Ak'õre tedepema puerta jâapataarã
26
1 Davidpa ichiaba awara bùji Tachi Ak'õre tedepema puerta jâapataarã ma puerta jâa turniadamerã. Asaf warra Coré paji. Iru warra Meselemías awara bùji. 2 Meselemías warrarã paji: chi naapema Zacarías, aù eere Jediael, aù eere Zebadías, aù eere Jatniel, 3 aù eere Elam, aù eere Johanán mãik'aapa Eliehoenay.4 Ichiaba awara bùji Obed Edom ichi warrarã ome: chi naapema Semaías, aù eere Jozabad, aù eere Joa, aù eere Sacar, aù eere Natanael, 5 aù eere Amiel, aù eere Isacar mãik'aapa Peultay. Mãgá chok'ara paraaji Tachi Ak'õrepa Obed Edom pia ak'ù bada perã.
6 Obed Edom warra Semaiapa ichiaba warrarã iru baji. Mãùrã ãchi ak'õredeepa uchiadap'edaarã ëreerãdepemaarã poro waibùarã paji, juataura, sõcharra p'anadap'edaa perã. 7 Semaías warrarã paji: Otni, Rafael, Obed mãik'aapa Elzabad. Ichiaba iru ëreerãdepemaarã, Eliú mãik'aapa Samaquías juataura, sõcharra p'anajida. 8 Ma jõmaarã Obed Edomdeepa uchiadap'edaarã paji. Ãchi mimia t'ãripa oopachida, juataura, sõcharra p'anadap'edaa perã. Ma Obed Edomdeepa uchiadap'edaarã sesenta y dos paji.
9 Meselemías warrarã mãik'aapa ichi ëreerãdepemaarã dieciocho paji. Jõmaweda sõcharra p'anajida.
10 Merarideepa uchiada Josapa chi warra Simri ichi ëreerãdepemaarã poro waibùa bùji, mãgà ichi warra naapema–e paji mîda. 11 Simri eerepema Jilquías paji. Aù eere Tebalías paji. Aù eere Zacarías paji. Josá warrarã ichi ëreerã ome trece paji.
12 Ak'õre tedepema puerta jâapataarã awara–awaraa bùjida mimia turniadamerã. Ek'ariarã, poro waibùarã paara mimiapachida Tachi Ak'õre tede. 13 Suerte jemenejida k'awaadait'ee chisãgà ëreerãpa tedepema puerta awara–awaraa turnia jâapataadai, chonaarã, warrarã paara.
14 Suerte jemenedak'ãri, oriente eerepema puerta bùjida Selemías jua ek'ari. Jõdee norte eerepema puerta bùjida ichi warra Zacarías jua ek'ari. Zacarías k'îsia k'awaa baji eperãarã ûraait'ee. 15 Sur eerepema puerta bùjida Obed Edom jua ek'ari. Jõdee ichi warrarã bùjida ma tede ne–inaa ùadap'edaa jâapataadamerã. 16 Occidente eerepema puerta Oeste maa–e pùrã Saléquet apatap'edaa bùjida Supín mãik'aapa Josá jua ek'ari. Ma Saléquet puerta ee ùt'à wãpari ode baji.
Nãga mimiapachida. 17 Ewari chaa jâapataarã seis oriente eerepema puerta jâapachida. Norte eerepema mãik'aapa sur eerepema puerta jâapataarã k'îmari jâapachida. Ne–inaa ùadap'edaamãi jâapataarã omee–omee jâapachida. 18 Occidente eerepema patio t'îupata jâapataarã omé tedepema puertamãi jâapachida. Jõdee ma patio taawaik'a eere jâapataarã k'îmari jâapachida. 19 Mãgá Coredeepa uchiadap'edaarãpa mãik'aapa Merarideepa uchiadap'edaarãpa Tachi Ak'õre te jâapachida.
20 Awaraa Levideepa uchiadap'edaarãpa jâapachida nêe, p'arat'a, net'aa pi–ia mãik'aapa eperãarãpa ne–inaa pia tee chedap'edaa Tachi Ak'õre–it'ee. 21 Guersondeepa Ladán uchiaji. Ladandeepa uchiadap'edaarã ëreerã; ãchi poro waibùarã Jehieldeepa uchiadap'edaarã paji. 22 Jehiel warrarã Zetán mãik'aapa Joel paji. Ma jõmaarãpa jâapachida net'aa pi–ia Tachi Ak'õre tede ùa bùdap'edaa.
23 Amirandeepa uchiadap'edaarãpa, Izardeepa uchiadap'edaarãpa, Hebrondeepa uchiadap'edaarãpa mãik'aapa Uzieldeepa uchiadap'edaarãpa net'aa pi–ia ichiaba jâapachida. 24 Mãùrã poro waibùa Sebuel paji. Iru Moisés warra Guersondeepa uchiada paji. 25 Irudeepa uchiadap'edaarã nãgùùrã paji. Sebuel warra Eliezer paji. Eliezer warra Rejabías paji. Rejabías warra Isaías paji. Isaías warra Jorán paji. Jorán warra Zicrí paji. Zicrí warra Selomit paji. 26 Selomitpa mãik'aapa ichi ëreerãdepemaarãpa jâapachida net'aa pia awara bùdap'edaa Tachi Ak'õre–it'ee; rey Davidpa teeda; ëreerã chaa poro waibùarãpa teedap'edaa; soldaorã milmil, ciencien poro waibùarãpa teedap'edaa mãik'aapa awaraa soldaorã poro waibùarãpa teedap'edaa. 27 Chõodap'eda, ãrapa p'oyaadap'edaarã juak'aawa net'aa jãri atadap'edaadepema awara bùpachida Tachi Ak'õre te chiwidi oodamerã. 28 Selomitpa ichi ëreerãdepemaarã ome ichiaba jâapachida awaraa net'aa Tachi Ak'õre–it'ee awara bùdap'edaa Samuel, chi Tachi Ak'õrepa ne–inaa unupida jaraparidapa, Quis warra rey Saulpa, soldaorã poro waibùarã Ner warra Abnerpa mãik'aapa Sarvia warra Joabpa.
29 Izardeepa uchiada Quenanías ichi warrarã ome awara bùjida eperãarã poro waibùarã mãik'aapa charraarã p'aneedamerã.
30 Hebrondeepa uchiada Jasabías ichi ëreerãdepemaarã ome awara bùjida Israel eujã Jordán to occidente eere ak'ù p'anadamerã. Ãra mil setecientos ùmùk'îraarã paji. Ãrapa reypa jaradak'a oopachida mãik'aapa Tachi Ak'õre–it'ee mimiapachida.
31 David año cuarenta rey bùde Israeldeepa uchiadap'edaarã t'â p'ã jêra bùde Hebrondeepa uchiadap'edaarã t'â ak'ùdak'ãri, unujida ùmùk'îraarã sõcharra p'anadap'edaarã. Ma eperãarã Jazer de Galaad p'uurude p'anapachida. Jerías mãùrã poro waibùa paji. 32 Ma sõcharra p'anadap'edaarã ëreerãdepemaarã poro waibùarã dos mil setecientos paji. Rey Davidpa mãùrã awara bùji Rubendeepa uchiadap'edaarã, Gaddeepa uchiadap'edaarã mãik'aapa Manasedeepa uchiadap'edaarã esa–auk'a p'anadap'edaarã ak'ù p'anadamerã. Ma israelitaarã t'ãide reypa jaradak'a oopachida mãik'aapa Tachi Ak'õre–it'ee mimiapachida.