P'aareerã Aarondeepa uchiadap'edaarã
24
1 Aarondeepa uchiadap'edaarã ichiaba awara–awaraa mimiapachida Tachi Ak'õre tede p'aareerã mimia oodak'ãri. Aarón warrarã paji: Nadab, Abiú, Eleazar mãik'aapa Itamar. 2 Mamîda Aarón jai–idaai naaweda, Nadab mãik'aapa Abiú warra wêe piujida. Maperã Eleazar mãik'aapa Itamar p'aareerã mimia oopachida.3 Eleazardeepa uchiada Sadocpa mãik'aapa Itamardeepa uchiada Ajimelecpa David k'aripajida irua p'aareerã awara–awaraa bùk'ãri ma mimia oodamerã. 4 Aarondeepa uchiadap'edaarã juasiadak'ãri, k'awaa atajida Eleazardeepa uchiadap'edaa ùmùk'îraarã chok'araara paji Itamardeepa uchiadap'edaa k'ãyaara. Mapa ma uchiadap'edaarã awara–awaraa bùjida. Eleazardeepa uchiadap'edaarã ëreerãdepemaarã poro waibùarã dieciséis jùrùt'erajida awara p'aneedamerã ma mimia–it'ee mãik'aapa Itamardeepa uchiadap'edaarã ëreerãdepemaarã poro waibùarã ocho jùrùt'erajida awara p'aneedamerã. 5 Suerte jemenejida k'awaadait'ee sãga awara–awaraa bùdaipia bù, ma jõmaarã awara p'anadap'edaa perã mimiapataadamerã Tachi Ak'õre–it'ee; #ûk'uru Tachi Ak'õre te badamãi mãik'aapa ûk'uru ma te jãde.
6 Mãpai reypa oopariida p'ãpari, Levideepa uchiada, Natanael warra Semaiapa ma p'aareerã t'â p'ãji rey k'îrapite mãik'aapa na poro waibùarã k'îrapite: p'aare Sadoc; Abiatar warra Ajimélec; p'aareerã ëreerãdepema poro waibùarã mãik'aapa awaraa Levideepa uchiadap'edaarã ëreerãdepemaarã poro waibùarã. Suerte jemenedak'ãri, Eleazardeepa uchiadap'edaarã bùjida awara–awaraa turnia mimiadamerã Itamardeepa uchiadap'edaarã awara–awaraa bùdap'edaarã ome.
7 Suerte jemenedak'ãri, nãgà órden uchiajida ma mimia turniadamerã: naapùara uchiaji Joyarib, aù eere Jedaías, 8 aù eere Jarín, aù eere Seorín, 9 aù eere Malquías, aù eere Mijamín, 10 aù eere Cos, aù eere Abías, 11 aù eere Jesúa, aù eere Secanías, 12 aù eere Eliasib, aù eere Yaquín, 13 aù eere Hupá, aù eere Jesebab, 14 aù eere Bilgá, aù eere Imer, 15 aù eere Hezir, aù eere Afsés, 16 aù eere Petaías, aù eere Ezequiel, 17 aù eere Jaquín, aù eere Gamul, 18 aù eere Delaías, aù eere Maazías.
19 Mãgá mãùrã aba–abaa turniajida Tachi Ak'õre tede ãchi mimia oopataadait'ee. Ne–inaa jõma oopachida ãchi chonaa Aaronpa jarateedak'a, Tachi Ak'õrepa irumaa jaradak'a.
Apema Levideepa uchiadap'edaarã
20 Apema Levideepa uchiadap'edaarã nãgùùrã paji: Amirandeepa uchiada Subael; Subaeldeepa uchiada Jehedías; 21 Rejabiadeepa uchiada, chi warra naapema Isías; 22 Izardeepa uchiada Selomot; Selomotdeepa uchiada Yajat. 23 Hebrón warrarã paji: chi naapema Jerías, aù eere Amarías, aù eere Jahaziel mãik'aapa aù eere Jecamán. 24 Uzieldeepa uchiada Micaías paji. Micaiadeepa uchiada Samir paji. 25 Micaías âpema Isías paji. Isiadeepa uchiada Zacarías paji. 26 Merarideepa uchiadap'edaarã paji: Majlí, Musí mãik'aapa Jazías warra Benó. 27 Merarideepa uchiada Jaziadeepa uchiadap'edaarã paji: Benó, Soján, Zacur mãik'aapa Ibrí. 28 Majlideepa uchiada Eleazar paji. Iru warra wêe piuji. 29 Quis warra Jeramel paji. 30 Musí warrarã paji: Majlí, Edar mãik'aapa Jeremot.
Ma jõmaarã Levideepa uchiadap'edaarã ëreerãdepemaarã paji. 31 Mãùrã ichiaba suerte jemenejida ãchi auk'aarã Aarondeepa uchiadap'edaarãpa oodap'edaak'a. Mãga oojida rey David, p'aare Sadoc, Ajimélec mãik'aapa awaraa p'aareerã ëreerã mãik'aapa Levideepa uchiadap'edaarã ëreerã k'îrapite. Jõmaarã ma Levideepa uchiadap'edaarã ëreerãdepemaarã auk'a mimiapachida, âpema naapema ëreerãdepemaarã, chi t'êe âpema ëreerãdepemaarã paara.