. Ma pailak'a bùde pania sesenta y seis mil litro araaji.6 Ichiaba Salomonpa pailak'a bee k'aipeera diez awara oopiji broncedee. Ma diezdepema joisomaa bùpiji Tachi Ak'õre te sur eere mãik'aapa joisomaa chi norte eere. Made sùùpachida netraa, nechiara ne–animalaarã peedap'edaadepema Tachi Ak'õre–it'ee paa jõpidait'ee. Jõdee ma pailak'a bù chomade p'aareerãpa ãchi jua, bùùrù ome sùùpachida.
7 Ichiaba lámpara bùpata diez nêedee oopiji Tachi Ak'õrepa naaweda jaradak'a, mãgà bùdamerã Tachi Ak'õre te edajãdepema cuarto waibùara bùde; joisomaa sur eere mãik'aapa joisomaa norte eere.
8 Ichiaba mesa diez oopiji auk'a bùdamerã ma cuarto waibùara bùde: joisomaa sur eere mãik'aapa joisomaa norte eere. Ichiaba taza cien nêedee oopiji. 9 Te ãuk'idaa t'ùak'au bùpiji p'aareerã–it'ee patio bamerã. Madepema puerta broncepa p'êepiji. 10 Ma pailak'a bù choma metaldee ooda te taawa bùpiji ma te k'îrapite suroeste eere.
11 Ma awara oopiji k'uuru, pala mãik'aapa taza awaraa. Mãgá Hirampa aupaji chi mimia rey Salomon–it'ee Tachi Ak'õre tede. Ichia nãgee ne–inaa jõma ooji:
12 columna omeeweda; columna chak'e bùdap'edaa ma columna chaa ùt'aik'a eere; cadena trenzak'a k'ada pùradamerã ma columna chak'e chaachaa; 13 cuatrocientos granadajõk'a bee erk'ama omeede bùdait'ee ma cadena chaachaa; 14 basa chi pailak'a bee k'aipee ome; 15 pailak'a bù choma chi p'ak'a ùmùk'îrak'a bee doce ome, aù ârù su ak'ù bamerã; 16 jõmaweda k'uuru, pinza mãik'aapa tenedor.
Ma jõma Hiram Abipa bronce pi–ia ùrradadee ooji rey Salomon–it'ee, Tachi Ak'õre tede bùdamerã. 17 Reypa ma ne–inaa jõma oopiji yoorodee oodap'edaa moldede eujã jewedaa bùde Jordán to ik'aawa Sucot mãik'aapa Saretán p'uuru esajîak'a. 18 Audú net'aa broncedee oodap'edaa perã, p'oyaa juasiada–e paji jõmasaa kilo bronce iru p'anadap'edaa ma mimia–it'ee.
19 Salomonpa ichiaba Hiram Abimaa nãgee net'aa awaraa oopiji: altar k'aipee nêepa p'êeda; jõmaweda mesa aù ârù pan awara bùdap'edaa Tachi Ak'õre–it'ee bùdamerã; 20 jõmaweda lámpara bùpata nêedee ooda chi lámpara ome, k'oo iru p'anadamerã edupùara bù cuarto t'îupata k'îrapite Ak'õrepa jaradak'a; 21 jõmaweda nep'onok'a bee, lámpara, pinza, ma jõmaweda nêedee ooda; 22 mãik'aapa jõmaweda tijerak'a mecha t'ùùpataadait'ee, taza, platillo, brasero; puerta Ak'õre te jãdepema puerta ome nêepa p'êeda paara.