Davidpa israelitaarã soldaorã juasiada
(2 Samuel 24.1-25)
21
1 Satanapaa israelitaarã ùmùatee k'inia baji. Mapa Davidmaa k'îsiapiji israelitaarã ichi jua ek'ari p'anadap'edaarã jõmaweda juasiamerã. 2 Mãga ooji. Rey Davidpa jaraji ichi soldaorã poro waibùa Joabmaa mãik'aapa israelitaarã poro waibùarãmaa k'aripadamerã. Mãgaji:—Wãyáatù israelitaarã ëreerã eujã jõmaade; Berseba p'uurudeepa Dandeepa uchiadap'edaarã eujã parumaa. Ma eujãdepema ùmùk'îraarã pia beerã soldaorã mimia–it'ee juasiadap'eda, jara chedapáde aji, mùa k'awa k'inia bairã jõmasaa p'anù.
3 Mamîda Joabpa p'anauji:
—Rey Waibùa, pù at'ãri chok'ai bù misa, pia bak'aji Tachi Ak'õre Waibùapa pù jua ek'ari p'anapataarã chok'araara papida paara, mãgá p'uuru cienk'a waapùara uchiadamerã. Mamîda ¿k'ãare–it'ee k'inia bùma na p'uuru pidaarã ùmùk'îraarã juasiadamerã? ¿Ma k'aurepa Tachi Ak'õre k'îrapite israelitaarã k'achiade p'aneeda–e paik'ã? aji.
4 Joabpa mãga jaraji mîda, reypa jaradak'a paji. Mapa Joab awaraa poro waibùarã ome uchiajida israelitaarãdepema ùmùk'îraarã juasiade. 5 Ãpùtee chedak'ãri, Joabpa Davidmaa jaraji jõmasaa ùmùk'îraarã soldaorã mimia oodamerã unu atadap'edaa. Israel eujã jõmaade unujida un millón cien mil ùmùk'îraarã, espadapa chõo k'awaa p'anadap'edaarã. Jõdee Judadeepa uchiadap'edaarã eujãde, awaraa cuatrocientos setenta mil unujida. 6 Mamîda Joabpa juasiapi–e paji ùmùk'îraarã Levideepa uchiadap'edaarãdepema mãik'aapa Benjamindeepa uchiadap'edaarãdepema, wãara reypa jarada ooamaa bada perã. 7 Ichiaba Tachi Ak'õrepa pia–ee ak'ùji Davidpa jarada. Maperã irua israelitaarã miapiji. 8 Mamîda ma t'êepai David k'îsia p'ua nâbeeji ma juasiapida k'aurepa. Mapa Tachi Ak'õremaa mãgaji:
—Tachi Waibùa, mùa ne–inaa k'achia ooji mãgá ùmùk'îraarã juasiapik'ãri. Ma k'achia ãyaa bùpáde aji, mù, pù mimiaparipa pariatua mãga ooda perã.
9 Maperã Tachi Ak'õrepa nãga jaraji David ek'ari ne–inaa p'asait'ee jaraparida, Gadmaa: 10 “Wåji Davidmaa mãik'aapa nãga jarapáde aji: Ne–inaa k'achia õpeedepema pùa aba jùrùt'eraipia bùda aji, mùa israelitaarãmaa oomerã pùa ooda k'aurepa mùa ãra miapiit'ee perã.” 11 Mãpai Gad Davidmaa wãp'eda, mãgaji:
—Tachi Ak'õrepa nãga jara bù. ¿K'ãata k'inia bùma Tachi Ak'õrepa israelitaarãmaa oomerã? 12 ¿K'inia bùk'ã año õpee wãyaarude irua jarrajara pëimerã israelitaarã t'ãide, maa–e pùrã atane õpee wãyaarude pù k'îra unuamaa iru p'anapataarãpa pù jùrùmerã peedait'ee, maa–e pùrã k'ãima õpee wãyaaru irua k'ayaa k'achia pëimerã israelitaarã t'ãide? K'îsiap'eda, nãgaweda jarapáde aji, mùa jaramerã mù pëidamaa.
13 Davidpa p'anauji:
—¿Mùa sãgapù ooima? aji. Eperãarã juade baai k'ãyaara, piara bù Tachi Ak'õre juade baaimerã, irua eperãarã chupùria k'awaapari perã.
14 Mãpai Tachi Ak'õrepa k'ayaa k'achia pëiji israelitaarãmaa. Ma k'ayaapa israelitaarã ùmùk'îraarã setenta mil k'iniijida. 15 Maap'eda Ak'õrepa ángel pëiji Jerusalén p'uurudepemaarã jõpimerã. Mamîda mãgùpa eperãarã peek'oo wãk'ãri, Tachi Ak'õre t'ãri p'ua nâbeeji Jerusalendepemaarã jõpi k'inia–e bada perã. Mapa ma angelmaa mãgaji: “¡Jãgapai! ¡Waa peenaapáde!” aji.
Mãga jara bùde ichi ángel jebuseo t'âjarapatap'edaa Ornán eujãde baji, trigo tau ãyaa p'epatamãi chi edeepa. 16 Mãga nùde Davidpa pajãmaa ak'ùk'ãri, unuji ma ángel pajã eujã esa–auk'a ak'ùnâ bù espada ome ichi juade. Ma espadapa Jerusalén p'uurumaa ùa baji. Mãga unuk'ãri, David ichi ek'ari poro waibùarã ome bedabaidachida ãchi tau bùùrù eujãde t'õbairutamaa. Aù naaweda t'ãri p'uapa ãra chi–ùa p'aru jâ p'anajida. 17 Mãpai Davidpa Tachi Ak'õremaa mãgaji:
—Ak'õre Waibùa, mùchi Ak'õre Waibùa, ¡mùata israelitaarã juasiapiji! ¡Mùata ne–inaa k'achia ooji! ¡Jã eperãarã ovejaarãk'a p'anù! Maarepida k'achia ooda–e paji. ¡Ak'õre, mùa enenee nâbù pùa ma k'achia pëimerã mùmaa mãik'aapa mùchideerãmaa! Pùchi eperãarãmaa waa k'achia oonaapáde aji.
Davidpa altar ooda
(2 Samuel 24.18-25)
18 Mãpai Tachi Ak'õre angelpa jaraji Gad Davidmaa wãmerã. Iru k'îrapite pak'ãri, Gadpa jaraji Davidpa altar oonamerã jebuseo Ornán eujãde, trigo tau ãyaa p'epatamãi chi edeepa. 19 Aramãgá David wãji Gadpa jaradak'a oode. 20 Ornanpa trigo tau ãyaa p'e baji chi edeepa mãik'aapa ichi ãpùteik'a eere ak'ùk'ãri, ma ángel unuji. Mãga bùde chi warrarã k'îmariweda iru ome p'anadap'edaa mirudachida. 21 Mãpai Ornanpa unuji rey David cheru ichi mimiapataarã ome. Reymaa wãp'eda, iru k'îrapite bedabaidachi ichi tau bùùrù eujãde t'õbairumaa. 22 Mãpai Davidpa mãgaji:
—Mùa neto k'inia bù na eujã trigo tau ãyaa p'epatamãi chi edeepa. Nama Tachi Ak'õre–it'ee altar ooit'ee. Mãgapù irua k'ayaa k'achia ãyaa atait'eeda aji.
23 Ornanpa p'anauji:
—Rey Waibùa, mùa pùmaa pari teeyada aji. Óoji pùa oo k'inia bùk'a. Mùa p'ak'a ùmùk'îraarã nama iru bù peedap'eda, altarde Tachi Ak'õre–it'ee paa jõpidamerã. Trigo tau k'iru na pak'uru ome t'ùpùk'a paai. Ichiaba na trigo tau teeit'ee pùa Tachi Ak'õre–it'ee paamerã. Na jõma pari teeit'eeda aji.
24 Mamîda rey Davidpa p'anauji:
—Pù t'ãri pia bù. Mamîda mùa ma jõma neto k'inia bù chi valor pari. P'oyaa ne–animal Tachi Ak'õre–it'ee paa jõpi–eda aji, p'aa–e bùta.
25 Mãgá Davidpa Ornán juak'aawa ma eujã neto ataji p'ak'a ùmùk'îraarã ome. P'arat'a tau nêedee ooda seiscientos p'aaji. 26 Mama Davidpa altar oopiji mãik'aapa ma ne–animalaarã peep'eda, ûk'uru Tachi Ak'õre–it'ee paa OJO jõpiji mãik'aapa ûk'uru paapiji jedek'oit'ee ichi auk'aarã ome. Mãpai Tachi Ak'õremaa ùt'aa t'âmaa bak'ãri, ùt'ariipa irua t'ùpùtau pëiji ma altar ârù ak'ùpiit'ee ichia ma ne–inaa paadap'edaa pia ak'ùji. 27 Mãùmisa Tachi Ak'õrepa ma angelmaa jaraji iru espada ùa bùmerã. 28 Mãga nùde Davidpa k'awaak'ãri Tachi Ak'õrepa pia ak'ùji ichia ooda ma jebuseo Ornán trigo p'e atap'edaamãi, irua awaraa ne–animalaarã peeji paapiit'ee Tachi Ak'õre–it'ee. 29 Maapai Tachi Ak'õre ome unupata te Moisepa ooda pania wêe bù eujãde mãik'aapa Tachi Ak'õre–it'ee ne–animalaarã paa jõpata altar Gabaón eujãde baji. 30 Mamîda David mamaa wã k'inia–e paji Tachi Ak'õre ángel espada unup'eda, waawee bada perã.