Levideepa uchiadap'edaarã
23
1 David chonaa pak'ãri, chi warra Salomón israelitaarã rey bùji. 2 Ichiaba t'â pëiji jõmaweda israelitaarã poro waibùarã, p'aareerã mãik'aapa awaraa Levideepa uchiadap'edaarã. 3 Chip'edaidak'ãri, jaraji Levideepa uchiadap'edaa ùmùk'îraarã treinta año iru bùdeepa ùt'aa juasiadamerã. Treinta y ocho mil paji. 4 Mãùrãdepema Davidpa veinte cuatro mil ùmùk'îraarã awara bùji poro waibùarãk'a Tachi Ak'õre tede mimiapataarã ak'ùpataadamerã. Jõdee seis mil awara bùji charraarã mimia mãik'aapa israelitaarã poro waibùarã mimia oopataadamerã. 5 K'îmari mil awara bùji Tachi Ak'õre tedepema puerta jâapataadamerã. Awaraa k'îmari mil awara bùji ichia ne–inaa oopidade música chaapataadamerã Tachi Ak'õremaa ùt'aa t'â p'anadak'ãri. 6 Davidpa ma Levideepa uchiadap'edaarã nãga t'ooji mimia awara–awaraa oopataadamerã: Leví warrarã Guersondeepa uchiadap'edaarã, Coatdeepa uchiadap'edaarã mãik'aapa Merarideepa uchiadap'edaarã.Guersondeepa uchiadap'edaarã
Coatdeepa uchiadap'edaarã
12 Coat warrarã k'îmari paji: Amirán, Izar, Hebrón mãik'aapa Uziel. 13 Amirán warrarã paji: Aarón mãik'aapa Moisés. Tachi Ak'õrepa Aarón jùrùt'eraji irua mãik'aapa irudeepa uchiadap'edaarãpa p'aareerã mimia ichita oopataadamerã. Mãùrãpa ne–inaa pia israelitaarãpa tee chedap'edaa awara bùpachida Tachi Ak'õre–it'ee. Ne–inaa t'ûa bapari paapachida Tachi Ak'õre k'îrapite mãik'aapa iru pari pedee pia jarapachida israelitaarãmaa. 14 Moisés, Tachi Ak'õrepa jùrùt'erada, mãik'aapa iru warrarã juasiajida awaraa Levideepa uchiadap'edaarã ome. 15 Iru warrarã paji: Guersón mãik'aapa Eliezer. 16 Guersón warra naapema Sebuel paji. 17 Eliezer warra Rejabías paji. Eliezerpa awaraa warrarã wêe baji. Mamîda chi warra Rejabiapa warrarã chok'ara iru baji. 18 Coat warra Izar paji. Iru warra naapema Selomit paji. 19 Awaraa Coat warra Hebrón paji. Iru warrarã nãgùùrã paji: chi naapema Jerías, aù eerepema Amarías, aù eerepema Jahaziel mãik'aapa aù eerepema Jecamán. 20 Awaraa Coat warra Uziel paji. Iru warra naapema Micaías paji mãik'aapa aù eerepema Isías paji.
Merarideepa uchiadap'edaarã
21 Leví warra Merari paji. Iru warrarã paji: Majlí mãik'aapa Musí. Majlí warrarã paji: Eleazar mãik'aapa Quis. 22 Eleazar warra wêe piuji. Wêra k'aurã aupai ooji. Ma wêraarã ãchi chîapa chonaa Quis warrarã ome miak'ãijida. 23 Merari warra Musipa warrarã õpee ooji: Majlí, Edar mãik'aapa Jeremot.
24 Ma jõmaarã Levideepa uchiadap'edaarã ëreerãdepemaarã poro waibùarã paji mãik'aapa ãradepema ùmùk'îraarã veinte añodeepa ùt'aa Tachi Ak'õre tede mimiapachida.
25 Aù naaweda Davidpa mãgaji:
—Ârá israelitaarã Ak'õre, Tachi Ak'õre Waibùapa ichi eperãarã k'ãiwee p'anapimaa bù. Ârá iru bapariit'eeda a bù, Jerusalén p'uurude. 26 Maperã Levideepa uchiadap'edaarãpa Tachi Ak'õre ome unupata te, net'aa aùde nâbù ome waa ãyaa ateeda–e pait'eeda aji.
27 Jõma oojida Davidpa jara bëidak'a. Levideepa uchiadap'edaa ùmùk'îraarã veinte añodeepa ùt'aa juasiajida. 28 Mãùrã mimiapachida Aarondeepa uchiadap'edaa p'aareerã jua ek'ari. Tachi Ak'õre te ak'ùpachida mãik'aapa ma te ãuk'idaa patio, cuarto k'aipee mãik'aapa net'aa awara bùdap'edaa ma tede iru p'anadait'ee sùùpachida iru ûraade jara bùk'a. 29 Ichiaba ãrapa pan Tachi Ak'õre–it'ee awara bùdap'edaa erk'a bùpachida iru tedepema mesade. Net'a tau mãik'aapa harina eperãarãpa Tachi Ak'õre–it'ee tee chedap'edaa ak'ùpachida mãik'aapa nãgee pan ma harinadee ooda ichiaba ak'ùpachida: pan levadura wêe ooda, ne–inaa p'ep'edee harina aceite ome p'oiradadee ooda, net'a tau sartende paada paara. Pia ak'ùpachida mãgee pan oodak'ãri, chi harina auk'a chaadamerã mãik'aapa âpùdamerã Tachi Ak'õre ûraade jara bùk'a. 30 Ma awara tap'eda chaa, k'ewara chaa paara ãchi Tachi Ak'õre tedee wãpachida gracias jaradait'ee mãik'aapa iru–it'ee k'aridait'ee. 31 Ichiaba âipata ewate, fiesta ewate mãik'aapa aù ewarik'ãri k'aripapachida p'aareerãpa Tachi Ak'õre–it'ee ne–animalaarã paa jõpidak'ãri. Chok'arachok'araa ma mimia oopachida Tachi Ak'õrepa jaradak'a. 32 Jõmaweda Tachi Ak'õre ome unupata te pia ak'ùpachida, taawapema cuarto, te jãdepema cuarto paara. Mãgá #mimiapachida ãchi auk'aarã, p'aareerã Aarondeepa uchiadap'edaarã jua ek'ari.