Davidpa siriorã mãik'aapa amonitaarã p'oyaada
(2 Samuel 10.1-19)
19
1 Ma t'êepai amonitaarã rey Najás piuji mãik'aapa ichi pari chi warra rey beeji. 2 Mãga k'awaa atak'ãri, Davidpa nãga k'îsiaji: “Mùa Najás warra, Janún pia ak'ùit'ee, chi ak'õrepa mù mãgá ak'ùda perã iru chok'ai bak'ãri.” Mapa Davidpa ichi ek'ari beerã pëiji ichi t'ãri p'ua jaradamerã Janunmaa, chi ak'õre piuda k'aurepa. Mamîda ma pëidaarã amonitaarã eujãde panadak'ãri Janún t'ãri o–î–îapide, 3 amonitaarã poro waibùarãpa rey Janunmaa mãganajida: “Tachi Rey Waibùa, ¿pùa k'îsia bùk'ã wãara Davidpa ichi ek'ari beerã pëiji pedee pia jaradamerã pù ak'õre piuda k'aurepa? ¿Ãra pëiji–ek'ã ajida, tachi eujã ak'ùdamerã, ãchia unuruta irumaa jarade wãdamerã mãik'aapa t'êepai tachi eujã jõde chedamerã?”4 Janunpa ijãaji. Mapa ma amonitaarãmaa jaraji Davidpa pëidaarã jita atadamerã, ãra idak'ara wêdamerã mãik'aapa ãra p'aru jêdamerã edaik'a eereepa ùt'aa k'ùrrù parumaa. Mãpai ãra ãpùtee pëiji ãra eujãdee. 5 Awaraarãpa Davidmaa nepùrùnadak'ãri irua pëidaarã p'asadap'edaa, irua eperãarã pëiji mãùrã ome ununadamerã. Ma Janunmaa pëidaarã audú k'îra nejasia p'anajida ma amonitaarãpa ãchi idak'ara mãgá wêdap'edaa perã mãik'aapa ãk'adaa pùk'a ãpùtee pëidap'edaa perã. Mapa Davidpa jara pëiji ãchi Jericó p'uurude p'aneedamerã idak'ara uchiaruta misa. Ma t'êepai waya Jerusalendee chedayada aji.
6 Ma amonitaarãpa k'awajida Davidpa pia–ee ak'ùji ãrapa oodap'edaa ichia pëidaarãmaa. Mapa rey Janunpa mãik'aapa ma amonitaarãpa treinta y tres mil kilo p'arat'a pëijida Mesopotamia eujãdepemaarãmaa, Siria eujãde bada Macá eujãdepemaarãmaa mãik'aapa Sobá eujãdepemaarãmaa, ma p'arat'a pari carreta soldaorã caballo ârù wãpata ome pëidamerã ãchi k'aripade. 7 Ma p'arat'a pëidap'edaa pari atajida treinta y dos mil carreta mãik'aapa Macadepema rey, ichi soldaorã ome. Mãùrã cheepurujida Medeba p'uuru k'îrapite. Mãga nùde amonitaarã poro waibùarãpa ãchi soldaorã p'e ata wãjida p'uuru bee chaa jura chõodait'ee. 8 Davidpa mãga k'awaak'ãri, pëiji ichi soldaorã poro waibùa Joab iru soldaorã ome chõodamerã mãùrã ome. 9 Ma amonitaarã soldaorã ãchi p'uurudepema puerta k'ait'aara chedap'edaarã erk'a bainâ p'aneejida jura chõodak'ãri, oopatak'a. Jõdee reyrã ãchi ome chedap'edaarã ma p'uurudeepa taawa t'ùmùùpai p'aneejida. 10 Joabpa unuk'ãri ma amonitaarã eere p'anadap'edaarã cheruta k'îrapite eereepa mãik'aapa ãpùteik'a eereepa, ichia israelitaarã soldaorã sõcharrara beerã jùrùt'eraji siriorã soldaorã ome chõonadamerã. 11 Jõdee awaraa soldaorã bùji ichi âpema Abisay jua ek'ari, ãra chõonadamerã amonitaarã ome. 12 Mãga bùde Abisaymaa mãgaji: “Siriadepemaarãpa mùchi eere p'anùùrã p'oyaa wãruta pùrã, chéji mù k'aripade. Jõdee amonitaarãpa pùchi eere p'anùùrã p'oyaa wãruta pùrã, mù wãit'ee pù k'aripade. 13 Waaweenáaji. Sõcharra chõodáma tachi israelitaarã eujã pari mãik'aapa Tachi Ak'õre p'uuru aùde nâbù pari. ¡Tachi Ak'õrepa ooyada aji, irua k'iniata!”
14 Joab ichi soldaorã ome uchiadak'ãri chõode siriorã soldaorãmaa, ãra jîchoojida iru naa. 15 Amonitaarãpa mãga unudak'ãri, ãchi jida jirabodojida Joab âpema, Abisay naa mãik'aapa t'îuk'oodachida ãchi p'uurude. Maap'eda Joab ãpùtee wãji Jerusalendee.
16 Siriorãpa k'awadak'ãri ma israelitaarã soldaorãpa ãchi eere p'anadap'edaarã p'oyaadap'edaa, jara pëijida ãchi auk'aarã, chi Éufrates to k'îraare p'anapatap'edaarãmaa k'aripa chedamerã. Chejida ãchi soldaorã poro waibùa Sofac rey Hadad Ezer soldaorã ome. 17 Mãùrã cheruta Davidmaa jaranadak'ãri, aramata irua israelitaarã soldaorã p'e ataji mãik'aapa Jordán to sîajida mãùrã ome unude. Davidpa jaraji ichi soldaorã uchiadak'ãri chõode erk'a nipapataadamerã. Mãpai ma siriorã soldaorãpa ãra ârù wãjida. 18 Mamîda ma chõo jõnùde siriorã jîchoojida Israeldepemaarã naa. David eere p'anadap'edaarãpa siriorã soldaorã jîte wãdap'edaarã cuarenta mil peejida. Ichiaba carretade wãdap'edaarã siete mil peejida. Ma awara Davidpa siriorã soldaorã poro waibùa Sofac peeji. 19 Siriorã rey Hadad Ezer eere p'anadap'edaarãpa mãùrã p'oyaadap'edaa k'awa atadak'ãri, pedeejida David ome chõoda–ee p'anapataadait'ee. Mãgá David jua ek'ari p'aneejida. Maadak'ãriipa siriorãpa amonitaarã waa k'aripa k'iniada–e paji.