22
1 Mãpai Davidpa jaraji: “Nama Tachi Ak'õre te oodait'ee, iru altar ome. Nama israelitaarãpa ne–animalaarã Tachi Ak'õre–it'ee paa jõpipataadait'ee.”Net'aa p'e atadap'edaa Tachi Ak'õre te–it'ee
2 Maap'eda Davidpa jaraji awaraa eujãdepemaarã israelitaarã eujãde p'anapatap'edaarã iru ome chip'edaidamerã. Mãpai mãùrãdepema mãu sî k'awaa beerã awara bùji mãu sîdamerã Tachi Ak'õre te–it'ee. 3 Ma awara hierro waibùa p'e atapiji aùdee clavo mãik'aapa grapa oodamerã chi puerta–it'ee. Ichiaba bronce waibùa p'e atapiji. 4 Cedro pak'uru cho–k'ara ichiaba p'e atapiji. Waibùa iru p'anajida Sidón p'uurudepemaarãpa mãik'aapa Tiro p'uurudepemaarã rey Davidmaa tee pëidap'edaa perã.
5 Mãga oo bùde Davidpa k'îsiaji: “Mù warra Salomón at'ãri k'ûtrãa bù. Waide ne–inaa pia oo k'awa–e. Maperã mùa net'aa p'e wãit'ee, Tachi Ak'õre te–it'ee. Iru te pi–ia oodaipia bù, jõmaarãpa ma te t'o p'anadamerã.”
Mãga k'îsiada perã David jai–idaai naaweda, net'aa k'îra t'ãdoo p'e wãji ma te–it'ee. 6 Ma t'êepai chi warra Salomón t'â pëiji mãik'aapa jaraji irua israelitaarã Ak'õre Waibùa te oopimerã. 7 Salomonmaa mãgaji:
—Warra, mùa te oopiit'ee paji Jõmaarã Ak'õre Waibùa–it'ee. Mãgà mù Ak'õre Waibùa. 8 Mamîda Tachi Waibùapa mùmaa nãga jaraji:
‘Pù jura chõoyaa bapari perã eperãarã chok'ara peedoo. Maperã mùa k'inia–e bù pùa mù–it'ee te oomerã. 9 Mamîda pùdeepa warra uchiait'ee; chõo–ee bapariit'ee. Mùa iru k'îra unuamaa iru p'anapataarã k'ãiwee p'anapiit'ee iru ome. Mapa iru t'âjaradait'ee Salomón.a
Iru jua ek'ari p'anapataadak'ãri, israelitaarã chõoda–ee p'anapataadait'ee. 10 Iruata mù–it'ee te ooit'ee. Iru mù warra pait'ee. Jõdee mù iru ak'õre pait'ee. Iru jua ek'ari israelitaarã ichita p'anapataadait'eeda’ aji.
11 Ârá warra, mùa k'inia bù Tachi Ak'õre pù ome bapariimerã mãik'aapa k'aripamerã. Mãgá irua jaradak'a pùa iru te ooit'ee. 12 K'inia bù irua pù poro wêsaa, k'îsia k'awaa papimerã. Mãgá pùa israelitaarã pia ak'ù baparii mãik'aapa ooparii Tachi Ak'õre Waibùa leyde jara bùk'a. 13 Mãgá ooru pùrã Tachi Waibùapa jaradak'a Moisemaa israelitaarãpa oodamerã, pia uchiait'ee pù ome. Sõcharra baparíiji mãik'aapa t'ãride chóoji Tachi Waibùade ijãa bùde. K'îsianáaji mãik'aapa waaweenáaji. 14 Mù mimiapachi pù k'aripait'ee Tachi Ak'õre te pia oomerã. Nêe perá tres mil trescientos tonelada p'e iru bù. Ichiaba p'arat'a perá treinta y tres mil tonelada p'e iru bù. Ichiaba hierro waibùa, bronce waibùa p'e iru bù. Audú waibùa bairã, chi chùk'ùa p'oyaa chaada–e. Ma awara pak'uru mãik'aapa mãu p'e iru bù. Mamîda pùa waapùara p'eipia bù. 15 Chi mimia–it'ee mùa atapiji ne–inaa k'îra t'ãdoo oo k'awaa beerã: mãu sî k'awaa beerã; ladrillo oo k'awaa beerã; pak'uru t'ê k'awaa beerã; 16 awaraarã ne–inaa nêedee, p'arat'adee, broncedee, hierrodee oo k'awaa beerã. ¡Ârá ãchimaa mimiapipáde aji, Tachi Ak'õrepa pù k'aripait'ee perã!
17 Maap'eda Davidpa jaraji jõmaweda israelitaarã poro waibùarãmaa chi warra Salomón k'aripadamerã. 18 Mãgaji:
—Parã Ak'õre Waibùa parã ome baparida aji. ¿Ma k'aurepa parã k'ãiwee p'anapata–ek'ã? aji. Irua na eujãdepemaarã mùmaa p'oyaapiji ichi jua ek'ari mãik'aapa parã, ichi eperãarã jua ek'ari p'anapataadamerã. 19 Mapa t'ãripa jùrùpatáatù oodait'ee Jõmaarã Ak'õre Waibùapa oopi bùk'a. K'aripátù Tachi Ak'õre te oodait'ee. Aupadak'ãri, iru baaltek'a bù ateedayada aji, bùdait'ee ma tede, awaraa net'aa iru–it'ee awara bùdap'edaa ome.